An Official Organ of The Bangalore Mizo Association Registered Under Societies Act of Karnataka No.

: BLU-S188-2007-08 Date 7 May 2007

Vol. XVIII Issue No.25 Bangalore Mizo Association Pathian Nitin Chhuak Chanchinbu Date: 16th Sep., 2012 Phek Khatna

TUALCHHUNG

BMA AW Sp
Tawngka Chhuak
Min bawl Fak-ar-ek

*BMA Football semi final leh final match ni 19, Sept, nilaini a khelh tur a ni. He hunah hian Exhibition match ropui tak khelh a ni dawn bawk. Member-te kim taka kal turin kan inngen e.. *Mizo Cultural Nite inbuatsaihna pawh a vawrtawp a thleng chho tan a. Souvenir atan appeal siam pawh thahnemtak dawn a ni tawh a. Ni 20 thleng advertisement hi chhan theih a ni dawn a ni. He hun pawimawh tak atana inphal apiang te, tlem lua tam lua awm lovin, he hun hlawhtlin nan theihtawp i chhuah ang u. *BMA Lucky ticket zuar tute khan kan ticket zawrh lai te kan zuar zo tawh anih chuan a rang lamin Nl. Jenny hnenah theh luh tur ani. Kan hma lawk Vangpui Kut lo awm tura draw tur anih avangin I hmanhmawh tlang ang u. *Nimin, 15th September, khan MSA huaihawt in UTC, Tagore Hall ah zirna kut pui hlawhtling taka hman ani a. He kut hi kan DG & IG, Pu Lalrokhuma Pachuau, IPS, chuan hmanpui a. Bangalore mizo zirlai ten an hlawkpui hle. *North East Welfare Association (NEWA) hmalakna: Tun hnai kan boruak kal zel ah NEWA Spokesperson Nl. Jenny leh hmarchhak hruaitu thenkhat tlawmngai ten hma an la zui zela. Police Station hrang hranga FIR thehluh te khawn khawmin investigation kal zel an bawhzui renga. Police Station 11 atangin Case 17 an buaipui tawh.

He tawngkam hi pawl sawm ka zira, hostel ka luh hnuin ka hre ve tan a. Mak ka ti thei hle. Thiante nena inkawmho changin, thiante thatna leh felna han sawi ila; min bawl an ti nghal ngawt zel thin a. Duh ang pawh min sawi tir ngam lo fo. Hun a kal zel a, bawl tih tawngkam chu a hluar tial tial lehnghal em maw ni?! Bawl tak tak nge, bawl lem lem tih pawh thliarhran a har ta lek lek mai.

La ta deuh deuh chuan. Thian thenkhat ten an mawhphurhna hlen thain emaw, fel leh entawntlak takin khawtlang leh kohhran, chhungkaw tan theihtawp an chhuah. An thian leh rual hnai ten an nihna sawia an han fak changin, Khai khai, min fak-ar-ek ziah, a tak take maw ka ti palh ang e kan ti duh lek chauh thin. Mizo tlawmngaihnain a ken tel zinga tullo ka tih tak ve mai mai chu, min duhsaktu ten thil engemaw min hlan emaw pek dawn a, intihtlawmgngaih avanga lak duh loh emaw hnial fithla-thak mai te hi. A dik ber em le? ka hre law. Enge in ngaihdan? Kum a vei ta deuh. Aizawl city bus ka chuan zin lai khan, upa leh hmeichhe chaklo thenkhat te, tlawmngai takin thutna kan han kian a. Kan kian laklawh tawh hnua, intitlawmngaia thu duh miah lo an awm khan, a kiantu tan awmdan hriatthiam a har lek lek thin. Min tlawmngaia thutna min ken chuan, ka lawm e, tia thut mai tur a ni dawn lom ni. Thutna kan kena, thutna chuhhelh ta reng reng vai an thut tharh chang pawh a awm fo kha maw le. Khawte pastor Tlangval thenkhat, smart taka incheiin inkhawm emaw thiltihhonaah a rawn kal a. Incheina hun hun leh a hmun hriat hi a pawimawh teh meuh mai. Mahse, a lo a luat a, an inthuamna tiel emaw zawng a, e nang chu khawte pastor ang zaih I ni mai an han ti hram te hi, a tul lo ka va ti mai mai tak. Fiamthu ka hua tihna a ni law. Thumahnaw inbeltu tan pawha nuam lo vawng vawng khawpa lo fiam erh ai chuan, vawiin chu I nalh hle mai te maw han ti mai se, hriat a nuam zawk daih awm si a. (Phek hnihna ah chhunzawmna)

Vol. XVIII Issue No. 25 Bangalore Mizo Association Pathianni Nitin Chhuak Chanchinbu Date: 16th Sep., 2012 Phek Hnihna
Editor Tv. Lalmuanzuala Joint Editors Dr. Lalhmingmuana Sailo Tv. MC Zirsangzela Circulation Managers Nl. Lalchhanhimi Nl. Lalngaihsaki Hnamte BMA AW lak man: Thla khat Rs.20 Thla thum Rs.50 Thla ruk Rs.90 Thla sawmpahnih Rs.180

(Phek khatna chhunzawmna) Mitin hian kan phak tawk theuha tha ber leh mawi ber turin kan nihna leh kan inthuamna te lantir hram hram kan tum vek ti ila, kan daw kher lovang. Mize uchuak leh inthuamna leplerh leh over zawng a awm ngei e. Mahse, vantlangin kan pawmtlana tha leh fel, awmdan mawi leh khawsak tha te hi chu, fakin chawimawi dan I thiam ang u. Eng a nih bik loh nen, ve leh ringawt chuan ti tea kan tawng chhuak fo mai te hi, inenchian a tul lo maw? Piangthar Misual tak nia kan hriat leh, vantlang pawn kan ei loh em em thin chu, Pathianah lawmna changin a hlim em em a. A van lawmpuiawm tak em! ti lova, ani leh ngawt thin hi, a zak thei lo ngawt mai. A duh hun hunah hian a rawn piangthar a, te kan han ti mai thin a. Kan sawi tur a ni miah lo. Ka sawi duh ber chu; kan zilha kan fuih thei a nih ngawt loh chuan, ralkhat atang mi nun tha lo leh fellohna ringawt kan sawi fo hian, a tuartu leh rilru hah chu keini bak kan ni lo mai thei. Tin, kan relna tawngkam chhuakin, kan relte beng a thlen ngat phei chuan, boruak tha lo tak a chawkchhuak thei leh nghal. Ti zawk hian le Khawizu thlum tak siamchhuak turin, khuai hian pangpar zu dawt kualin, hmun hla tak tak thlawkin, pangpar sang tam tak a tlawh thin. A parzu a hip hnu chuan, eng dang ngaihtuah lovin, an bu lamah a thlawk haw vang vang a. Hun a lo ral chuan, khawizu thlum tak an siamchhuak thin. Kan tawngkam chhuak te hi, midangte tan hriat nuam leh lawmtlak ni fo se la, hringnun kan khualzinna kawng hi a nuamin a va hahdam dawn tak em! -Dr. Mahminga Sailo ***********************************************************

E-mail: bmanews@gmail.com Website: www.bangaloremizo.info

Editorial
Tunlai khawvel ah information technology nasa takin a thang tih kan hre theuh awm e, keini hmarchhak mite pawh khawvelin min rawn hre chho ve zela. Tun hnai kan boruak atang ringawt pawh hian mi tamtak, a hma a Mizo tih tawngkam pawh hre ngailo ten min rawn hriat belh zela. National news paper ah te hial pawh thenkhat, Mizorama lo awm tawh te leh Mizoram chanchin hre deuh ten keini Mizo te min hmuh dan te an rawn ziak anih kha. Heng an ngaihdan an rawn ziahte atanga thil hriat nuam deuh chu, mizote chu dik leh rinawm, in tanpui tawn thin, anga min rawn la hmu te, Mizoramah kut dawh an awmlo, chutiang ngai khawpa chan chhia an awm chu mizo society in a phallo a, an tanpui mai thin. Ti a thenkhat in an sawi tehi anni tih kan pawm tlang vekin a rinawm. Amaherawh chu kan nihna kan hre tlang vek anga khawvel changkanna kan chhim rualin sualna pawh alo pung chho ve zela, tlawmngaihna te leh zonunmawi ten chuai lam an pan mek ani. Chutih laiin khawvel hmun danga hnam tin ten a hnam ang zawnga an brand neih phak loh, zonunmawi kan tih mai, tlawmngaihna te, rinawmna te dikna te, nei anga min la hmutu an awm te hi a lawmawm takzet ani He zonunmawi hi khawvel hriat a kan brand ni thei se a duhawm takzet a, chumi ti hlawhtling tur chuan keimahni theuhin mawh kan phur tih I hre tlang theuh ang u.

North East Welfare Association

1st September khan Mizoram House ah hmarchhak state pariat atanga representative pali theuh kal khawm chuan North East Welfare Association hruaitu tur te thlanna an neia. Chung an thlan chhuah te chu a hnuaia kan han tarlan tehi anni. President - Mr. Vezokho Resu(NSU's President), Nagaland. Vice President - Mrs. Lalrinpuii(BMA's President), Mizoram. Gen. Secretary - Jangkholen Singson (KSU's President), Manipur. Asst. Gen. Secy - Lawrence Sumer, Meghalaya. Treasurer - From Assam Society of Bangalore . Finance Secretary - Tuklen Dupak (AASUAK's Sr. Advisor), Arunachal Heng representative pali theuh kal khawm tehi executive committee members anni nghal a. Mizoram atanga representatives te chu heng tehi anni. Pi. Lalrinpuii, Tv. Emanuel Lallawmkima, Nl. Jenny JJ Vanlalpari leh Tv. K.Remruatfela.