ZAM Hotline 016-293 9027 ZAM Office 03-2142 6659

Email: zomiassociationmls@gmail.com

Volume 8, Issue 2 June 16, 2013 Eite ihih leh vantung gam mite ihi a, vantung panin a hong pai ding Topa Jesuh a ngakte ihi hi. Philippians 3:20 2013 - 2014 ZAM Palai ki teelvai Election Committee tungpan pulakna
Date: 07 June 2013

Election Committee: 1) Rev. Dr. Cin Sian Pau (Convener) 2) Rev. Thawng Ngaih Khup 3) Rev. Pau Cin Thang 4) Pa Dai Za Kam 5) Sia Francis Do Lian Kham 6) Pa Gin Khua Thawng 7) Rev. Suan Cin Hau Election Committee mi 7 te tutmun lakna leh maitang lahna hun kinei masa a, Rev. Dr. Cin Sian Pau (Convener) in hun hong makaih hi. Abeisa kivai puakzia leh makai dinmun pulakna hongneih khitciang in Rev. Thawng Ngaih Khup thungetna tawh hun kipanto hi. ZAM palai telcing dingte min sazian simna, maitang kilahna leh Qualification, Experience pulakna Rev. Pau Cin Thang in hong makaih hi. Telcing Candidate avek in mi 17 ki pha hi. ZAM 2013-2014 ading palai Mee piakdan leh piakzahding tawh kisai thukhunte pulakna Rev. Dr. Cin Sian Pau (Convener) in pulakna hun hongnei hi. Pawlpi upa panin Mee piading a hongpai te min sazian, khua makai pan hongpai te min sazian leh Candidate te min sazian simkhiatna Rev. Suan Cin Hau in hongnei hi. Mipi avekpi in 150 val lak ah Mee khiatheiding akigawm in mi 80 kipha hi. Mee tang khia mi 80 lakpan Mee tang 3 khialhna om ahih manin, ki hemkhia a, Mee tang vekpi 77 tawh thu kikhen hi.

Rev. Pau Cin Thang in Mee tang simkhiatna hun hong makaih to a, Rev. Suan Cin Hau in Tally tawh hong ciaptehsak in, Sia Gin Khan En in Computer tawh hong ciamtehsak a mipi muhding in PowerPoint ah ki suaksak pahpah hi. Sianu Rin En Cing leh Ning Ngaih Hau te Mee tang kikimlian ahih manin, Mee ki sawksak a, Sianu Ning Ngaih Hau in numei makai hong ngahkhia hi. ZAM 2013-2014 Palai ding teelcing te min sazian leh Office Bearer kitelna anuai abang ahihi. 1. Hau Suan Khai President 2. Kam Lian Mung Vice President 3. Joseph Mangsen General Secretary 4. Khoi Tuang Assist. Secretary 5. Joseph Kam Tung Sang Treasurer 6. David Mungno Accountant 7. Joseph Tuangpu Intervention 8. Thaa Mung Intervention 9. Kep Lian Healthcare 10. Mangpu Outreach 11. Ngaih Hau ZWO President ZAM 2013-2014 Executive Committee 11 teng kamciamna Rev. Dr. Cin Sian Pau (Convener) in simkhiatna leh kam kizuihsakna hong makaih hi. Pasian nasem sia khempeuh ZAM Executive Committee thakte thungetsakna aki neihkhit ciangin Rev. Dr. Cin Sian Pau (Convener) thupha piakna tawh hun ki khak hi. Thu ciamteh: Sia Kham Ngaih Langh & Sia Gin Khua Thawng Election Committee

ZAM ZUM HON HUN: 1). Monday - Saturday: 9:00 am - 5:00 pm. 2). Sunday: 10:00 am - 12:00 noon. 3). Lunch Time: 12:00 noon - 1:00 pm. 4). Public Holiday: Zum kikhaklo hi.
Kalsim in aki hawmkhia ZAM Thupuak pen leitung muntuamtuam aom Zomi khempeuh in asimtheih dingin www.zomidaily.com website ah ki koihden hi. Email tawh adeihten zong zomiassociationmls@gmail.com ah ki ngenthei hi.

ZAM Palai te nasep pulakna Bandar Tasik Selatan Bus Stand pan 04 June 2013 ni in akiman ahi Paul Khup Sian Tung (Thaangzang) leh Cin Sian Piang te vai kivanpih a, 12 June 2013 ni in hong suaktathei uhhi. Cheras Bus Stand pan 08 June 2013 ni in akiman ahi Thang Thawh Khai (Ngalzang) leh Tang Khan Dim te tuanitak mahin asuahtaktheih nading in ki vaihawmpih theihi. Sunway Mentari Court pan 12 June 2013 ni in akiman Lang Tung Mang pen tuanitak mahin asuahtaktheih nading in ki vaihawmpih theihi. Damlohna tawh UKM zato ah alum ahi Cing Sian Huai (Singunau) pen asumpiakding RM4759 tak hongtun ciangin IAD Dept ah huhna ki ngetsak a, RM4600 ki ngahsak hi. Damiah tuak Zangtui khuami khat 08 June 2013 ni in Taxi hawl migilo te khutsungpan ki honkhiazo hi. JPN ah Dim Khan Mang (Tungzang) ading in Immigration vai ki vanpih hi. Balai Police ah Kham Suan Piang (Pyidawtha) kimat kihenvai tawh kisai athu ala ki vanpih hi. Zato ah ninih nithum tabang aki buaipih pawlkhat: Ngai Cing (Phaiza) Thang Lam Cing (Laibung) En Lian Mang (Vaivet) Ciin Muan Ciang (Saizang) Niang Muan Nem (Tuimang) Magaret Mang (Tonzang) Suan Kap Thang (Khuadam) Cing Lun Ciin (Dimlo) Kham Sian Piang (Pyidawtha) Dim Sian Nuam(Tungzang) Khai Deih Piang (New Darkhai) KL Kotaraya kuamsung ah abeisa 05 June 2013 ni in Operasi honglut ciangin ZAM Card tawi Zomi 27 bangin mat nathuak uhhi. Tuate avek in ki kankhia khin a, mi 9 pen Bukit Jalil Immigration Lockup ah ki puakhin a, UN te lakkhiatding bek aki ngaklai ahihi. Adang mi 18 pen Jalan Duta Immigration Lockup ah omlai uhhi. Bukit Jalil Immigration Lockup ah aom sanggamte: Min Thang Neng Cin Tuang Kam Sian Mang Mang Pi Tuang Suan Mung Piang Sian Mang Niang Huai Lun Mung Khan Piang Khan Sian Piang Jalan Duta Immigration Lockup ah aom sanggamte: Dai Thah Lian Mang Dik Mung Langh Sian KhaiMung Pi Mung Ngaih Kham Mung Muan Cin Cin Sum Cin Sian Piang Lian Khan Cin Hau Sian Lal Lang Khua Hau Cin Khan Thawn Cin Tuan Sum Pau Sawm Sing Kim Lian ThangTual Min Thang Thang Sawm Pau Thang Khan Mung Taxi tungah Damiah atuak Zangtui khuami khat Abeisa Saturday (June 08, 2013) ni in Zangtui khuami pasal khat Puchong pan in Taxi saapin Kuala Lumpur manawh in apailaitak, Kuala Lumpur atunma in Taxi hawlpan a Phone, Sumbawm leh UN Card teng nasuhsak a, amizong nakemsuak hi. Ih sanggampa zong inn atuntheihloh ciangin atanau te'n ZAM palai Sia Tuangpu na hopihpah a, anunung ah sanggampa pen RM1500 tawh Taxi hawl migilo te kiangpan in ki honkhiazo hi. Malaysia gamsung ah Taxi natuanciang kidawm mahmah in. Taxi hawl Kala mivomnam ahihleh tuangkei zawmai in. Numei khatguak zong Taxi tuanhuai hetlo hi. Sum tam napuakleh Taxi hawlte musak hetkei in. Na tuanna Taxi Number zong hoihtak ciamteh hamtang in. Sia Kap Lian (ZAM & ZSM Palai) Pahtawina Malaysia gamsung aom Zomi khempeuh lakah ZSM akici

Zomi Social-Welfare of Malaysia ahih keileh Zomi Genvai kipawlna atheilo lawmlawm Zomi omkhollo khadinga, atheilo aom zawzen lehzong tam hetlo khadinghi. Tua ZSM athei khempeuh inzong Sia Kap Lian amungei keiphial uhlehzong aminbeek zakha ngei hamtang khading uhhi. Siapa athei ngeilo, amin a zakha ngeilo leh amukha ngeilo tepen Zomi te sihvuina ah ki helngeilo cihtheihphial hong hileuleu dinghi. Banghanghiam cihleh Sia Kap pen Malaysia aom Zomi asi te kivuina ah atamvei akihel penpen zong hipah khading hi. Adiakdiak in Malaysia gamsung ah ZSM kipat akipan Zomi misi khat aom nakleh sihvuina ah aki helkhakei phialzong in, UNHCR, Police, hanmual vai, Bus vai cihbang in ZSM thuvanpi ahihi. Sia Kap Lian (Kap Lian Thang) pen Cikha khuami hi a, Malaysia gamsung alutcilni akipan Malaysia gamsung pan apusuahkik nidong ZAM kici Zomi Association of Malaysia ah hunbit palai leh Zomi Genvai (ZSM) ahzong hunbit in aki piakhiaden khat ahihi. Tuapa (Sia Kap Lian) in June 05, 2013 ni in Malaysia pan USA gam hong lensanta a, tu'n Oregon State, Portland khuapi ah cidam in tungkhinzo ahih manin ih lungdampih mahmah hi. Malaysia gamsung ah Sia Kap Lian aom sungin Zomi te ading asepkhiat khempeuh gelhkhiading hilehang laisimte'n simzoloding ahih manin, atomkim in hihteng konggelhpak uh ahihi. Adiakdiak in Malaysia gamsung alutcilni akipan alen khiatkik nidong kum 4 sungbang Zomi te adingin hunbit palai asem te lakah khat ahih manin Malaysia aom Zomi khempeuh aitang in zahtakna leh pahtawina in hihlai konggelhkhia uhhi. HEI Local Company pan thuhilhna omding :: June 17 Monday ni sun nai 1pm hunin ZAM zumpi ah atom in HEI akici (Health Equity Initiatives) Local Company khatpan thuhilhna hongneiding uhhi. Adiakdiak in Malaysia gamsung ah haksakna khatpeuh (gtn: Kotaraya sungah van leikhial, kikhem) ihtuah ciangin bangci kualsuanding cihleh ngaihsut masakding thu pawlkhat hong hilhsawnnuam uh ahih manin Zomi ahithei khempeuh ki heltheihsawm ciatni. ZAM palai te lungdamkoh thunget khopna :: 14 June nitak 5pm hunin ZAM palai tengin Zomi Ebenezer pawlpikem Rev. Zam Khan Sang tawh khasim in aki neizel Palai te lungdamkoh thunget khopna hunkhat ki neikhawm thei hi. Laisiangtho John 6:35, John 4:34, Gen 2:2, Mk 6:31, Lk 14:28 munte bulphuh in Leadership tawh kisai Zeisu in anungzui te leh mipi amakaihzia thumanpha tampi hong hawm sawn a, tha ki ngah mahmah hi. Dahpihna :: Ngalzang khuami Pa Langh Khaw Thang leh Nu Dim Za Vung te tapa Tg. Pau Khan Khual (kum 29, Samte beh) in Chow Kit General Hospital, Kuala Lumpur panin June 12, 2013 ni in cisanak damlohna tawh hong nusia hi. ZSM Member khat ahih mahbang in hong nusiat akipan Police Station leh UNHCR zumte ah athu ala akisam khempeuh ZSM palai te'n vaihawmsakpah a, ahanmualding zong ahunlap in ngahsakpah uhhi. 14 June 2013 ni in Shah Alam hanmual ah nawngkaina omlo in ki vuithei hi.

OPE panin Go Sawm Tung (791-09C17486) Contact ngahlo uh a, ZAM ah hong zasak hi. Atheikha peuhin amanlang in nagen sawn un!