ZOMI INNKUAN (SINGAPORE)

THUPULAKNA Zomi Innkuan (Singapore), ZIS, in i minam min Zomi bulphuh in nasem tawntung hi. Zomi a hong bawl Pasian tungah i lungdam hi. Zomi a hong piangsak, van leh lei a bawl vanglian Pasian in minam khat Zomi a hong bawl angtang ka kisa den uh hi. Minam a hong bawlpa in Zomi zong a khantoh ding, a phungcing ding deih hi. Zomi a khantoh, a phungcing theihna dingin kumpi laibupi sungah i minam min Zomi cih a kigelh kisam ahih lam zong mangngilhlo, thei in phawk tawntung hi. Zomi a khantohna ding leh Zomi cih kumpi laibupi sungah a kiciamtehna dingin tu laitak in Zomi min tawh kipawlna khempeuh in hong tung ding Kawlgam Kisimna (Myanmar Census) hun ah Zomi khempeuh in i minam min Zomi cih a gelh ding uh hi ci-in hanciam ciat uh hi. Tua bang nasepna leh hanciamna khempeuh ZIS in kithukimpih in tha kipia hi. Tua bang hunpha sungah lutto i hih manin lungdam huai kisa mahmah hi. Hih bang hunpha i ngah laitak in Zomi cih gelh ding a kisapna leh a kulna a tello om kha thei ding ahih manin a manlang thei pen a kitheihsak ding hoih hi ci-in kingaihsun hi. Tua ding a Zomi kipawlna tuamtuamte kalsuanna leh panlakna khempeuh Zomi Innkuan (Singapore) in thupi sa in, thukimpih a, nakpi takin panpih in ahi thei bang a sepkhop ding zong pha kisa a, ki lunggulh in zong ki hanciam hi. Tua ahih manin Zomi Innkuan (Singapore) in: 1. Census ciangin minam min gelhna ding mun ah Zomi cih gelh ciat ding pha kisa hi. 2. Zomi i hihna midang theihsak ding Zomi khempeuh mawhpuak hi cih kong tangko phapha uh hi. I kigen kei leh i hihna mite in hong theilo hi cih phawk ni. 3. Zomi i hihna hong kiciamteh ding pen Zomi bek mawhpuak hilo in census bawl kumpite mawhpuak zong hi cih tel mahmah ding hoih kisa hi. 4. Zomi a khantohna dingin Zomi khempeuh in mawhpuak kinei hi cih kong tangko kikkik uh hi. 5. Zomi i hihna a kip semsem nadinga kiu tuamtuam pana a sem Zomi kipawlna tuamtuam panlakna leh hanciamna thupi kisa in tha kipia nuam tawntung hi. 6. Zomi i hihna census ah a kikhum theihna dingin a sem, a vaihawmte a kisam bangin i hihtheih zah sum leh pai, tha leh ngal tawh panpih ding pha kisa hi. Zomi te biak i Pasian in a bawlsa a Zomi te hong zuun, hong kem, hong makaih in hong ompih den tahen. January 18, 2014 Executive Committee Zomi Innkuan (Singapore)
www.zomiinnkuan.org