ZAWLKHAWPUIIN SENMEI A CHAN NI KHA

-Dr. J.V.Hluna

Al Qaeda- hoin New York a World Trade Center (WTC) 2001 - ab bomb chhiat kha a
rapthlak a.An tih chhiat inchhawng ropui takte kha a uihawm a, thi leh hliam an tam avangin
US mi mai ni lovin khawvel ramdang rulru pawh a khawih hle : Mak tak mai chu thlawhna
thlawk lai leh WTC a su lai TV cameraman te’n thla an lo la hlauh kha a ni. Sawi mai leh a
hmuna mita hmutute’n an hmuh dan an ziak mai ai pawhin TV- a kan lo hmuhve khan a
rapthlak zia a tichianga., a tuartute pawh kan khawngaih phah em em a ni.
Khati khawp khan rapthlak mahse, US pumpui zauzia te, an hausakzia te, mipui an
tamzia te ngaihtuah chuan an tawrhna ‘percent’ chu a sang vak lo ang., New York
khawpui ropui leh mawina pawh a chuai phah lem lo. Khawvel khawpui ropui ber leh
sumdawnna hmunpui ber a la ni reng a, UNO Headquarters pawh a la ni chhunzawm zel.
WTC bomb chhiat avang khan tumah New York atangin an pem chhuak lo a, USA phei
chu pemsan ahnekin khawvel hmun tin atangin pem luh tumin miten’n permit an dil huai
huai a, permit nei loa lut ru an la tam zawk mah mai thei lehnghal. Chutiang ram ropui
chuan an tawrh ni , 9/11 chu kum tin urhsun takin an serh a, khawvel pum hriat turin an
tawrh nasat zia an puang chhuak ziah a ni. Taiwan -ah chuan Feb 28, 1947 hi National
Unity Day an ti a. Chiang - Kai-Shek- a Kuamingtang sipai ten civil mi 25,000 zet an
kahhlum ni kha a ni a. Taiwanese leh Chinese te inhuatna ni anga ngaih thin a ni. Tun
hnuah chuan ram inpumkhatna ni - ‘National Unity Day’ tiin kum tin urhsun takin an
hmang thin a ni.
ndopui pahnihnaa Japan rama Atom Bomb thlak ni August 6 chu Japaneseho chuan
‘World Peace Day’ tiin a uar thei ang berin an serh a, Baloon lian pui puiin ‘Remna
Thuchah’, Muanna thuchah’ khawvel hmun tam takah an thlak thin, Aizawlah YMCA
pawhin Khawvel Pum Muanna Ni (World Peace Day) hi khawvela remna leh muanna a
awmzel theih nan kan serh a, tawngtaina hun te kan hmang thin a nih hi. Japan ramah chuan
atom bomb thlak laia awm la damte an chawimawi a; bomb vanga thite chu Martar an ti a,
martar thlanmualah mi tam tak kalkhawmin pangpar an dah a, a uar thei ang berin ram leh
hnam hmangaihna rilru thangtharin an neih theihnan inzirtirna ni atan an hmang thin. Ram
leh hnam inpumkhatnan an hmang tangkai a, khawelin atom bomb/nuclear ralthuam hman
loh intiam tharna niah an hmang thin bawka. Bomb thlaktu USA, khawvela ram ropui ber
pawh thupha an chawitir thei zu nia. World War-II atang khan Japan chuan sipai chakna an
nei ta lo a: Kum 1952 a mahnia ro inrela an awm atang khan ‘Khawvel hneh a ngamna’ chu
ralthuam leh sipai chakna ni loin ‘Economic/Electronic chakna’ a ni tih hria-in an bei a,
chumi hmang chuan ram hausa leh ropui an ni leh ta tho mai. Zoramah pawh hian mi sawm
kan awm khawm chuan Japan thilsiam a lang ve zel ta a nih hi. Hengte hi August ni 6
apianga an sawi uar chu a ni.
Keini; India ram kil, Excluded Area a awm, Assam State chhung district pakhat ve mai
thin khan tharum hmanga India ngam thei kan ni lo. Mahse, min awptute’n min awp bet a,
khaw mawng pingah min siam a, tumah tlawh pawh lo, hmasawnlo, mawl tak, bal taka kan
awm chu ‘thil ennawm’ ang lekah min dah a. Chutianga ‘show piece’ tur ang chauha awm
reng tura min awp chu kan mi thiam leh hawi zau hmasaten duh loin retheihna leh awp
behna laka zalenna sual turin pawl (MNF) an din a. Min awp bettute chu kan ram atangin
‘chhuak rawh u, keimahniin ro kan inrel ve tawh zawk ang e,‘ an ti a, zalenna sualin silai an
lek ta a. Zoram pawna vai leh sipai kah an tum lo a, India khawih buai leh tihnat an tum lo.
Mizoram awpbettute erawh nawr chhuah nan hriam an lek a, an hriam lek pawh tlem te, nep
tak a ni. Khatih lai khan Mizo hrim hrim pawh 1,50,000 emaw lek kan la ni a, hriam lek phei
chu an tlem hle a, silai tha hman dan training la nei lo lehnghal an ni.
Chutichunga India sorkar lian leh chak, Pakistan pawh ngam, China ter phain March
5,1966 a an ralthuam tha ber, Pakistan leh China dona atan pawha an la hman loh Jet Fighter
hmanga kan Jerusalem - Aizawl khawpui an han bomb chiam mai kha chu theihnghilh theih
em ni ang? Zofate Jerusalem chu a alh a, a kang duai duai a, meivapah a chang zo a, a
michengte chuan an rauhsan vek a. A tam ber thingtlanga an chhuah laiin a thei fa deuhte
Shillong, Haflong leh Manipur-ah te an chhuak a, Burma lama chho ta pawh an awm nual.
Isreal fate Babulon sala an hruai laia an khawpui an ngai em em ang khan, Aizawl chhuahsan
duh loa, awm lui tlat an awm a, mahse; chungte chu tihduhdah leh nasa taka sawisak an ni a.
Zan Curfew hnuaiah India sipaiten an in an luhkhung a, an duh tawkin an ‘check’a, an thil an
ruksak a, an rawk bawk thin. An thu a zaa za pawm lo deuha an hriat chu Karimganj Jail - ah
te, Shillong leh Gauhati jail - ah te an thawn a, a chang fuh deuhin Nowgong Special Jail an
changa. Sipai Saktiman ah an phuarkhawmin kawng chhe nal leh khawkrawkah te
dimdawina awm miah loin an phur thla a, tui intur leh eitur tha kawng lakah an pe duh lo a,
vuak, ben leh kutthlak an sam hle bawk. Naik zun a chhuah chuan khawiah pawh rei tak tak
an ding a, a chang chuan an nula pawngsual vanga ding rei tak te an lo ni a. Mizo sal tang
zun leh ek chhukah an ding duh si lo. Ka pianna Zawlkhawpui, Tlawma’n ka phal lo che.
Chul hian i mawi lo, Pu Rokunga’n a lo tih chu a tlawm a, a mi chengte pawh a rem hian an
rem duak a ni ber mai; YMA a awm thei lo a, MZP Gen.Hqrs, pawh shillong-ah sawn ani. Aw
LALPA, Ngai la, kan mualphona hi en teh! Kan ro luahte chu hnamdang mite hnena pek ani
zo ta a, Kan inte chu hmelhriat loh mite hnenah, Fahrahte leh pa nei lote kan ni ta a; Kan
nute hmeithai ang mai an ni ta .... Nghawnga manin kan awma: kan chau va chawlh reng
kan nei lo; (Tah Hla 5:1-5) tih hi a la awm chhunte hla a ni.
Chutihlai chuan Lawyer kan nei lo a, Human Rights activist kan nei lo
a, Armed Forces Spcecial Powers Act, 1958 leh Assam Disturbed Areas
Act,1955 hman a nih avangin Politician-te’n engmah an sawi thei lo,
Telephone, TV leh Internet te chu “Kaha”?a ni ringawt, Chanmari-a Pu
Hrangbana in hmunah hian Pu A. Thanglura in ‘Romei’ a awm a, Telegraph
Office atan luah a ni a, thu tawi te te a thawn theih chauh a ni. Kan vui thu
thlenna awm chhun chu rawng taka min awp bettu sipaite hnenah a ni
mai. Anni lah Union Home Minister GL Nanda’n”Crush them”! a tih thu
kenga a lo kal an ni si. A manganthlak khawp mai. Aw khawiah nge kan
Chhandamtu Isua Krista kha? Khawiah nge kan rin engkimtithei Pathian
kha? Kan rin Pathian hnena kan tawngtaina lah a chhanna kan hmu hlei
thei lo..”Eng vangin nge kumkhuaa min theihnghilh a, chu leh chen min
kalsan le?.. Anih leh, Nangin min paihthla der em ni? Kan chungah i thin a
ur nasa hle em ni?” Thenkhatte’n MNF ho man annih theih nan, MNF hrim
hrim an tlawm theih nan lo tawngtai mek an awm bawk.
P.M.G. College (tuna P.U.College) Principal Rev. A. Roberts, kan
Missionary-in sipai hlau miah lo a, ruang a hlawm kha a lar hle thin.”Pu
Robert, i va ti lawmawm em! I chungah Mizote kan lawm e. Khatih laia i
chet dan hretu Upa. Chalhnuna te, Pu Muka te, Upa Chawngzikate engmah
kan lo ziaktir hman lo leh pek si a ni. Rev. L.N. Ralte te, Rev. Lalsawma te
hian rawn ziak teh se. Dr. Laltanpuii ziak, August 1982 MZP Chanchinbua
chhuak pawh kha Zozam Weekly- in tun hnai khan a chhuah nawn leh a,
hnuk a tiulh a, rilru a khawih teh a nia. Zozam Weekly hian Zawlkhawpui
bomb lai a taka mahni tawnhriat ngei ziak turin rual û la damte a sawm a.
Aizawl Bomb hriatrengna MZP ten hun buatsaih an rilruk nghe nghe. Mizo
history tidanglamtu, tawrhna rapthlak leh danglam kan tawn ni kha
thangtharten chiang zawka kan hriat a, kan hnam tana kan inpek tharna
ni anih theih nan, a tuar leh a hmute chuan in experience rawn theh
khawm teh u. Kum tin 5/3 (March 5), Jet Fighter rualin Aizawla bomb an
rawn thlak ni hian Vanapa Hall ah i inkhawm ang u khai, khata tuarte
sunna neiin mi mangang thlamuantute i chawimawi thin ang u.
Kan Khasi unau Prof. G.G.Swell, M.P. Parliament House a min chhantu
te MLA pahnih -Stanley D.D. Nichols Roy leh Hoover H. Hynniewta- te
chungah pawh lawmthu i sawi bawk ang u. Sipai thu chauh Assam leh
India sorkarin a dawn sawn lai; kan buai pik laiin an rawn zin a, bomb
themte an la a. Prime Minister Indira Gandhi’n, “Bomb kan thlak lo, ration
a ni kan thlak” a tih khan Prof. Swell, M.P. chuan India Parliament-ah
Aizawl nana an hman keh them Aizawl atanga a thlak chu lekchhuakin
“Hei hi maw in ration thlak chu, Chhum hmin a va’n har awm ve?”
ti meuhin Prime Minister a chhuahchhal a, a zal phah deuh a nih kha.
Assam Assembly House-ah khan Nichols Roy leh Hoover-ten nasa takin
min chhan lo se, Home Minister G.L. Nanda’n, “An ram alawm kan duh,
a mihringte chu sipai motor-in phur khawm vek ila, India state
tinah sem darh vek ila, buaina chu a reh mai ang,” a tihte kha an ti
tak tak lo ang tih a sawi theih loh. Chutiang chuan lo ti tak tak lo ang tih a
sawi theih loh. Chutiang chuan lo ti tak tak ta se; Mizo Identity khawiah mah a awm tawh lo
mai thei a ni. Prof. Tluangtea ten Mizo tawng buaipui tham an nei kher lo ang a, Pu
B.Lalthangliana te chuan Burma-ah an tinung thei tawk mahna.
Tuna remna leh muanna neia kan awm a, India constitution-in kan rights a humhalh a,
State thuneihna hnuaia lal tak tak kan lo nei thei te hi a va lawmawm em!. Kan nih phak
ngai loh tur kan ni a, kan phak ngai reng reng loh tur income kan nei ve te hi lawm
nachang i hria ang u khai. A tha thei ang ber leh a tangkai thei ang berin kan hun leh ni te,
kan tangka hmuh te hi hmang ila, kan ram leilung i humhalh ang u. Kan Lalpa duh
zawngin i awm theuh ang u.

(The author, Dr. J.V. Hluna, is my father, a Professor of History @ Mizoram University.
This article is an extract from his book of the same name, to be released on March 5,
2008. The date of its release is significant, for it marks the first observance of ‘ZORAM
Ni’- a day to commemorate the bombing of Aizawl and other places in Mizoram, by the
Government of India in retaliation to the Mizo underground movement seeking
independence from the country in 1966. The day is to be observed as a day to remember
the innocent people who fell victims to the bombings and to promote unity and peace
among the people of the state. A translation of the text will appear soon- keep watching!!
–tochh.shrugged)