.. shrIbAlA trailokyavijayakavacam ..

shrIbhairava uvAca adhunA te pravakSyAmi kavacaM mantravigraham.

trailokyavijayaM nAma rahasyaM devadurlabham.. 1 ..
shrIdevyuvAca yA devI tryakSarI bAlA citkalA shrI sarasvatI.
mahAvidyeshvarI nityA mahAtripurasundarI.. 2 ..
tasyAH kavacamIshAna mantragarbhaM parAtmakam.
trailokyavijayaM nAma shrotumicchhAmi tattvataH.. 3 ..
shrIbhairava uvAca devadevi mahAdevi bAlAkavacamuttamam.
mantragarbhaM paraM tattvaM lakSmIsaMvardhanaM mahat.. 4 ..
sarvasvaM me rahasyaM me guhyaM tridashagopitam.
pravakSyAmi tava snehAnnAkhyeyaM yasya kasyacit.. 5 ..
yaM dhR^itvA kavacaM devyA mAtR^ikAkSaramaNDitam.
nArAyaNo.api daityendrAn jaghAna raNamaNDale.. 6 ..
tryambakaM kAmadevo.api balaM shakro jaghAna hi.
kumArastArakaM daityamandhakaM candrashekharaH.. 7 ..
avadhIdrAvaNaM rAmo vAtApIM kumbhasaMbhavaH.
kavacasyAsya deveshi dhAraNAt paThanAdapi.. 8 ..
sraSTAprajApatirbrahmA viSNustrailokyapAlakaH.
shivo.aNimAdisiddhIsho maghavAdevanAyakaH.. 9 ..
sUryastejonidhirdevi candrastArAdhipaH sthitaH.
vahnirmahorminilayo varuNo.api dishAM patiH.. 10 ..
samIro balavAMlloke yamo dharmanidhiH smR^itaH.
kubero nidhinAtho.asti nairR^itiH sarvarAkSasAM.. 11 ..
IshvaraH sha~Nkaro rudro devi ratnAkaro.ambudhiH.
asya smaraNa mAtreNa kaulikasya kuleshvari.. 12 ..
AyuH kIrtiH prabhA lakSmIrvR^iddhirbhavati santatam.
kavacaM subhagaM devi bAlAyAH kaulikeshvari.. 13 ..
viniyogaH
R^iSiH syAddakSiNAmUrtiH pa~NktishchhandarudAhR^itaH.
bAlAsarasvatI devi devatA tryakSarI smR^itA..
bIjaM tu vAgbhavaM proktaM shaktiH shaktirudAhR^itA.
kIlakaM kAmarAjaM tu phaDAshA bandhanaM tathA.
bhogApavargasiddhyarthaM viniyogaH prakIrtitaH..
aiM bIjaM me shiraH pAtu klIM bIjaM bhR^ikuTI mama.
sauH bhAlaM pAtu me bAlA aiMklIMsauH nayane mama.. 1 ..
aMAMiMIMshrutau pAtu bAlA pa~ncAkSarI mama.
uMUMR^iMR^IM sadA pAtu mama nAsApuTadvayam.. 2 ..
lR^iMlR^IMeMaiM pAtu gaNDau aiMklIMsauH tripurAmbikA.
oMauMaMaH mukhaM pAtu sauHklIMaiM tripureshvarI.. 3 ..
kaMkhaMgaMghaM~NaM me pAtu sauHklIaiM bhagamAlinI.
caMchhaMjaMjhaM~naM me pAtu bAhau sauH sarvasiddhidA.. 4 ..
TaMThaMDaMDhaMNaM me pAtu vakSau klIM vIranAyikA.
taMthaMdaMdhaMnaM me pAtu kukSau klIM kulanAyikA.. 5 ..
paMphaMbaMbhaMmaM me pAtu pArshvau paramasundarI.
yaMraMlaMvaM pAtu pR^iSThaM sauHklIMaiM vishvamAtR^ikA.. 6 ..
shaMSaMsaMhaM pAtu nAbhiM sauHsauHsauH triguNAtmikA.
LaMkSaMkaTiM sadA pAtu klIMklIMklIM mAtR^ikeshvarI.. 7 ..
aiMaiMaiM pAtu li~Nge me bhagali~NgAmR^iteshvarI.
aiMklIM guhyaM sadA pAtu bhagali~NgasvarUpiNI.. 8 ..
sauHklIM urU sadA pAtu vedamAtASTasiddhidA.
sauHaiM jAnu sadA pAtu mahAmudrAbhimudritA.. 9 ..
sauHaiMklIM pAtu me ja~Nghau bAlAtribhuvaneshvarI.
aiMaiMsauHsauH pAtu gulphau trailokyavijayapradA.. 10 ..
aiMaiMklIMklIM pAtu pAdau bAlA tryakSararUpiNI.
shirasaH pAdaparyantaM sarvAvayavasaMyutam.. 11 ..
pAyAt pAdAdishIrSAntaM aiMklIMsauH sakalaM vapuH.

brAhmI mAM pUrvataH pAtu vahnI nArAyaNI tathA.. 12 ..

mAheshvarI dakSiNe.avyAnnairR^itye caNDikA.avatu.
pashcime pAtu kaumArI vAyavye cAparAjitA.. 13 ..
vArAhI tUttare pAyAdIshAnyAM nArasiMhikA.
prabhAte bhairavI pAtu madhyAhne yoginIkramAt.. 14 ..
sAyaM mAM vaTukaH pAyAdarddharAtre shivo.avatu.
nishAnte sarvagaH pAtu sarvadashcakranAyakaH.. 15 ..
raNe rAjakule dyUte vivAde shatrusa~NkaTe.
sarvatra sarvataH pAtu aiMklIMsauH bIjabhUSitA.. 16 ..
phalashruti
itIdaM kavacaM divyaM bAlAyAH sAramuttamam.
mantravidyAmayaM tattvaM mAtR^ikAkSarabhUSitam.. 1 ..
brahmavidyAmayaM brahmasAdhanaM mantrasAdhanam.
yaH paThet satataM bhaktyA dhArayed vA maheshvarI.. 2 ..
tasya sarvArtha siddhiH syAt sAdhakasya na saMshayaH.
ravau bhUrje likhitvAdau svayambhUkusumaiH paraM.. 3 ..
vandhyApi kAkavandhyApi mR^itavatsA.api pArvati.
labhet putro mahAvIro mArkaNDeyasamAyuSaH.. 4 ..
vittaM daridro labhate matimAn yashaH striyam.
ya etaddhArayedvarma saMgrAme sa ripUn jayet.. 5 ..
jitvA vairikulaM ghoraM kalyANaM gR^ihamAvishet.
bahunoktena kiM devi dhArayenmUrdhni santataM.. 6 ..
iha loke dhanArogyaM paramAyuryashaH shriyam.
prApyabhaktyA naro bhogAnante yAti paraM padam.. 7 ..
idaM rahasyaM paramaM sarvatattveSu hyuttamam.
guhyAdguhyamimaM nityaM gopanIyaM svayonivat.. 8 ..
.. iti shrIrudrayAmale shrIbAlA trailokyavijayakavacam ..