GADAI WA HPRING TSUP NGA AI RAI???

By: Yaw Na
Anhte wunpawng sha ni hta shada da tsawra gyit shabawn ai myit jasat kaba ra ai. Dai gaw
makam masham lam hta mung ngang kang ai myit masin hpe jaw ya lu nga ai. Shada tsawra ai
myit jasat hpe shanang shakang ai lam gaw Karai Kasang kaw na anhte myu ni hpe jaw ya ai
tsawra myit hpe anhte shada da a lapran hta n-gun jaw hkat ai lam, myit mang shabawn shangun
ai lam hpe lu la na matu rai nga ai.
Anhte nhpring tsup nga ai ni shada da nang shut ai, ngai grau ai ngu ai myit masin hpe shanem
nna tinang a lit hpa baw rai nga ai ngu ai hpe atsawm sha hkawn hkrang chye na ai amyu ni she
tai ra nga ga ai nhten ngu myit lu ai. Law law chye chyang ai wa law law myit, law law galaw,
ram daw chye chyang ai wa tinang atsam hta hkan nna lit la, chye chyang lam hpe grau nna naw
shakut ra ai ni mung chye chyang lam hpe shakut let tinang lit mai la ai shara kaw nna myu sha
lam hpe lit la rai bungli shabyin chye ai amyu anhte tai ra nga ga ai ngu na mung mu mada lu nngai.
Nkau mi tsun chye ma ai, anhte myu ni wuhpung wuhpawng law ai majaw myit hkrum lam hpe
gyit shajup lu na matu yak ai lam chye tsun ma ai. Dai ningmu mung masa langai hku nna teng ai
ngu mu tim, maga mi hku nna bai myit yu dat yang, wuhpung wuhpawng nlaw ai rai yang gaw
anhte myu ni teng teng myit hkrum gahkyin gumdin lu na rai kun? Ngu bai san na zawn rai nga
ai. Ngai hku nna mu mada lu ai myit hkrum mang rum lam gaw (1) Makam masham nga jang lu
mai ai, (2) Myit masin mung grai ahkyak ai, (3) Hpaji machye machyang kung hpan ra ai, (4)
Mung masa hpe kung kyang ai masha law law nga ra ai, (5) tinang hpa baw amyu rai nga ga ai
kun ngu ai pu gang yang sin machyi re lam hte tinang htung hking hpe tsawra hkungga chye ai
mamyu ni tai ra nga ga ai.

Ngai ningbaw lu galaw taw gaw nga nna myit taw nga ai ni mung grai nga nga ai, ningbaw
galaw tim bungli n-chye galaw yang kaman lila sha re. Anna ahkang aya hpe tek jum manat tawn
nna mang hkang nchye hparan yang Kaman lila sha re, madung gaw tinang nga ai shara kaw nna
Myu hte mung dan a matu chye myit chye mang na ahkyak kaba rai nga ai. Dai ni na prat hta
Facebook internet Chatting jai lang ai madang tsaw wa ai hte maren, ndai hpe jai lang nna
tinang myu sha shada da ahtik ahkawk mang hkang tam ai lam ni hpe chye galaw wa nga ga ai.
Facebook internet Chatting hpe jai lang nna myu sha a matu, mung dan a matu akyu rawng
ai bungli ni hpe grai mai galaw nga ai. Shada da hpaji jaw hkat, shada da lam madun hkat, shada
da n-gun jaw hkat mai nga ai. Ningbaw aya hpe nlu tim, myu sha makan lam hpe lit chye la
yang, dai gaw tinang myu sha a ntsa hta tsawra myit arang bang ai lam rai sai. Nkau mi mung
masa lam gaw ngai hte nseng ai, myu sha lam gaw ngai hte nseng ai nga nna myit shayup kau
chye ma ai, teng teng gaw, nang hpe hpan da ai Karai Kasang gaw Jinghpaw amyu hte
Wunpawng mung dan hpe hpan da ai re majaw, myu sha lam hte mung masa lam gaw nang hta
mung lit nga nga ai nrai ni???.
Hpang jahtum hpungdim dat hku nna, tinang myu sha lawt lu mayu ai amyu tai mayu yang, nang
nan mung masa chye chyang kung kyrang ra ai, mung masa hpe hka ja ra ai, tinang mung dan
hpe shalawt la mayu ai myit masin rawng yang, KIA hpyen dap hpe madang shatsaw garum na
myit masin nang hta hpring tup rawng ra ai. Lata tut mung shang lawm chye ra ai. Bai nna hkrit
tsang nga ai myit masin hta sha lup nga na malai na a mu mada ai lam hpe asan sha tsun dan
chye ra nga ai.
Wunpawng sha ni hpe Karai Kasang mung dan lu ai amyu sha shatai la u ga ngu akyu hpyi let
Kachin Politics Watch and Research Network