Since 2006

ZAM Information Department

Volume 7, Issue 7 July 22, 2012

Estd. 2006

informing people, transforming lives

Pilna mangngilh kha kei in; amah in nang hong cing ding hi. Amah deihpha in; amah in hong kem ding hi. Paunak 4: 6
BANGHANGIN MALAYSIAAH SAUVEIPI KITENG KHA MAWK AHIAM
Tukum sung deuhdeuh Malaysia UNHCR Makaipipa in galtai-gambelte akhualna leh a hehpihna-in thu hong vaikhak phapha-in, tuabang mah aa ih nuntak zawhding zong a hihtheih tawpin hong hanciam pih hi. Ngimna leh tupna, bangci nisim nuntak ziate kisam, Kipawlnate nasep picinna ding cihdan lam bekbek galtai-gambelte tung amah mahin hilh phapha-in, kumdang tawh kibanglo pha deuh hi! Banghiam cih leh, Malaysia gam abel galtai mi kitam mahmahta aa, Malaysia gam mah ah bangtan, kum bangzah tengding kitheilo dinmun ahih manin, ei aa ding thu tampi, maban tampi hong ngaihsut sak na hi gige hi. Tua kawmkawm in, ama lunghimawh mahmah thute lakpan Malaysia gamsung aa galtaite-in nasep theihna phalna kumpi tungpan ngahtheihna ding amah mahin hanciam semsem hi. Tangko theihna newspaper te, radio te na leng ah tangko-in, kumpi zum tuamtuamte-ah zong amah ngiat va pai-in ei aa ding thu va sung kawikawi hi. Tuabek thamlo, UNHCR zum huangsung zong deihtak puahpha khinin, inndei kilawm tuamtuam zong lam behbeh aa, a sawtlo khatin zong zum inndei nono tampi-ah kipanta uhhi. Ama nuai aa nasemte lungkimna zong hanciam hi. Banghang in Malaysia UNHCR pen picing sak sawm semsem aa, galtai-gambelte vai khual semsem hiam? Malaysia aa galtaite Malaysia mah ah hong kepcip sawm hiam? Ahih kei leh, ei gam tektek a hoih lamah a kikhel ding ngak uh hen, hong ci ahi diam? Na hi khinlo hi! Ei pen Malaysia ah omom dingin zong hong deihsak lo aa, a gam tek uh a kikhel dong ngak uh hen, zong na ci hetlo hi! Ahang bulpite lakpan ahang pawlkhat pen anuai aa bang ahihi. Galtai khatin Malaysia ah nuntak haksa, suakta kisalo ahihna tawh kizui-in gamthumna a lametna sang mahmah aa, nisim mahin ngaklah hi. Ih vekpi phialin tuadan ahihi. Ulianpipa pulakna khat ih zak ciang, tuadan ahih mawk takin cih ngeungau ding pawlkhat hong om hi. Malaysia ah, UNHCR in galtai aa a ciaptehsa 98,000 val omkhin, ci hi. Galtai veve UNHCR pan aki ciamteh nailo tul tampi omlai hi. Kum khatin gamthumna gamte-in hong laak/san a kigawm pen a tam mahmah leh 9,000 (tul kua) bek hihtuak hi. Tua hi aa, Malaysia pan gamthumna tungkha cihpen tawmcikno lak aa kihel kha na hi gige hi. Lamkhat pan, ih hawmthawh nop hang UNHCR, RSC, IOM te-in hong hici koihkoih zong na hikhinlo-in, galtaigambel hong sangding, hong muakding gamthumna gam tawmlua zong thukhat, hong sanzah uh pen ei a omzah tawh etkak leng tawmlua mahmah lai na himawk hi. Zomi sungpan mi a za tampi mah gamthumna gam tuamtuam ih tun sam hang tul tampi tak ki omlai hi. iNFO

MALAYSIA OMSUNG MAILAM THU SAUPI KHUAL HUAI SEMSEM HI

Hih ih thulu masa sung aa Malaysia UNHCR makaipipa hanthotna leh makaihna ommah bangin Zomi galtai-gambelte-in zong, zingvai nitak vai ih buai kawmin mailam thu saupi khualzawh ding hanciam huai hi. Malaysia ah tawlkhat sung taamding hilel ingh, cih ngaihsutna neihloh ding thupi hi; Tawlkhat sung cihpen bangtan kitheilo hi! Tua tawlkhat sung mahin ei leh ei mailam thu tampi kikhual zawhding kisam hi. Sum tha lawh nasep nei khatin, hithei hi leh, gamthumna a tunciang a phattuam pihlai theihding nasep namte semzo leng hoihpen hi. Khangno khatin lawm leh gual kikholh zia leh kikholhna phualte teelsiam kul aa, ama pumpi a siasak thei namte peuhmah pelhzo leh hoihpen hi. Adeuhdeuh in, zu leh khamtheih vanzatte peuhmah kineh khakding hilo hi; Malaysia pen, ih gei-ah deihsakna tawh ih gamtat hong khaam zelzel ding om khollo lel hi! Naupang kum (18) nuai anei innkuan peuhmah in ih naupangte pilna, siamna sinna Sangte-ah kahsak zo tangtang leng hoihpen hi. Zomi ngeina, Zopau leh Zolai siamsak zawhding thupi penpen lai hi. Ei mimal vai hilo aa, mipih, khuapih, meltheihte vai atawm atamin a vaanpih Zomi akuama peuhin, mipihte vai a vaihawmpih cihciang bek sangin Zomi ki pulakna anei tangtang ngiat hihzawh ding thupi penpen hi. Ki pulakna omlo nasep pen ki pulaklohna hipah in, ei ngaihsut picin zawhloh man tawh Zomi pulaklohna tha apia semsem kisuak kha thei lai hi. iNFO

Naupang Pattahlohna Minam Supna Hi

Hun khat lai-in Vietnam te tampi galtai kawkawi-in, a tuntunna vuah Sang kahna, Sang thukhun tawh kiukna, Sang ah siamsinna na neilo uh ahih manin tuhun takciang USA gamsung bangah, a tatsia, a lungtom, mi tawh kikhawl theilo, mi ngaihsut zia aban zolo, a vakvai tampi tak omta, ci-in galtai vai thu kaikhawmten pulak hi. Khang tampi kimang thei hi Malaysia aa Zomi naupang tampite aa ding ZEC Sangte-ah agim atawlte vaihawmnate tulaitak mahin kisam bek hilo-in, hun khatteh minam aa ding a thupitna kimu semsem ding hi. Hih naupangte namdangte tawh liangko kikim hong suahteh galtai dinmun atun laitak un kua-in pantah hiam, cihpen a thupitna kimu sansan panding hi. Tuamah bangin, tate a deihsak nu leh pate zong amau tate deihsak ciang hibeklo-in minam khantohna ding asemsemte hi gige uhhi. Zomi naupang bangzah Sang kahlo 2012 May kha bei-in, Malaysia pan UNHCR thuneite theihsakna khatah galtai naupang kum (18) nuai phazah kigawm vekpi pen 20,534 phata, ci uhhi. Tawm hetlo-in,

ZAM THUPUAK
tuasung pan Sang tung khalo, Sang kah khalo, Sang kah zolo, Sang kah akinlo ki tamzaw hihtuak sawnsawn hi! Sang kahlo acih lakah Zomi bangzah ih phazen diam! Na gei-ah, na bangkua sungah, na meltheih sungah, nang innkuan sungah, naupang sang a kah zolo, ahih kei leh sang kah ding tha aki pialo bangzah a om hiam? Sang naupang Nu leh Pa te tung tampi ki nga hi Galtai naupang khat kumpi Sangte-ah kah theilo ahih hangin, pilna leh siamna sinna-ah, aniam hetlo Kipawlna bulphut Sangte om kawikawi hi, cih pen, hong tungcil naupangte nu leh pate lo buang in ih theitek hi. Malaysia dinmun pen, haksatna tuamtuam ommah hi. Kong pua pusuak ih naupangte aa ding zong ki lung himawh den mah hi. Nektawm ding tawh ih buai mahmah laitak in zong, naupangte sang sum ding, abeiding tuamtuamte vaihawm a haksa mah hi. Hih ih naupangte hong khangcing semsem leh, bang lam zui ding uh aa, bang sem ding uh aa, bang thute lunggulh in hong neiding, gam thupite tawh kiteh nangin amau thu muhzia bang ciang hiding cih a thakin ih ngaihsut sakding thupi hi; Kisam hi. A deuhdeuh in, naupang laitak pen, a kiim a paam, nisim, hunsim aa, hun tam a zatna amun/aphualte zui-in, a gamtat leh a lungsim puakte ki lamdang toto pah hi. Ih naupangte bang thute tawh ahun manpha uh beisak ihiam? Ahun manpha uh beipih ihiam? Ih naupangte pilna sinna sangte-ah a lung uh a kim hiam? Laisinna, siamsinna nuam asa uh hiam? Ih naupangte Sang kha lo aa asum tha lawhna tha manh in innsung sum zeek hong lemsak takpi hiam? Ih naupangte lai tawh aki gamla khin hiam? Ih naupangte sang kahna ih thapia zelzel hiam? Ih naupangte khantohna ih sittel ngei hiam? Ih naupangte lungsim puak zia ih tel takpi hiam? Ih naupangte laite, innlaite ih hilh thei/zo kei zongin, a lemthei pen aa lai ettheihna ding ahun leh amun lem penpen khat ih vaihawm sak tangtang hiam? Ih naupangte pilna-siamna sinsak ding tha pia zolo bek thamlo-in, ih khaktan kha hiam? Ih naupangte ei deihsak zahin pilna hong deih kei leh, bangci bangin tha pia, hanthawn ihiam? ZEC

July 22, 2012

RST Kisamte Leh Nasep Luttheite

Tuma kha khat khawngpan 2010 ma aa UN ngah RST kisam nailote ZAM panin ki kaikhawm in RST zumpi-ah ki zasak hi. RST zum panin zong tampi mah interview ni ding vaihawm sakpah uhhi. Adeuhdeuhin kaihkhopna aa min hong pia peuhmahin phone zat pilvang kul ding hi. Ahang dang hilo kiciat loh khak manin RST pan hong sap khawng kipelh sak khakloh ding hanciam ni. Banghang hiam cih leh, ih Kipawlna official email te, lailute tawh ih khak hi-in, Zomi Kipawlna sung aa a kician mitein in hong ngaihsut sakna uh ih mialsak khak lohding kisam hi. Kipawlna khualna-in mipihte khualna ahihi. ZAM pan nasep aki ngahsak ZAM member te-in zong, ZAM palaite hong vaihawm sak cih sang Zomi Kipawlna ii hong vaihawm sak cih phawk gige-in, nasepna leh pute tawh kiho, kithuahna-ah cihtakna leh thumanna tawh nasep hahkat ding kisam hi. Kipawlna min a tawisang pa/ nu na hihzawh leh, nang bang mah aa nasep a kisam na mipih tul tampite akhual pa/nu na hihi.

DAHPIHNA Pa Thang Lun Mang (Laibung Khua, Gualnam

Beh) ii tanu Lia Cing Sian Paal Lun pen leitung haksatnate a sinkha manlo-in zato pan hong nusia pah hi. A nu leh pa ZSM member hi-in, ZCF-Canaan member zong hi uh aa, sivuina vaite sum le pai beite ZSM leh ZCF-Canaan in July 19 ni-in ma pangkhawm hi. A nu leh pa tawh ih dahkhawm hi. ZSM DAHPIHNA Pa Kham Khen Zam (Gawngmual Khua, Bawmkhai Beh) ii tapa Pa Pau Tun Thang (Kum 35) in, July 19, 2012 ni-in innlam aa om a it a zi, a ta (4) leh nuntakna nusia hi. Malaysia a tun sawtnailo-in, pakhuan khatah sum thalawh nasepna pan kamsiatna tawh a pumpi-in lungno zatuite lelin zato pan hong nusia ahihi. ZSM member khat hi. Sivui ding vaite ki vaihawm laitak hi. Zomi bupin ih dahpih hi. ZSM ZSM Thu Khensatna ZSM/2012/13 - Sihna tawh kisaiin han leitang ngahhak ahih manin han ah hun kibawl nawnlo ding aa, mun lempen khatah hun bawlin, hun man ciangin a kisam pailoh phamawh Siate, Inntekte leh Makaite pawl khatin bus (1) tawh han ah va vui dingin hoih kisa-in, makaite vekpi thukimna tawh ki kipsak hi. A luang pen hun bawlna-ah ki lalo ding hi. Zato pan han ah ki paipih suakpah ding hi. ZSM Si Sitding New Zealand ah resettlement ngahding Khupson Lo Deih Cin (791-09C02092); Maan (passport) (3) tawh IOM si sitna phual ah July 23, 2012 ni 8am lapin paiding. NASEP ZAM member te aa ding Rawang aa om automobile factory (setzung) ah nasep om; Ni khat nai (9) sung; OT omden; Nai (1) teh RM6 val ngahding; Omna pia; An vaklo. Mailam ah zong ki zangthei nasep hi. Tualo, UNHCR-EST pan hong muhsak nasep zong pawlkhat omkik hi. ZAM member nasep kisam peuhmah in kidawp thei hi; Sia Hau Khai (0123674665) FGA Rawang Pan Sapna July 27-28 ni crusade om ding; Thu bulphuh - Lungkhamna Kuam Pan Lametna Kongpi-ah (Hosea 2: 15); Speaker - Evan. Thang Khan Khen; Bus ki vaihawm ding hi; Kizopna ding - Naacin (017 388 5762) UNHCR-CDU Pan Manglai Hilhna CDU makaihna tawh ZEC Sang naupangte ii Nu leh Pa te aa ding mangpau, manglai sintheihna ZEC-Cheras ah kipankhin hi. ZECMaharajalela ah zong a sawtlo-in kipanta ding hi. ZEC Sang khat peuhpeuh ah akah naupangte nu le pate-in manh piakkulloin sinthei ding uhhi. Dawptheihna: Tg. Kham (016 293 9027) HELP University Kihongta Project Self HELP ci-in UNHCR leh HELP University in a vaihawm khop English, Multemedia, Culinary sinnate July 23, 2012 ni-in hilhkikta ding uhhi. Zomi khangno pawlkhat ki helthei leuleu hi. ZEC Thupuak Tongdot Laibu Kingahkikta Ih ngaklah English-Zomi Tongdot Laibu kingahkikta hi. RM50 bek mahin kipia hi.

Malaysia Pan Business Studies Azo Zomi Te

Kawlgam khangno pawlkhat aa ding Business Studies, Marketing, Accounts, English, Literature, Music, Drama leh Christian Theology ahilh Ruth Education Centre (REC) in July 15 ni-in, Kum Khat Cinna Pawi khat neithei hi. Kum khat tawntung hun tamzaw Sang ah giakkawm ngiat aa pilna, siamna saang asin Zomi khangno (4) lakpan (3) in Zawhna laipi ngahthei uhhi. Tu-in Singapore pan a makaih Diploma Programme kahding hita uhhi. Pilna, siamna ahilh a Siate-uh pen Malaysia gamsung aa university te-ah lecturer leh professor te vive hi-in, asin laite uh professional career piazo ding zahin REC makaipipa-in a vaihawm ahihi. Hih Zomi khangnote pen, ZEC ah a tawmpen kum khat leh lang a kahzawh uh ciang REC lutzo dingin a kitelte hi. Tukha kipat in zong ZEC-Maharajalela pan mahin athak (4) ki lutsak thei hi. Kawlgam mualtung minam tuamtuam leh gamdang Siate mai-ah Zomi hihna tawisang ngam asuak dingin ZEC pan hanthotsa leh tha kipia den hi. A Sang panun Zomi cihtawh na ciamteh pah lel uhhi. Haksatna tampi phu kha ta leh a gualzawhna uh Pahtawina ih pia hi. ZAM EC