American Hkalup Hpung Ginjaw (ABC) Amu Madu Kaba A Numhte Ga

Madu Yesu hta tsawra ra ai hpu nau ni e,

Nanhte a rau dung bawngban mayu ai myit hpe chyeju dum nngai. Ngai nanhte hte rau n lu lawm ai majaw hpyi
nem tawngban dat ai. Ngai hku nna Argentine Hkalup Ginwang Hpung hta ndai Laban e ga shaga na matu shawng
lajang kau ai majaw dai de sa lam kaw rai mat ai.
Wenyi n gun awai sak hkrung lam a matu ngai du nga ai Green Lake kaw nna yawng hpe shakram dat nna, nanhte
hkum dingdek hte Jinghpaw ni yawng hpe nye a kraw dung salum na nachying wa tsawra hkungga ai lam ka dat
nngai. Jinghpaw ni a matu, malai tai let Myan mung kata hte America mungdan kata e ngai shakut shaja nga ai lam
hpe mung nanhte chye na re.
American Hkalup Hpung Ginjaw a amu madu kaba langai hku nna, Pawlu gaw Ephesu Hkristan hpung masha ni
hpe ka dat ai zawn tsun mayu ai. Ngai hpyi nem dat ai nga nna shi ka nga ai, Nanhte hpe shaga la manit dai
shaga la ai lam hta e, nanhte ging dan ai hte hkawm nga myit ga, lam shagu hta myit nem ai hte myit gyip nna,
myit kalu kaba ai hte a hkawm nga mu: Wenyi a myit hkrum ai lam hpe ngwi pyaw ai makyit sumri hte hkan
shatup na, larau ladan rai nga mu.
Hpyi nem ngu ai ga gaw ga kaba rai nga ai. Ehpesu hpung a hpung de kawa langai hku nna Pawlu gaw hpyi
nem ngu ai ga si a malai matsun ngu ai ga si hpe shi mai lang nga ai. Pawlu zawn, nanhte a Wenyi lam kanu
kawa rai nga ai ABC a amu madu kaba langai hku nna ngai shagrit shanem ai hte hpyi lajin mayu ai gaw, ndai
zuphpawng hta e Wenyi lam hta myit hkrum makyit mahkai let ngwi pyaw lam hpe lu hkra tam shakut mu.
Hkristu a magam hta, lahkawng maga gaw tinang a Jinghpaw Wunpawng hkringhtawng hpe tsawra nna Myen
mung kaw nga ai Jinghpaw Wunpawng Hkalup Hpung Ginjaw hte rau amu galaw nna garum shingtau mayu ai myit
rawng nga ai ngu ai hpe mung dum ga.
Lahkawng mga gaw American Hkalup Hpung ni hpe mung shagrau hkungga nna anhte hte rau sha tatut magam
gun taw nga ai ngu ai hpe mung dum ga.
Shada da shagrau shaa ai hte myit n hkrum ai lam hpe koi yen mai nga ai.
Nanhte a lapran ndai kaw myit n hkrum nna garan ginhka ai lam gaw Myen mung de du hkra chyam bra nna dai
kaw mung garan ginghka ai lam byin wa na re hpe mung dum let sadi mu.
Email hte masha gaw dai ni na prat hta anhte a mungdan lahkawng lapran aloi sha gahkrang matut lu nna ndai
kaw ga garan ai shiga gaw Myen mung de nga ai nanhte a Jinghku ni a lapran mung shada da maga mi hte maga
mi myit n pyaw n ju n dawng ai lam ni byin shangun wa na rai nga ai. Masha wa hpe maga mi de grau madi
shadaw ai tsang kaw du hkra hkum galaw mu. Dai lam gaw kensa (cancer) ana e sha ai zawn ndai kaw nga ai
nawku hpung ni hte Myen mung kaw nga ai nawku hpung ni hpe jahten sharun kau na ra ai.
Ndai America kaw nga ai Jinghpaw nawku hpung ni hte Myen mung kaw nga ai Jinghpaw nawku hpung ni matut
mahkai mayu ai, n mayu ai ngu ai gaw ga san nan n rai nga ai. Ga san gaw, gara ladat hte matut mahkai yang tang
du masan sa dik htum rai na, ngu ai sha rai nga ai.
Hkang hte Karen nawku hpung ni gaw kasi kaja hpe madun da sai ngu ngai kam ai. Shanhte gaw Myen mung kaw
nga ai KBC (Karen) hte CBC ni rau ngang ngang kang kang matut mahkai nga ai zawn America kaw mung tinang
lagaw tinang tsap let tinang hkrai uphkang ai ladat lang nna ABC hte mung ten hpring kanawn mazum matut
mahkai nga ai. Ndai hku galaw ai lam gaw, America de shang shanu nga sai kaga mungdan na amyu sha ni a labau
zawn hpung ginjaw ni hpe ndai kaw gaw de nna ABC hte mung ni htep ai hku kanawn masum let tinang kanu
mungdan hte nawku hpung ni rau mung kanawn mazum let sasana lam hpe matut galaw nga ai. Shing re ai lam
gaw tinang kanu mungdan a hkringhtawng hte htunghkying ni hpe ngang ngang kang kang matut ai hpe dum nga
ai. Dai rai timung, America kaw gaw de ai nawku hpung gaw kanu mungdan na nawku hpung hte n bung na re.
Hpa rai na nga yang shingra n bung sai majaw, shi shingra hta hkan nna sasana lam hpe galaw sa wa ra nga ai;
shaloi kanu mungdan na nawku hpung hku nna n chye na ai zawn hkap la na mung yak nga ai.
Dai majaw, nanhte a lapran ga gran ai lam hpe gram (byeng) nna myit hkrum lam lu hkra galaw na matu ngai
nanhte hpe shadut mayu ai, hpyi nem mayu ai. Hkang hte Karen nawku hpung ni a hpaji kasi hpe madat mu, yu la
mu. America kaw na nawku hpung gaw Myen mung de na nawku hpung hte maren hkrang raw shakap galw
(carbon-copy) la n mai ai hpe mung dum ga ngu matut nna ngai hpyi nem nngai. Raitim mung, tsawra hkungga ai
hte kanu mungdan na Jinghpaw wunpawng Hkalup Hpung Ginjaw hte tang du ai hku ta gindun let, Hkang the
Karen nawku hpung ni shanhte a kanu mungdan na Ginjaw ni hte matut ai zawn mai matut nga ai.
Myen mung Hkalup hpung masha ni chyam bra nga ai mungdan law law kaw na Hkalup hpung ningbaw ni hte lai
wa sai shaning law law hta shaga yu nna chye lu ai lam hte dai mungdan na Hkalup hpung ningbaw ni a myit tsang
ai lam gaw, Myen mung a Hkalup hpung Ginjaw ni gaw tinang a hpung masha ni hpe e nau ni htep ai hku jum tek
nga ai majaw nnan du shang wa ai Myen mung na hpung masha ni gaw tinang du shang shanu nga sai mungdan
nnan na ngasat ngasa lam hte Hkalup hpung Ginjaw ni kaw e tang du ai hku shang lawm shamu shamawt ai lam n
nga wa na hpe tsang nga ai. Ndai tsang ai lam gaw Myen mung na masha ni hpe hkap la ai mungdan ni a matu grai
ahkyak ai lam rai nga ai. Shing nrai yang, ndai tsinyam hku du shang wa ai ni gaw tinang du taw nga sai mungdan
nnan na masha ni hte san san rai nna chyasam zawn rai mat na rai nga ai.
America e shanu nga ai Jinghpaw Wunpawng Hkalup hpung gaw hka garan nna Karai a magam hpe tang du ai hkra
galaw na matu malala n law nga ai. Dai majaw, shada da tsawra myit masin hte kahkyin gumdin myit hkrum na
matu ngai hpyi nem ai.
Nanhte yawng hte hpe tsawra nna rau sha amu galaw mayu ai ABC hku nna mung, nanhte a hka garan ai lam gaw
nye a myit masin hpe mung yawn hkyen shangun nga ai.
Bawngban ai lam hta e nanhte a myit masin hkum hkrang hpe dai Madu Yesu hte shada da hta e shagyit shanem
ai hte ap nawng lu myit ga.
Nanhte a matu hte America na Jinghpaw Wunpawng nawku hpung ni a matu akyu hpyi nga nngai.
Madu Yesu hta,
A. Roy Medley
Amu Madu Kaba, ABC-USA