SIMEIKHU KARTIN CHHUAK THINGSULTHLIAH

Dt. 5 October 2013 (INRINNI) PHEK- 3

MLA INTHLANNA TUR ATANA INBUATSAIHNA Kumin 2013 kumtawp lama Mizoram MLA Inthlan turah inbuatsaihna kalpui mek zel a ni a. Hemi atan hian Election Training pawh vawi engemaw zat neih a ni tawh a ni. Mizoram MLA Election-ah hian candidate tin te chu Cheng Nuai 8 aia tam hmang lo turin Election Commission chuan a hriattir a. Hemi vengtu tur hian Team hrang hrang te siam niin training pawh pek an ni hlawm tawh a ni. Training hi la neih leh a ni mai thei bawk a ni. Tawi Constituency huam chhunga Team hrang hrang duty tur ruat zingah kan sub-town atanga tel te chu heng a hnuaia mite hi an ni:1. Flying Squad Team : Pu Zothanmawia Khiangte, BDO hi Magistrate ni nghalin a hnuaiah Senior Police Office leh Armed Police personnel 2 emaw 3 emaw an awm ang a, Videographer pakhat awm telin Thingsulthliah, Tlangnuam, Seling leh Tuikhurhlu te an vil dawn a ni. Tawi Bial chhungah hian Flying squad team hmun thumah siam a ni. 2. Static Surveillance Team : Tawi huam chhungah hian SST hi hmun thumah siam a ni a. Chung zinga Team pakhatah Pu Khawlsiamthanga, Principal, ETC, SIRD chu Team Leader niin Saitual, Keifang, Rulchawm leh Ruallung te an bial ang a; a hnuaiah hian Police personnel 3 an awm ang. SST team dang lehah chuan Pu MS Dawngliana, AEO, Thingsulthliah chu Team Leader niin Thingsulthliah, Tlangnuam, Seling leh Tuikhurhlu te an vil ang a, a hnuaiah hian Police 3 an awm bawk ang. SST hian an duhna hmun apiangah Check-post siamin an rinhlelh deuh chu an lo check ang a, sum tam tham deuh emaw ruihhlo emaw silai leh ralthuam dang keng te chu an man thei dawn a ni. 3. Video Surveillance Team : Tawi huam chhungah VST hi team 3 siam a ni a; Team khatna-ah chuan Pu H.Malsawmtluanga D/A, Pu ST Zohmingliana D/A leh Pu H.Lalrochama, Saitual te an awm ang a, Saitual, Keifang, Rulchawm leh Ruallung te an tuam ang. Team dang pakhat lehah chuan Pu Robert Lalnuntluanga, APO, Pu C.Lalhriatkima leh Pu Lalthanmawia (BDO Office ami te) an ni ang. Anni hian Thingsulthliah, Tlangnuam, Seling leh Tuikhurhlu te an bial ang. VST te hian Inthlan kaihhnawih thil reng reng te Video-in thla an lo la thin dawn a ni.
4. Video Viewing Team : Tawi Constituency chhungah hian VVT team khat siam a ni a, Pu K.Lalbuatsaiha, ETC, SIRD bakah John Lalramchuana D/A (BDO Office) leh Rodailova Pachuau, Saitual te an awm a. Video Surveillance Team te video thlalak an dawn te chu an lo enfel thin dawn a ni. 5. Accounting Team : Hei pawh hi Tawi Constituency chhungah team khat siam a ni a; Tawi-ah hian Pu Ropianga, APO, Saitual leh Pu Thangmawia,Tlangnuam(BDO Office) te an awm ang. Anni hian Report an dawn ang zelin Candidate te expenditure an lo chhut thin ang a, Asst. Expenditure Observer hnuaiah hna an thawk thin ang. Note : A chunga kan tarlan te hi Tawi huam chhunga Team hrang hrang Election atana training nei tawh te chauh an ni a, an hnathawh tur hi a tlangpui chauhin kan rawn tarlang a ni. BOOTH LEVEL OFFICERS : MLA Inthlan hunah BLO te hi anmahni Polling Station-ah theuh Station Officer-in an awm dawn a, training pawh an nei tawh a ni. Inthlan neih hma kar khat chhungin Voters List In tinah kalin an sem ang a, Vote thlak ni-ah Polling party te an pui bawk ang. Polling party te lo dawngsawngtu an ni ang a, an riahna leh ei leh in tur an lo buaipui sak bawk ang.

A LO NIH TAK CHU AN TI - Mitthi vuina kawnga kalte thawm hi Committee bang thawm a ang an ti. - Khawhar inah hian hnawmhnawk a tam leh tan tawh an ti. - Mi changkang apiangin Faina hi an ngai pawimawh an ti. - Pasal nei tawh si, Mobile Handset a SMS hmet peih deuh te hian ngaih an ti tha lo an ti. - Khaw chhung cheina hi H/A Vengsang leh Salem Veng te hian an dawng tlem an ti. - Khaw chhak Film Mizo tawnga lehlin tam lutuk hi thenkhat ten khawchhak lungpui lo lum tur an hlauh em em kha a ni thei ang em an ti. -Khawhar ina nula tlangval senior an kal that hian zai a nuam an ti. - Khawhar ina bengchheng, mahni inthunun thei vak lo te hi kum 20 hnuailam an ni deuh zel an ti. - Anganwadi Nutrition sem hi naupang aiin puitlingin an ngeih zawk deuh zel an ti. - Nula Tlangval senior kan tihte hi an duh reng vanga senior an ni bik lo an ti. - Zu check hi a tha, mahse kan ti mah mah ang tih a hlauhawm an ti. - Khaw Fai lawmman kan dawng tawh a, mahse kan khua hi a bal deuh tan an ti. - Sikul naupang nisi, zirlai ni peih silote hi khawtlang tan an chhawr tlak lovang an ti. - Zu a van deuh hian ruih tur thil dang dap ruai ching an awm an ti. - Tlang ruai siamna a Ajinomoto telh hian mi thenkhat tan harsatna lian tak a thlen thin an ti. JUBILEE PROGRAMME SIAM Tunkar thawhleh zan khan Govt. Tst High School Golden Jubilee Organising Committee te an thukhawm a. Programme subcommittee ten Programme an duan te chu thlirho a ni a, siamthat leh belh ngai te siamthain programme tlangpui chu peihfel a ni. Tarlan tawh angin Golden Jubilee hi ni 11 & 12 Dec 2013-ah lawm tum a ni a, Jubilee Monument pawh peihfel ni tawhin Sikul tualah phun a ni tawh a ni. Tun thla chhung hian Souvenir pawh peihfel tum niin November thlaah chhut turin Press-ah pek tum a ni.

BLO RUAT THAR : Pu H.Malsawmtluanga, Thingsulthliah-III(Camp Area) BLO chu Video Surveillance Team-ah ruat anih avangin a aiah Pu Lalthanzama, DO thin chu tun Inthlan vuakvet chhung atan BLOah ruat thar a ni.