Bisi utai ka di padah aku ngagai nuan

Aku nemu nuan endang amat sayau ka aku. Tang pengerindu tua semina ulih naka tu aja,
udah tu ila badu agi nuan ngenang aku. Berengkah meh enggau pengidup iya ka baru
Lapa nuan nyebut utai munyi nya Scar
Anang kelalu nuan ka betundi
Mike, aku serius nama utai di padah aku nya endang amat ukai jaku tundi
Scar
Taja pan nyau udah setaun utai nya nyadi tang nyentuk ka saritu endang mengkang di ingatka
aku belama. Pemutus nuan mai tua beserara endang cukup ngasuh ati aku ensiban. Puas udah
aku nguji enda ingat ka nya agi tang lalu enda ulih. Bendar agi aku nguji muai ya semak agi iya
datai ngagai aku. Aku mega lalu enda nemu nama kebuah nuan mai tua berserara, lalu nyentuk
ka saritu mega nuan nadai agi di temu berita.
Dua taun iya ka udah pengerindu tua endang nadai penanggul, lalu maya nya suba tua mega
asaika orang ti paling lantang senang ba dunya tu. Hari-hari ka udah endang sama ditengah tua
begulai, kudi enggau ujan sama-sama tua mansang. Agi mega aku ingat terubah iya tua
bekelala suba, maya nya tua sama-sama agi taun terubah belajar ba university. Taja pan maya
nya tua enda sama program tang bisi siti subjek umum university ngasuh tua betemu.
Apo Andy peda nuan jam diatu nyau ka pukul lapan
Parai tua laun lagi iya ga hari keterubah kuliah saritu lalu laun tua
Ya kati ga deh Mike, ukai tua sengaja ka laun tang ari tadi udah bepusin ditu lalu nadai temu
dewan kuliah kitai tu
Anang-anang nuan nya salah peda, uji peda baru amat enda kelas kitai ba DKC1
Enda ga aku tu nemu lebih ari tu deh endang amat DKC1 tulis ba jadual aku tu
Mike, nyin peda bala indu nyin uji nuan nanya sida engka senior sida nya nemu endur DKC1
Endang amat munyi di padah Andy bisi tiga iku indu benung mansang nuju aku enggau Andy
iya ka benung gegining meretika tulis DKC1

Eerraaa.. tumpang tanya saudari tau tempat DKC1?

Eh, kamu berdua pun hendak ke DKC1 juga, kami bertiga pun sama dari tadi masih tercari-cari
DKC1
Ka..ka.. kamu bukan pelajar senior?
Andy udah ga sida madah sama begigaka dewan kuliah nya baka tua reti iya sama junior
meh kitai tu
Seduai nemu jaku Iban pia, Iban ari ni seduai tu?
Kami tu sama datai ari Saribas, kita tiga tu deh?
Aku orang Kuching, dua iku kaban aku tu samai datai ari Kapit
Scarlet, Lisa uji peda kita ujung nyin nama mayuh nembiak begelumu din. Aram kitai sama
meda kin
Amat ga neh tak majak bejaku kitai ari tadi nyau enda ingat begigaka dewan kuliah
Indu tiga iku nya tadi lalu bejalai dulu nuju bala nembiak ka bisi bgelumu nya, aku enggau Andy
niti dudi ari belakang.
Nya nama iya ka ngena baju biru nya tadi, Scarlet kaban iya ngangau tadi
Fokus endar nuan tu tadi Andy, taja ka enda munyi tak aku ka di asuh nuan bejaku tadi
Ya kati deh, mesti focus kitai baru bulih penemu ka baru
Nama penemu ka bangat ulih nuan nya deh?
Nya kitai tak semina bejaku aja enggau indu tang enda nemu focus, nyin ya ka baju chelum
nama iya Lisa tang siku agi nyin lalu nadai nyebut nama tadi.
Datai kami ba bala ka begelumu mayuh nya peda ba mua pintu bisi tulis DKC1, nya meh endur
dewan kuliah iya ka digiga kami ari tadi. Lebuh ka nanya bala ka bisi dia nama kebuah enda
tama ke dalam kin, iya ka bendar ya pintu agi di kunci. Ngelelak diri ngapa meh beguai-guai
ngiga dewan nya tadi takutka laun tama.
Enda lama udah nya kira-kira bisi lima belas minit datai siku technician, peda ba jari iya nyau
seraup empa pemayuh kunci ka di bai iya. Udah technician nya muka pintu nya bala kami lalu

tama. Aku enggau Andy lalu beguai-guai enggau orang tama lalu ngambi penuduk ba tisi
dinding.
Balat pemayuh nembiak ngambi subjek tu nyau ka penuh dewan tu
Nasib tua udah bulih penuduk enti enda nadai endur lagi gasak orang
Enti nadai endur duduk pulai ga, nyambung tinduk baru
Sigi nadai runding bukai nuan nya Andy, ka tinduk aja-aja
Benung aku enggau Andy kiruh nyediaka buku sereta kereban iya ka bukai enda mukai-mukai
orang lalu nanya ari belakang.
Bisi orang duduk semak seduai ditu?
Nadainadai orang kami duai aja ditu. Duduk meh dia
Ukai indu tiga iku tadi nya mike? Andy nelai aku
Nasib ga bisi kosong kerusi tiga iti tu tadi, enti enda udah bediri kami tiga tadi
Amat ga neh, kini kita tiga tadi lalu nadai meda agi udah kitai ka betemu tadi?
Kami meda pintu nya agi di kunci nya kami lalu ke tandas tadi, datai kami baru meda orang
udah masuk
Dik nya tadi Scarlet mai kitai ka tandas tandas tadi
Umbas nya , nadai utai ngasuh belaya nya kitai udah bisi kerusi diatu
Nembiak lalu senyap magang lebuh ka lecturer masuk ngagai dewan kuliah nya, umbas iya ga
penuai lecturer nya. Mua iya endang nadai tuchum mimit lebuh malik ngagai bala nembiak ka
bisi dalam dewan. Iya lalu madah ka nama diri Dr Joe, kelimpah ari nya iya mega lalu nerangka
enggau silik pasal subjek ka di pelajar ka kami nya.Kira sejam udah ka ningga Dr Joe nya
kucah-kucah lalu ngetuka kuliah sari nya naka nya dulu.
Raya ga ngelama nya bejaku, nyau ngantuk mata tu Pia ka Andy sambil iya ka nyimpan buku
dalam beg.
Baru hari terubah tu Andy, agi bisi empat taun kitai tu belajar ditu

Seduai bisi kelas udah tu lagi?

Nyau tekenyit ningga orang nanya ari tisi laban ka enda ingat bisi tiga iku indu duduk dia tadi.
Pia mega benung kiruh besimpanka buku ka dalam beg.
Bisi kami kelas udah tu lagi, kita tiga deh bisi kelas lagi?
Kami tiga tu nadai, tu ka pulai ngagai hostel meh tu lagi
Lama kitai tu udah berandau ari tadi tang lalu bedau nemu nama pangan diri kitai
Amat ga tak bejaku aja-aja ari tadi enda ingat madahka nama diri. Aku tu Mike kaban aku tu
Andy
Hi selamat bekelala, aku Andy
Mike enggau Andy nama seduai neh, aku Scarlet, tu Lisa enggau Anna Pia ka Scarlet
madahka nama diri sambil jari iya nunjuka Lisa enggau Anna.
Hi Mike, Andy
Hi aku Anna, selalmat bekelala