Atomic bomb sertu, a ngeitu ram hna le nihin vawlei dirhmun by si bawi mang lian

Atomic Bomb Sertu, A Ngeitu Ram Hna le Vawlei Dirhmun

by Si Bawi Mang Lian 09 April 2013

Tu kum chung ah vawleipi nih i buaipi ding mi cu Asia nichuahlei hi a si lai, tiah 2013 thawk thla ah ka rak ial bal, le atu hi Korea ral kong ah vawlei a thin ai domh taktak lio a si. Zeitluk in Korea ral kong ah an buai ti ahcun nitin a rammi a that cuahmahtu Syria president le a ram buainak kha an philh i Korea ral kong ah an hna an tun dih. Syria cozah nih caan rem i lak in a ram minung cu a phomh cuahmah rih ko hna. Mah hi vawleicung politics cu a si. Acheu nih USA politics a si ko, an ti nain vawleicung ram vialte nih hna tunh lo le ruah lo awk a ha lomi thil pakhat kan zapi duh/buaipimi (interest) cu Atomic Bomb hi a si. Cucu North Korea nih ka hman lai a ti caah a hman taktak sual lai timi kha Asia ram vialte le vawleicung minung nih an phan tukmi a si. Hi cabia ahhin Atomic Bomb cu zeidah a si? Honihdah a rak ser? Zeitik indah an ser i an hmang bal? Zei ram dah Atomic bomb tambik a ngei? timi tawi tak tein a langhter lai. Natural science cawngmi ka si lo pinah laiholh in a um lomi a tam caah a ruah zia van thiam sawh te u tiah kan nawl hmasa hna. Atomic cu bomb phunkhat a si le nuclear le atomic bomb tiah kawh an si. An thazang ai tluk ko nain atomic bomb cu fission timi uranium siloah plutonium in sermi a si. Nuclear cu fusion a si i hydrogen in ser mi a si. Atomic cu thazang a tthawng tukmi a si caah voi khat a puah ahhin avelchum a simi meng tamtuk tiang a hrawh in a khangh khawh dih. Atomic bomb hi rocket a lupar zong ah khin an bunh i vanlawng in thlak ding zongah an bunh khawh. Asinain nuclear cu electric thazang petu zong ah hman khawh a si i a umhmun in a puak kho (an 2 in puak kho ko.), a puah ahcun atomic a si ve caah fak tuk in a puak kho i thil a hrawh khawh.

Atomic bomb sertu, a ngeitu ram hna le nihin vawlei dirhmun by si bawi mang lian

Cu pinah chesmistry le biology ai tel tikah kum tam tuk tiang a khuvai nih zawtnak le nauchuak pum tlamtlin lonak a chuahter. Mah tluk in ih a nungmi thilri cu hodah ser a rak thawk, timi hi mi tampi nih an halmi a si. A sertu min van chim hlan ah, USA nih hin USdollar 70billion lengmang Federal funding of science timi caah an hman. Mah cu USA i pa, nu le ngakchia nih kum khat ah $250 cio an ei khawh dingmi phaisa a si. Cu bantuk in ram tampi nih mah hi Atomic/nuclear sernak dingah phaisa tamtuk an hman i an rammi ei awk ngei lo in an chiah hna. North Korea, Iran, Russia le China hi minlang an si. Cu lio ah Myanmar zong cu a rak itel ve, an ngei kho tak rih lo nain ser ai timhnak ah tamtuk a rak dih. Mah tluk in a mitcaw i ih a nungmi thilri, cu khuaruahhar thilte cu ralpi pahnihnak lio ah Manhattan Project timi in a hrambunh in ser thawk a rak si i Atomic Bomb ser thawknak ti a hung si. Mah cu USA nih a rak hruai i United Kingdom le Canada nih an rak bawmh i 1942 in 1946 tiang hi biapi in an rak tuah ti a si, nain a project hi cu 1939 in a rak i thawk cang. Asinain biahal awk a ummi cu Atomic le Nuclear hi ahodah a rak hmu/sertu (inventor) a rak si, timi hi a si. A hmu hmasatu taktak a um ko ti a fian caah aho cu dah a si? timi naih deuh in, a tawinak in kan van zoh hna lai. Atomic bomb sertu taktak cu hodah a si tiah an hal tawn ah an chim ciomi hna chung in minung hna cu; Robert Oppenheimer hi atomic sertu ti ahcun chimbik mi a si. Amah hi theoretical physicist leiah minthang tuk a rak si i a hnu cun Manhattan Project ah biapi bik a rak si, nain mahhi bomb hi a sertu a rak si lo. Voi khat 1939 ah Oppenheimer cu uranium an i cheu/tthen tiah an rak chimh, ifonh lo in an ithlah ti a rak si. Mah cu suimilam pakhat chung fiang tuk in a si khawh lonak kha a rak chimh hna. Ahnu in cun el khawh a si lomi tehte pakhat ruangah a lung a rak ithleng. Atomic bomb Manhattan Project nih a van lim tikah a rak chimmi bia cu Atu cu mithi ka si cang a ti i a pehmi cu Vawlei hrawktu kan si. ti a si. Cun amah hi a thawktu a rak si lo timi tu cu a fiannak a tangah na rel khawh rih lai. 1888 ah Germany in USA ah a rak pemmi chungkhar in a chuakmi a si. Enrico Fermi hi Nobel Prize zong pek vemi a si i atomic kong ah cun a min chim bik a si ve. Italy miphun a si, 1944 in US rammi sinak a rak ingeih chih. Uni. of Chicago ah physicist a rak si i Atomic Bomb sertu he rianuan ding in rak thimmi pa a si. Tuandeuh pa he khan Manhattan Project ah an rak uani. Fermi zong Robert bantuk in Uranium an i cheu tiah an chimh ve, cun Rabi nih atomic bomb puah khawhnak le a thazang kong bia a rak halmi ha in a rak let kho lo, ti a si. Mah cu nih a fianhmi cu amah cu hi bomb sertu tak a si lo, ti a si ko. Albert Einstein hi a sertu tiah kan theih bik men ko lai, aruang cu Israel miphun nih an ser khawh i USA le UK nih Israel cu nihin tiang an bawmh hna, ti leiin kan theih caah a si. Cu pinah amah cu physicist lakah minthang bik E=mc2 a rak chuah khotu a si i E=mc2 cu atomic bomb le nuclear sernak ah an hmanmi a si. 1939 ah amah sermi formula: E=mc2 in atomic bomb ser khawh a si, tiah a chimtu a rak um nain physic ah minthang taktak Einstein nih a rak chimmi cu; Daran habe ich gar nicht gedaht Mah cu ka rak ruat bal lo, I havn`t though of

Atomic bomb sertu, a ngeitu ram hna le nihin vawlei dirhmun by si bawi mang lian

that at all. a rak ti. Einstein nih mah hi bomb a rak ser lo. Bawmtu cu a rak si i bawmtu bik a si. Lord Rutherford hi a sertu ah a ruatmi cu an um ve. Physic ah min ngei a rak si ve i 1934 ah ca a rak chimh lio ah Mass E=mc2 hi E nergy ah thlen khawh a si maw, tiah an rak hal. A rak lehmi hna cu a si kho tiah a chimtu cu bialo a chimmi minal an si lai, ti a rak si. Lord cu the great establishment physicist an timi a si, nain amah hi bomb sertu a rak si lo. Asinain Lord cu hi bomb sernak ding ah a rak biapi tukmi pa tu a rak si. Acung i chimmi hna hi minthang physician lawngte an si i 1939 in science a dirhtu ti an rak si. Asinain anmah chung in pakhat hmanh nih Mass E=mc2 kha fission a siloah phun dang zong in thazaang E(energy) ah thlen khawhnak an rak hmu kho lo. Mah hi a thei hmasabik tu i a rak hmuh hmasabik lio hrim in a ruah awk an rak thei lo. Fission (radioactive ti zong si) le atomic bomb le nuclear reactor kong a rak ruah hmasatbik hi 1934 ah a si mah bantuk kaupi in khua a rak ruat khotu cu physicist a si ve nain 1940 tiang hi caantling rian a rak ngei kho lo, i a nun caan tamdeuh cu Germany in Israel miphun pawl chuah khawhnak ding a rak izuam pengtu a rak si. Cu pa cu Leo Szilard a si i atomic bomb sertu taktak a si lawng si loin in a sermi cungah rian lian tuk a rak i khinhtu a si. Atomic bomb a ser hnu 1944 in a thih kum 1964 tiang hi atomic-ral a chuah lo nak ding caah a caan vialte a rak hman, atomic-ral chuak lo ding in a rak chimrel i rian a rak uan. Acung ah Lord Rutherford cu atom bomb sernak ah a biapibik bawmtu a si, ti kan rel khawh. 1934 kum i Lord Rutherford ca a chimh lio ah an rak halmi a lehmi hna thil-hlum pakhat kha thazang (mass to energy) ah thlen khawh a si lai a titu cu bialo a chimmi minal a rak timi kha Leo Szilard nih a rak theih ve. Mah cu nih cun a lung a rak tuai. Leo nih mah cu kong cu a ruat peng, i zarh tlawmpal hnu London Street i ai chawh lio ah a rak ifianmi cu nucleus pakhat khi neutron he an i pah tikah an i hek i an pawng i a dang atom pawl zong an hekter hna ti a si. Mah cu nih cincik bantuk in ai pehmi atom billion khat cu second pakhat hlan ah an ihek lai timi a rak hmuhter. Mah cu tin atomic bomb puah khawh ding kha a cung i chimmi minung pawl hlan kum nga lio ah a rak hmuh cang (1939 lawng ah Manhattan project kha dirh a si cu mu). Rutherford nih nih mass cu energy ah thlen khawh a si lai lo, a rak timi hi bawmtu taktak a rak sinak cu a si. Acung minung hna bia haltu kha Leo a si. Le hi vial hi a sertu hna le an rak ibawmh ning a tawinak cu siseh law, Atomic bomb le nuclear sertu taktak Israel miphun Leo Szilard kong zong ial ahcun a sau ngai lai caah hi vial in Atomic bomb an hman hmasatbik nak lei ah kan van pial lai. 1944 ah Atomic bomb cu an rak ser khawh cang. An sermi a ha maw, zeitluk indah a hawn taktak timi rak hniksak a herh. Cucaah an rak i thawh i 1945 july 16 ah avoi khatnak bik atomic bomb hniksaknak cu New Mexico ah an rak tuah. A serning le an ruahning bantuk a rak si. Mah cu an hniksakmi a min cu Trinity tiah a min an rak pek. Cun mah cu ni cu Atomicage ai thawk ni tiah nihin tiang theih a si. Mah cu hnu cun voi tam tuk hniksaknak an rak tuah.

Atomic bomb sertu, a ngeitu ram hna le nihin vawlei dirhmun by si bawi mang lian

1945 july thla ah avoi khatnak an rak hniksak le cu kum lila ah USA nih Japan ah atomic bomb an rak thlak. Mah cucu avoi khatnak bik minung thahnak le raltuknak ah an rak hman a si. Pahnih an rak thlak i a pakhatnak cu 1945 august 6, Japan caan zinglei 2:45 ah Hiroshima khua pi ah an rak thlak le an chim hell bantuk in a rak lin, ti a si. A tha a rak hawn tuk tikah tidil tiang in an rak alh i minung nih celh lo in a thimi hi 1976 i UN chimning in 150000 an si tiah theih a si. Hiroshima cu ruah a sur tikah vutcam le meihol hang in a sur, an rak ti. Japan nih Pearl Harbor a rak phomh ve ning a fah tuk caah USA nih isum kho lo in ni hnih a rauh hnu 1945 august 9 ah Nagasaki khua ah atomic bomb cu an rak thlak han. Mah cu ni cu Japan caan in zinglei suimilam 11:02 ah a rak si minung 70000 leng an rak thi. Asinain mahhi atomic bomb khuvai nih kum tamtuk te a rak zelh hna i mah cu kum hnu ah a thimi an rak tam han pinah pumtling lo a chuakmi an rak tam, ti a si. Mah cu a si tikah a sertu a simi Leo Szilard nih atomic ral a chuak sual lai timi le atomic bomb hmang in ral kan tho sual lai timi hi a rak phang tuk i a nun caan a tangmi cu atomic-ral chuah lo ding ah rian a rak uan cu a si. Amah bantuk in a sermi cungah rian ai khinh hanmi hi sertu dirhmun taktak cu a si, tiah fak le thangtthat a rak tong tuk. Atom ral chuah lai phan zong cu, mah ti USA nih atomb a rak ser thawk tikah ram kip nih rak theih a si ve le Russia, France, United Kingdom te hna nih an rak iser ve cang caah a si. Leo thih hlan ah WWII kha a rak dih tikah Russia le USA cu cold war in an rak itawng peng hiam rih i atomic bomb hmang in an rak i er kha a si. 1962 ah Cuba crisis a rak chuak le atomic bomb an rak puah lo lawng a rak si. Russia nih rocket in atomic bomb an rak kah hrulh nain mah cu lio i ralbawi pakhat nih thawng a theihmi fak deuh in a rak ruah hmasa i atomic bomb a simi rocket kahnak hmeh ding hmet lo in a rak hngah caah an rak dai. Thawngpang deu a rak si, ti an theih han i kum 40 a rauh hnu naite ah raldaihnak minhatnak laksawng zong Germany nih an pek. Cuba crisis hnu in ih a nungbik Atomic-bomb in an i tlerhkhonhnak cu atu Korea ral hi a si. North Korea hi South Korea he an itthen hnu in anih cu communist a si tikah USA cu a ral bak a si ve. South Korea kha USA nih a rak dirpi. Communist ram pawl le ralkap uknak a hmangmi rampawl he lawng ai kommi a si. A ram chung phaisa le minung vialte kum 60 chung hriamnam le atomic bomb ngeih khawhnak ding ah a hman hna. Ei awk ngei lo in a chiah hna. Nihin tiang ah Atomic bomb voi thum a hniksak ve cang. A ngeih zong a ngei. Cucaah atu ral a thawh ahcun a hman taktak ko lai, timi hi an phan tuk nak cu a si. Hi tluk ih a nungmi atomic bomb a ngeitu ram hna kan van zoh cang hna lai. Voi zeizah dah an rak hniksak bal cio hna timi zong kan zoh chih lai. North Korea cu Atomic bomb a ngeimi ram hna lakah a ngei tlawmlei a si pinah hniksaknak voi thum lawng a tuahmi a si. Atomic bomb a ngeihmi zapi hi 10 a tling lai lo, tiah an ruah. Atom bomb a hniksak tambik ram cu USA a si le a hnubik a rak hniksak kha 1992 ah a si, tiah CCN nih a ial.

Atomic bomb sertu, a ngeitu ram hna le nihin vawlei dirhmun by si bawi mang lian

Atang i ram pawl hi atomic bomb a ngeimi minthang hna le hniksak a tammi an si hna. An ngeih zah zong vawleipi nih an theihpi hna ning in ka ial chih lai. USA he a ser hmasa an si bantuk voi tambik an hniksak, asinain Russia nakin tlawmdeuh a ngei. First test = Avoi khatnak hniksak, Last test = hnubik hniksak, Total tests= hniksakmi zapi USA : 7650 First Test: 1945 Last test: 1992 Total Tests: 1054 Russia: 8420 First Test: 1949 Last test: 1990 Total tests: 715 UK: 225 First Test: 1952 Last test: 1991 Total tests: 45 France: 300 First Test: 1960 Last test: 1996 Total tests: 210 China: 240 First Test: 1964 Last test: 1996 Total tests: 45 India: 80-100 First Test: 1974 Last test: 1998 Total Tests: 6 Pakistan: 90-110 First Test: 1998 Last test: 1998 Total Tests: 6 North Korea: 8-10 First Test: 2006 Last test: 2013

Atomic bomb sertu, a ngeitu ram hna le nihin vawlei dirhmun by si bawi mang lian

Total Tests: 3 Caialtu le careltu zong nih kan iruah tawnmi hna ah Israel hi Atomic bomb a ngei hnga maw? ti a si. Israel miphun nih an rak ser khawh tikah WWII cu a vung dih i Israel ram dirh hannak ding ah USA le UK nih fak tuk in an rak dirpi i nihin ah cun Israel timi ram a hung um tthan cang. Atom bomb hi rak ser hna hlah sehlaw, hi tluk in an dirpi hna lai lo, fimnak a petu Abrahram le Solomon Pathian cu thanghat a si. Nihin ni tiang ah Israel nih atomic bomb an hniksak timi kan thei bal lo. Israel nih atomic bomb 80 bakte ai ngeih tiah CIA World Factbook ah hmuh khawh a si. Israel nih hniksak len an herh ti lo, USA ah an sermi tampi kha Israel ah an rak chiah. Atu ah an ram chung ah an ser le ser lo cu theih a si lo. Mah hi 80 te hi a ralvennak caah a za tuk mi a si. Aruang cu a ral lianbik Iran zong nih voi khat hmanh Atomic bomb a hniksak theih a si rih lo. A ser hnik lengmang i Uranium zong cu a ngei len ko nain nihin tiang cu a ngei lo tiah CIA world factbook ah hmuh khawh a si. Asinain an izuam ve lengmang rih ko. Tutan North Korea nih an ihrocer ning in USA le South Korea hi kap tak seh law, Asia ram tam tuk a rawk ding a si. An ikah taktak a si ahcun, Russia le Iran an um sawsawh kho lai lo, Iran tal nih cun North Korea a bawmh lo hmanh ah caan rem hmang in Israel a rak tuai khawh. Tuluk nih North Korea umtu cu a rem ve ti lo nain USA nih a ralkap tamtuk Korea tikulh le an ram rili ah a chiah tikah a lungchung in cun a pamh len ko lai. Cun Japan hi Tuluk he an i entai le an i huat tuk lio a si fawn tikah caan rem hmang in ai kap kho an si. Cun North Korea cu Japan zong a ral chih caah Japan nih tu zarh chung ah rocket tampi Korea lei hoih in a toh ve cang. Cu tikah vawlei ralpi a chuak lai lo, kan ti kho ti lo. Ralpi a va chuah lo hmanh ah North Korea nih a sungh ding a duh lai lo caah atomic bomb a puah ko hnga. A puah ahcun chim cang bang a pawng kam ram tam tuk nih kan tuar lai. Mah cu dirhmun ah cun kan dir. Asinain April 15 hlan cu ih tuk awk a si rih lo. April 15 khi atu Kim Jung-un a pu North Korea dirhtu a Kim Il Sung chuahni a si i khi ni ahkhin a pu chuahni lawmhnak ah USA le South Korea a kah khawhmi a si, tiah an ruah. A kah lo ahcun ai hrocer sawh a si ko lai, ti a si. Hi ca ka ttial ni April 9 tiang ah cun North Korea nih ka ngol lai lo, South Korea i ramdang in a tlawngmi pawl kha ni tlawmte chung ah tlung dih uh, ram dangmi thah ka duh hna lo, ati tikah atomic bomb a puah tak ahcun a tang hmanthlak bantuk in ai kulhmi chung khi a kan phak dih lai. Cu tikah kan ram kong i kan buai lenmi hi a dih te lai i a thar in Lairam cu Union le Federal zong ah um lo, mi zong nih uk lo in kanmah tein independent in kan iuk han te lai.
Note: Atu lio a cangmi thil a rel kho lo, a thei kho lomi ka chungkhat le hawikom caah ka ttialmi a si. Mahhi ka ttialmi hi a tang chirhchan/sources tiah ka ttialmi chung ka rel hnu ah a rel fawi deuh ding in fonhtonhmi a si. Physics cawngmi ka si lo pinah natural science min pawl laiholh in a um lo caah ai palhmi vialte cattialtu mawh a si ko lai.

Atomic bomb sertu, a ngeitu ram hna le nihin vawlei dirhmun by si bawi mang lian

Sources:
http://inventors.about.com/od/astartinventions/a/atomic_bomb.htm and http://orwell.ru/library/articles/ABomb/english/e_japan http://www.history.com/this-day-in-history/the-first-atomic-bomb-test-is-successfully-exploded http://en.wikipedia.org/wiki/Robert_Oppenheimer http://en.wikipedia.org/wiki/Manhattan_Project http://en.wikipedia.org/wiki/Leo_Szilard http://edition.cnn.com/interactive/2013/03/world/nuclear-weapon-states/index.html?hpt=hp_c2

http://www.pandab.org/who-invented-the-atomic-bomb.html ---------------