ELEMENTARY ISLAMIC EDUCATION – BUNIYAADI DEENI TALEEM

(ISLAMIC KNOWLEDGE)

1) Hum kaun hai ?

A) Hum musalmaan hai

2) Hamara rab kaun hai?

A) Hamara rab Allaah hai

3) Allaah kitnay hai?

A) Allaah ek hai

4) ibadat kis ki karni chahiye?

A) ibadat sirf Allaah ki karni chahiye

5) Hum ko khilanay - pilanay wala kaun hai?

A) Humko kilanay pilanay wala Allaah hai

6) Hum ko har waqt kaun dekh raha hai?

A) humko har waqt Allaah dekh raha hai

7) Poori kainaat Allaah nay kaisay paida ki? (Kainaat = universe)

A) Apni khudrat aur hukum say

8) Aap ko, chand, suraj, zameen aur aasmaan sub chizo ko kis nay paida kiya?
A) Allaah nay

9) Rozi kaun dayta hai aur dua kaun sunta hai? (Rozi = food)
A) Allaah

10) Zindagi aur maut kaun dayta hai?

A) Allaah

11) Tum apna sar kis kay saamnay jhukatay ho?

A) Allaah kay saamnay

12) Hamaray deen ka kya naam hai? (Deen = religion)

A) hamaray deen ka naam Islaam hai

13) Deen kisay kehtay hai?

A) Allaah kay hukum aur huzoor SAWS kay tareeqo par zindagi guzaarnay ko deen kehtay hai

14) ibadat kisay kehtay hai?

A) Allaah nay jin kaamo ko karnay ka hukum diya un ko karna aur jin kaamo say rooka unsay
bachna ibadat hai

15) Hum ko islaam kya sikhata hai ?

A) hum ko islaam yeh sikhata hai kay – Allah ek hai, wohi bandagi kay layaq hai aur
- hazrat Muhammad SAWS Allah Ta’ala kay banday aur uskay rasool hai,
 - Quraan e shareef Allah Ta’ala ki kitaab hai,
- Islaam sachcha deen hai,
- duniya aur akhirat ki tamaam bhalaeyaan aur neik baatein islaam sikhata hai

16) Neik kaam kisko kehtay hai?

A) Allaah jin kaamo ko karnay ka hukum diya hai – unko neik kaam kaha jata hai

17) Gunaah kis ko kehtay hai?

A) Allaah ki na farmani ko gunaah kaha jata hai

18) islaam kay kitnay faraiz hai?

A) islaam kay paanch (5) faraiz hai
1) tauheed aur risalat ki gawahi (kalima)
2) paanch waqt ki namazein (namaaz)
3) Ramazan Mubarak kay rozay (roza)
4) maal ki saalana zakaat (zakaat)
5) baitullaah ka hajj (hajj)

19) Tauheed ki gawahi ka kya matlab hai?

A) Allaah ko ek maanna
(Tauheed – Allaah ki zaat aur sifaat mein ghairul laah ko shareek na karna)

20) Risalat ki gawahi ka kya matlab hai?

A) Huzoor SAWS ko Allaah ka rasool manna
(SAWS = Sal lal laahu alaihi wa sallam / PBUH = peace be upon him)

21) Aqaied kisay kehtay hai?

A) aadmi jin baaton par dil say yaqeen rakhta ho unko aqaied kehtay hai

22) Emaan e mufassal kya hai?

A) emaan e mufassal dil aur zubaan say nichay kay baaton ka iqraar karna hai –
1. Allaah ek hai aur uskay siva koi mabood nahi
2. faristay bar haq hai – Allaah ki kisi qism ki nafarmani nahi kartay
3. Allaah nay jitni kitaabein nazil ki hai sub bar haq hai
4. ambiya (A.S.) sachchay aur bar haq hai
5. qiyamat zaroor qayam hogi
6. insaan ko acchi – buri jo halat bhi pesh aati hai sub Allaah ki taraf say hai
7. mout kay baad dubara zinda hona hai (us mein duniyawi zindagi ka hisaab hoga – uskay baad
jannat ya jahannum ka faisla hoga)
(**note** : upar ki 7 chizon par har musalmaan ko emaan laana zaroori hai aur emaan e
mujmal par bhi)

24) Shirk kisay kehtay hai? Aur us ki saza kya hai? shirk karnay walay ko kya kehtay hai?
A) Allaah ki zaat aur sifaat mein ghairul laah ko shareek karna shirk hai
Quraan mein Allaah nay farmaya – “jo shaks Allaah kay saath kisi ko shareek karayga, to us par
Allaah jannat ko haraam kardayga aur uska thikana jahannum hoga aur aisay zalimon ka koi
madadgaar na hoga”……………..shirk karnay walay ko ‘mushrik’ kehtay hai
(**note** : Allaah kay yahaan har gunaah ki muaafi hai magar shirk ki nahi)
25) Namaaz kisay kehtay hai?
A) Namaaz ek khaas tariqay say Allaah ki ibadat aur bandagi ko kehtay hai

26) Namaazien din-raat mein kitni farz hai?

A) Namaazein din-raat mein paanch (5) farz hai

27) Unkay naam batao?

A) 1)fajr 2) zohar 3) asar 4) maghrib 5) ish’aan

28) Paancho farz namaazo aur juma ki namaaz ki rakaatay kitni hai batao? (* = sunnat e moakeda)
NAMAZ SUNNAT FARZ SUNNAT SUNNAT NAFIL VITR NAFIL TOTAL
FAJAR 2* 2 - - - - - 4
ZOHAR 4* 4 2* - 2 - - 12
ASAR 4 4 - - - - - 8
MAGHRIB - 3 2* - 2 - - 7
ISHA 4 4 2* - 2 3 2 17
JUMA 4* 2 4* 2* 2 - - 14

29) Kya juma aur eidien ki namaaz auraton par farz hai?
A) nahi

30) Qaza namaaz kisay kehtay hai?

A) Kisi bhi ibadat ko uskay muqarrar waqt kay khatam honay kay baad ada karna ko qaza kehtay hai
Jaisay – fajar ki namaaz suraj tulu honay kay baad ada ki jaaye to woh qaza namaaz hogi

31) Namaaz padhnay ka kya faieda hai aur namaaz chood nay ka kya nuqsaan hai?
 Huzoor SAWS nay farmaya – Allaah nay farmaya aur is baat ka ahed kiya hai kay jis nay 5 namaazo ko
waqt par pabandi say ada karayga to mein usko jannat mein dakhil karoonga aur jo usay pabandi say
ada nahi karayga to uskay liye maray paas koi ahed nahi hai’
 Huzoor SAWS nay farmaya – jis shaks nay namaaz choodi woh Allaah say aisi haalat mein
milayga kay Allaah ussay saqt naraaz hoongay

32) Ahkaam kay kitni qisam hai? (qisam = type)

A) Farz e ayen, farz kiffaayah, wajib, sunnat e maukida, sunnat e ghair maukida, mustahab, mubah,
makru e tanzihi, makru e tehrimi, haraam

33) Farz e ayen kisay kehtay hai?

A) Allaah kay jis hukum ko poora karna har ek par – chahay mard ho ya aurat kay zimmay laazim aur
zaroori ho usko farz e ayen kaha jata hai

34) Farz e kiffaaya kisay kehtay hai?

A) Us farz ko jisay kuch musalmaan kay ada karnay say sub ki zimmaydari khatam hoti hai – agar koi
bhi ada na karein to sub gunaahgaar hotay hai jaisay namaaz e janazah

35) Halaal aur haraam kya hai – unki kuch misaalein dejiye?
A) Halaal – jiskay istemaal ki Allaah aur uskay rasool (huzoor SAWS) nay ijazat di ho usko halaal
Kehtay hai
Haraam – woh bura amal jisay karnay ko Allaah aur uskay rasool (huzoor SAWS) nay sakhti say
mana kiya ho, Jis ka inkaar karnay wala kaafir hota hai aur us ka karnay wala fasiq aur azaab
ka mustahiq hota hai. Jaisay - sharaab peena, sood layna, chori karna wa ghairah.
36) Wajib namaazein kaun kaun si hai?
A) Witr aur eidain ki

37) Kaun si namaaz musalmaano par farz e kiffaayah hai?

A) Janazay ki namaaz

38) Janazay ki namaaz kisay kehtay hai?

A) Jab koi musalmaan marjata hai – usay dafan karnay say pehlay uski maghfirat kay liye ruku aur sajday
kay baghair chaar takbeer kay saath namaaz padhtay hai- usko namaaz e janazah kehtay hai
39) Kuch nafil namaazo kay naam batao?
A) Namaaz e tahajjud, namaaz e ishraaq, namaaz e awwabeen, namaaz e chaasht, namaaz e
tahiyatul masjid, namaaz e tahiyatul wuzu, salaatul tasbeeh, salaatul haajaat, namaaz e
isteqaarah – wa ghairah

40) Taraweeh ki namaaz kisay kehtay hai aur uski kitni rakaatein hai?
A) Ramazaan kay mahinay mein ishaa ki farz aur sunnat kay baad, witr say pahlay jo namaaz padhi
jaati hai usay tarweeh ki namaaz kehtay hai. Woh 20 rakat namaaz hai jo – dus salaam kay saath
dow(2) – dow(2) rakat say padhi jaati hai (**note** : taraweeh ‘sunnat e maukeda’ hai)

41) Roza kisay kehtay hai?

A) subah sadiq say laykar aftaab ghuroob (suraj doobnay) honay tak rozay ki niyyat karkay khana-
peena aur nafsaani khwahishaat ko chood daynay ka naam roza hai

42) Zakaat kisay kehtay hai?

A) maal daar aadmi par laazim hai kay saal mein ek martaba apnay maal ka dhaye fisad (2.5 %)
Allaah kay hukum kay mutabiq masakeen (ghareeb) ko day kar maalik banaday –isko zakaat
kehtay hai

43) Hajj kisay kehtay hai?

A) zil hijja kay mahinay mein baitullaah shareef jaakar kuch maqsoos aamaal karnay ko hajj
kehtay hai
44) Hajj karnay kahaan jaatay hai?
A) Baitullaah (kaaba tul laah)

45) islam ka kalima kya hai?

A) islaam ka kalima “LAA E LAAHA ILLAL LAAH MUHAMMAD DUR RASOOLUL LAAH” hai

46) Us ka tarjuma batao? (tarjuma = translation)

A) Allaah kay siva koi mabood nahi aur Muhammad SAWS Allaah kay rasool hai

47) Jo Allaah ko nahi maantay unhain kya kehtay hai ?

A) jo Allaah ko nahi maantay unhain kafir kehtay hai

48) Hamara qibla kaun sa hai?

A) hamara qibla ‘kaba tul laah’ (Makka Mukarramah mein) hai

49) Hum sub kis ki aulaad hai ?

A) hum sub hazrat Aadam (A.S) ki aulaad hai

50) Nabi kisay kehtay hai? (Nabi / ambiya / rasool = messenger / prophet)
A) nabi woh hai jisko Allaah nay shariyat daykar loogon kay paas bheja ho

51) Jab kisi nabi ka naam aaye to kya padhna chahiye? (A.S. = Alaihis salaam)
A) Alaihis salaam (un par salamati ho)
52) Hamaray nabi kaun hai? (Hazrat Muhammad Mustafa SAWS = Huzoor SAWS)
A) hamaray nabi Hazrat Muhammad Mustafa SAWS hai

53) Hum kis ki ummat hai?

A) hum Huzoor SAWS ki ummat hai

54) Hamaray nabi SAWS kab paida huaye?

A) 12 rabi ul awwal – peer (Monday) kay din

55) Sub say pahlay aur akhiri nabi ka naam batao?

A) subsay pahlay nabi Hazrat Aadam (A.S.) hai aur subsay akhiri nabi Huzoor SAWS hai

56) Kya Huzoor SAWS kay baad bhi koi nabi ya rasool ayeingay?
A) Huzoor SAWS Allaah kay akhiri nabi hai aap kay baad qiyamat tak koi naya nabi nahi aayega, aap
SAWS kay baad koi bhi nabi honay ka daawa karein woh jhoota hai

57) Huzoor SAWS kay tariqon ko kya kehtay hai?

A) Huzoor SAWS kay tariqon ko ‘sunnat ‘kehtay hai

58) Sunnat kisay kehtay hai?

A) deen ki jo baat Huzoor SAWS ya khulafa e rashideen (sahaba) say sabit ho lakin farz aur wajib na
ho – usko sunnat kehtay hai

59) Jis sunnat ko aksar logon nay choor diya ho – us ko jinda karna ya us par amal karnay ki kya
fazilat hai?
A) Uspar 100 shaheedo ka sawaab hai (mishkaat – hadees)

Huzoor SAWS nay farmaya - ilm ka hasil karna har musalmaan mard aur aurat par farz hai - (hadees)

60) Hadees kisay kehtay hai?

A) Huzoor SAWS nay jo kaam kiye ya jin baaton ki ummat ko apni baat say ya amal say taleem di –
Unhain hadees kehtay hai

61) Hadees ki mashoor kitaabein kitni hai ? Unkay naam batao?

A) hadees ki mashoor kitaabein 6 hai -
1) Bukhari Shareef - (Muhammad bin Ismail)
2) Muslim Shareef - (Muslim bin al Hajjaj)
3) Tirmizi Shareef - (Abu Isa Muhammad bin Isa)
4) Nisai Shareef - (Abu Abdur Rahman Ahmad bin Shuaib an Nasai)
5) Aboo Dawood Shareef - (Sulaiman bin Ashath)
6) Ibn e Maaja Shareef - (Abu Abdullah Muhammad bin Yazid al qazwini)

62) 40 hadees ko yaad karnay ki kya fazilat hai?

A) Huzoor SAWS nay farmaya - jis nay 40 hadees duusron tak pahonchanay kay liye yaad karay to
woh shaks qiyamat kay din fiqhi aalim banakar uthaya jaayega aur uski mein (Huzoor SAWS)
shifarish karoonga

63) Huzoor SAWS kaunsay shaher mein paida huaye?

A) Huzoor SAWS ‘Makka Mukarramah’ shaher mein paida huaye

64) Huzoor SAWS kay walid aur walidah ka naam batao?

A) Huzoor SAWS kay walid ka naam Hazrat Abdullah aur walidah ka naam Hazrat Aamina hai

65) Huzoor SAWS kaunsay mahinay mein paida huye?

A) Huzoor SAWS rabi ul awwal kay mahinay mein paida huye

66) Huzoor SAWS ki nabuwwat kay waqt kitni umar e shreef thi?
A) Huzoor SAWS ki nabuwwat kay waqt 40 saal umar e shreef thi

67) Huzoor SAWS ki kitni umar huyi? (umar huyi = total age)
A) Huzoor SAWS ki 63 saal umar huyi

68) ‘Ahle bait’ kisko kehtay hai? (ahle bait = ghar waalay)
A) Huzoor SAWS kay ghar waalon ko ahle bait kehtay hai jaisay – aap SAWS ki azwaaj e mutahharaat
(biwiyaan), ladkay, ladkiyaan, nawasay, nawasiyaan, chacha aur qareebi ristaydaar ko ahle bait
Kehtay hai

69) Huzoor SAWS ki kitni biwiyaan thi?unkay naam batao? (Biwi = wife)
A) Huzoor SAWS ko 11 biwiyaan thi – unkay naam yeh hai -
1. Khadijah (Razi allaahu anha)
2. Saudah (Razi allaahu anha)
3. Aisha (Razi allaahu anha)
4. Hafsah (Razi allaahu anha)
5. Zainab bint khuzama (Razi allaahu anha)
6. Umme Salma (Razi allaahu anha)
7. Zainab bint Jahsh (Razi allaahu anha)
8. Juwairiya (Razi allaahu anha)
9. Umme Habiba (Razi allaahu anha)
10.Safiyah (Razi allaahu anha)
11.Maymoonah (Razi allaahu anha)

ilm kay baghair amal tabahi hai – amal kay baghair ilm wabaal hai

70) Huzoor SAWS kay kitnay ladkay hai – unkay naam batao?
A) Huzoor SAWS kay 3 ladkay hai – unkay naam yeh hai –
1) hazrat Ibraheem (R.A)
2) hazrat Qasim (R.A)
3) hazrat Abdullaah (R.A)
71) Huzoor SAWS ki kitni ladkiyaan hai – unkay naam batao?
A) Huzoor SAWS ki 4 ladkiyaan hai – unkay naam yeh hai -
1) hazrat Zainab (R.A)
2) hazrat Umme Kulsum (R.A)
3) hazrat Ruqaiyya (R.A)
4) hazrat Faatimah (R.A)

72) Huzoor SAWS ki qabr e ather kahaan hai?

A) Huzoor SAWS ki qabr e ather ’Madina Munawwrah’ mein hai

73) Huzoor SAWS par kaun si kitaab nazil huyi?

A) Huzoor SAWS par ‘Quraan e paak’ nazil huyi

74) Huzoor SAWS ka naam aaye to kya padhna chahiye?

A) durood e shareef padhna chahiye jaisay – ‘Sal lal laahu alaihi wa sallam’
(tarjuma - aap par Allaah ki rahmat aur salamati ho)

75) Seerat kisay kehtay hai? (Biography = seerat e tayyibah / hayaat e tayyibah)
A) Huzoor SAWS ki zindagi kay haalaat ko seerat kehtay hai

76) Huzoor SAWS kay kuch akhlaaq batao?

 Hamaray nabi sub say mohabbat say miltay aur kisi ko bura nahi kehtay
 Hamaray nahi bahot sakhi thay woh kabhi kisi ko khali haat nahi lautaya
 Hamaray nabi aapni zaat kay liye kisi say badla nahi laytay
 Hamaray nabi takleef pahonchanay walay ko dua e khair kartay
 Hamaray nabi ameer-ghareeb , ghulaam-aaqa har ek kay saath barabari ka sulook kartay
 Hamaray nabi zulum karnay walay ko muaaf kardaytay
 Hamaray nabi khanay-peenay aur pahennay mein saadgi ko apnaatay
 Hamaray nabi safaee ko pasand kartay aur ganddagi say nifrat kartay
 Hamaray nabi mehmaan ka ikraam kartay aur musibat par sabar kartay
 Hamaray nabi bahot ziyada ibadat kartay aur hamesha sach boltay
77) Huzoor SAWS Makka aur Madina mein kitnay saal rahay?
A) Makka mein 53 saal aur Madina mein 10 saal rahay

78) ‘Khatme nubuwwat’ kisay kehtay hai?

A) Huzoor SAWS akhiri nabi hai aur unkay baad koi nabi kisi bhi haisiyat ka nahi aayega aur jo
nabi honay ka dawah karega woh battareen jhoota hai

79) Quraan kisay kehtay hai?

A) Quraan Allaah ki woh kitaab hai jisko Huzoor SAWS par nazil kiya gaya hai

80) Quraan kya hai?

A) Allaah ki kitaab aur Allaah ka kalaam hai

81) Quraan kitni muddat mein nazil hua? (Muddat = period)

A) Quraan 23 saal ki muddat mein nazil hua

Huzoor SAWS nay farmaya – tum mein say behtareen shaks woh hai jo quraan e shareef seekhay aur sikhaye – (hadees)
82) Quraan kis tareeq ko, kahaan aur kab nazil hua?
A) Quraan ramazaan ul Mubarak kay mahinay mein, shab e qadar ki raat ko, Makka Mukarramah
mein Ghaar e Hira mein nazil hua

83) Quraan kaun si zubaan mein nazil hua?

A) Quraan ‘Arabi’ zubaan mein nazil hua

84) Arabi kis ko kehtay hai?

A) Arab ki zubaan ko Arabi kehtay hai (Zubaan = language)

85) Quraan mein kitnay suray hai? (Suray = chapters)

A) Quraan mein 114 suray hai

86) Quraan mein kitnay paray hai? (Paray = parts)

A) Quraan mein 30 paray hai

87) Quraan mein kitnay ayatein hai? (Ayatein = verses)

A) Quraan mein 6666 ayatein hai

88) Quraan mein kitnay ayat e sajdah hai?

A) Quraan mein 14 ayat e sajdah hai

89) ‘ayat e sajdah’ ya sajday tilawat kya hai?

A) Quraan mein 14 muqamaat aisay hai jin ka padhnay ya sunnay say sajda karna wajib hojata
hai – isko sajday tilawat kehtay hai

90) Quraan ka maqsad kya hai aur quraan kay huqooq kya hai?
A) Quraan ka maqsad ‘tamaam insaniyat ki hidayat’ hai
Quraan kay 6 huqooq :
1. quraan ka pahla haq yeh hai kay quraan par imaan laya jaaye
2. doosra haq yeh hai kay quraan ko padha jaaye
3. teesra haq yeh hai kay quraan ko samjha jaaye
4. quraan ka chutha haq yeh hai kay quraan par amal kiya jaaye
5. quraan ko aagay pahonchaya yaani uski taleem ko aam kiya jaaye
6. quraan kay nizaam ko apni zaat par khandaan par shaher par mulk par aur saari duniya
par nafiz kiya jaye

91) Quraan kya sikhata hai?

A) Duniya aur akhirat ki tamaam bhalaeyaan quraan sikhata hai

92) Hafiz e quraan kisay kehtay hai?

A) jis nay 30 paray quraan kay zubaani yaad kiye ho woh hafiz e quraan hai

93) Quraan aur sunnat ki pairwi (maannay) kay baaray mein Huzoor SAWS nay kya farmaya?
A) Huzoor SAWS nay farmaya – mein nay 2 cheezein tumhaaray darmiyaan choodi hai tum jab tak
un doono ko mazbooti say thaamein rahogay to kabhi gumraah na hogay – woh ‘quraan aur meri
sunnat’ hai
94) Quraan atak - atak kar padhnay ka kya ajar hai? (Ajar = sawaab)
A) Huzoor SAWS nay farmaya – jo shaks quraan ko atak atak kar padhta hai aur us mein mashaqat
uthata hai us kay liye duhra (2) ajar hai

95) Quraan ko saal mein kitnay baar khatam karna quraan ka haq hai ? Quraan padhnay ki ek fazilat
batao?
A) saal mein 2 baar khatam karna quraan ka haq hai. Huzoor SAWS nay farmaya – quraan ki tilawat
kiya karo is liye kay qiyamat kay din yeh (quraan) apnay saathi padhnay waalay ki shifarish
karayga

96) Quraan tajweed say padhna kaisa hai? (Tajweed = accent)

A) Quraan tajweed say padhna wajib hai

97) Tajweed kisay kehtay hai?

A) tamaam Arabi huroofon ko unkay makharij kay saath ada karnay ko tajweed kehtay hai
( quraan ko saheeh padhnay kay tareeqay ko tajweed kehtay hai )

98) Qaeidah kisay kehtay hai? (qaeidah = noorani qaeidah)

A) Jis kitaab mein quraan padhnay kay tareeqay bataye jaaye usko qaeidah kehtay hai

99) Arabi mein huroof kitnay hai? (Huroof = letters)

A) Arabi mein 29 huroof hai

100) Makhraj kisay kehtay hai? (Makhraj = makharij)

A) Makhraj – us jagah ko kehtay hai jahaan say huroof nikalta hai

101) Arabi mein kitnay makharij hai?

A) Arabi mein 17 makharij hai
102) Aasmani kitabein kitni hai – unkay naam batao aur woh kis par naazil huaye?
A) aasmaani kitaabein 4 hai : 1) tauraat – Hazrat Moosa (A.S.) par naazil huyi
2) zaboor – Hazrat Dawood (A.S.) par naazil huyi
3) injeel – Hazrat Isa (A.S.) par naazil huyi
4) quraan e majeed – Huzoor (SAWS) par naazil huyi

103) Sahabi kisay kehtay hai?

A) sahabi usay kaha jata hai jisnay emaan ki halat mein Huzoor SAWS ko daykha ho ya aap ki
Khidmat mein hazir hua ho aur emaan ki halat mein uski wafaat huyi ho (wafaat = maut)

104) Muhajir sahaba kisay kehtay hai?

A) Makka kay musalmaan jo ghar baar chood kar madina aaye woh muhajir sahaba hai

105) Ansaar sahaba kisay kehtay hai?

A) Madina kay musalmaan jinhonay muhajir sahaba ki madad ki woh ansaar sahaba hai

106) Jab kisi sahabi ka naam aaye to kya padhna chahiye?

A) Razi allaahu anhu (Allaah un say razi ho)

107) Khulafa e rashideen kay naam batao?

A) 1) hazrat Abu Bakr Siddiq (R.A)
 2) hazrat Umar Farooq (R.A)
3) hazrat Usmaan Ghani (R.A)
4) hazrat Ali Murtuza (R.A)

108) Sub say afzal sahabi kaun hai?

A) Hazrat Abu Bakr Siddiq (R.A.)

109) duniya mein jannat ki basharat kitnay loogon ko di gayi ? unkay naam batao? (ashra = 10)
A) duniya mein jannat ki basharat 10 loogon ko di gayi jin ko ‘ashray mubashshrah’ kehtay hai
1) Hazrat Abu Bakr Siddiq (R.A)
2) Hazrat Umar Farooq (R.A)
3) Hazrat Usmaan Ghani (R.A)
4) Hazrat Ali Murtuza (R.A)
5) Hazrat Abdur Rahman bin Auf (R.A)
6) Hazrat Talha Bin Ubaidullah (R.A)
7) Hazrat Zubair Bin Al Awam (R.A)
8) Hazrat Saad Bin Abi Wiqas (R.A)
9) Hazrat Abu Ubaida Bin Al Jarrah (R.A)
10) Hazrat Saeed Bin Zaid (R.A)

110) Taba’ee kisay kehtay hai?

A) Jis nay kisi sahabi ko emaan ki halat mein dekha ho

111) islaam kay bunyaadi aqaied kya hai? (Bunyaadi = basic)

A) Tauheed, risalat aur akhirat

112) Akhirat kisay kehtay hai?

A) Marnay kay baad jo zindagi shuru hoti hai usko akhirat kehtay hai

113) Akhirat ki sub say pahli manzil kaunsi hai?

A) qabar

114) Kya marnay kay baad dubara zinda hona hai?

A) Haan

115) Qiyamat kisay kehtay hai?

A) Allaah poori duniya ko fanaa karnay kay baad dubara sub ko jinda kar kay ek maidaan mein jama
farmeingay aur unkay darmiyaan faisla farmeingay – aur dubara zinda karnay ko qiyamat kehtay
hai aur us maidaan ko maidaan e hashr kehtay hai

116) Qiyamat ka din kitna bada hoga?

A) Duniya kay 1000 saal kay barabar hoga

117) Qiyamat mein sub say pahlay kis cheez ka hisaab hoga?
A) Namaaz ka

118) Mezaan kisay kehtay hai?

A) Qiyamat mein bando kay achchay buray aamaal tolnay kay liye jo tarajo istemaal kiya jaayega
woh mezaam hai
119) Pul siraat kisay kehtay hai? (Pul = bridge)
A) jahannum kay upar ek pul hai – jis par say har shaks ko qiyamat mein guzarna hoga – usko pul
siraat kehtay hai

120) insaan kay marnay kay baad qabar mein kaunsay sawalaat kiye jayeingay?
A) insaan kay marnay kay baad qabar mein yeh 3 sawalaat kiye jayeingay-
 tumhara rab kaun hai?
 tumhara deen kya hai?
 tumhara nabi kaun hai?

121) Jannat kya hai aur jannat mein kaun log jayeingay?
A) Allaah nay apnay neik bando kay liye apnay paas ek nihayat aaraam aur raahat wali jagah
banaye hai – usko jannat kehtay hai

122) Jannat ka woh kaunsa darwaza hai jis say sirf rozaydaar dakhil hoongay?
A) Baabur raiyaan

123) Jahannum kya hai aur jahannum mein kaun log jayeingay? (Jahannum = dozakh)
A) Allaah nay apnay na farmaan aur kaafir bando kay liye ek nihayat takleef dah thikana banaya
hai – usko jahannum kehtay hai

124) Dua kisay kehtay hai?

A) Allaah say maangnay ko dua kehtay hai

125) Tauba kisay kehtay hai?

A) Allaah say aapni ghalti ya gunaah par muaafi chahna - dil mein nadamat kay saath aur aindah na
karnay ka pakka irada karnay ko tauba kehtay hai

126) Gunaah e kabira kisko kehtay hai?

A) Gunaah e kabira – woh baday gunaah hai jo baghair taubah kay muaaf nahi hotay aur ek bhi
gunaah jahannum mein lay jaanay kay liye kaafi hai

Huzoor SAWS nay farmaya – gunaah par sharminda hona tauba hai - (hadees)

127) Faristay kisay kehtay hai? Chaar (4) mashoor fariston kay naam batao? (faristay = malaieka)
A) faristay Allaah ki noorani maqlooq hai – jo Allaah kay har hukum ko maantay hai aur kisi hokum
ki nafarmani nahi kartay
Chaar (4) mashoor fariston kay naam yeh hai : 1) hazrat Jibra’eel (A.S)
2) hazrat Meka’eel (A.S)
3) hazrat Isra’feel (A.S)
4) hazrat Izra’eel (A.S)

128) Huzoor SAWS nay kahaan say aur kis shaher ko hijrat ki?
A) Huzoor SAWS nay Makka say Madina ko hijrat ki

129) Hijrat kisay kehtay hai?

A) Deen kay khatir apna watan chood kar doosri jagah chalay jaanay ko hijrat kehtay hai
130) hijrat kay waqt kaun say sahabi Huzoor SAWS kay saath thay?
A) Hazrat Abu Bakr Siddiq (R.A)

131) islaami sun ko kya kehtay hai? (sun = year / saal)

A) islaami sun ko sun hijri kehtay hai

132) Sun hijri say kya matlab hai?

A) jis din Huzoor SAWS aur Hazrat Abu Bakr (R.A) nay Makka say Madina ki taraf hijrat ki us din
say sun hijri shuru huyi

133) islaami mahinay kitnay hai aur unkay naam batao?

A) islaami mahinay 12 hai aur unkay naam yeh hai-
1. muhar’ram mul haraam
2. safarul muzaf’far
3. rabi ul aw’wal
4. rabi us saani
5. jamaadi ul aw’wal
6. jamaadi us saani
7. raj’jab bul muraj’jab
8. shabaan ul moaz’zam
9. ramazaan ul mubarak
10.shaw’waal lul mukar’ram
11.zee qaiedah
12.zil hij’jah

134) Musalmano par kis mahinay mein roza farz hai?

A) Musalmano par Ramazan kay mahinay mein roza farz hai

135) islaam mein kitnay eidien hai aur unkay naam batao? (Eidien = festivals)
A) islaam mein 2 eidien hai 1) Eid ul fitr 2) Eid ul azhaa

136) Eid ul fitr kisay kehtay hai?

A) Ramazaan kay roozon kay baad shawwal kay mahinay ki pahli tariq ko jo eid hoti hai usko
eid ul fitr kehtay hai

137) Eid ul azhaa kisay kehtay hai?

A) zil hijja ki 10 tariq ko jo eid hoti hai usko eid ul azhaa kehtay hai (jis mein qurbaani daytay hai)

138) Muqaddas raaton kay naam batao? (shab = raat)

A) 1) shab e meraaj 2) shab e baraat 3) shab e qadar

Huzoor SAWS nay farmaya – meri baatein duusron tak pahonchao agar chay ek hi baat ho - (hadees)

139) Kya woh jaagnay ki raatein hai ya ibadat ki raatein?

A) woh sub ibadat ki raatein hai na kay sirf jaagnay ki (shab-bay-daari = raat mein jaagkar ibadat
karna)

140) Shab e meraaj kay baaray mein batao?

A) Yeh woh raat hai jis mein paanch farz namaaz ka tohfa, Allaah nay Huzoor SAWS ko arsh par
 diya aur ussi raat kay kuch hissay mein tamaam aasmaan ki sair karaye gayi aur muqtalif
ambiyaa (A.S.) say mulaqaat bhi huyi – is safar ko meraaj kehtay hai (27 rajjab ki raat)

141) Shab e baraat kay baaray mein batao?

A) Yeh raat mein Allaah ki taraf say kuch ahem faislay aanay walay ek saal kay liye nafis kiye
jaatay hai jaisay -
 rizq ka faisla
 maut aur hayaat ka faisla wa ghairah (15 shabaab ki raat)

142) Shab e qadar kay baaray mein batao?

A) Shab e qadar ki ek raat ki ibadat hazaar mahino say behtar hai
aur yeh raat mein quraan nazil hua hai (ramazaan kay aakhiri 10 din ki taaq raaton mein
say ek raat)

143) Bid’aat kisay kehtay hai?

A) jo baat Huzoor SAWS ya khulafa e rashideen (sahaba) say sabit naaho usko deen ka kaam
samajh kar sawaab ki umeed say kiya jaaye –usko bid’aat kehtay hai

144) Bid’aat kay baaray mein huzoor SAWS nay kya farmaya?
A) Huzoor SAWS nay irshaad farmaya hai ‘jisnay hamaray deen mein koi aisi baat nikaali jo us
mein nahi to woh mardood hai’ (Bukhari shareef)

145) Satar kisay kehtay hai?

A) jism kay us hissay ko satar kehtay hai jis ko duusron say chipana zaroori hai

146) Mardon kay satar kahaan tak hai? (Mardon = men / boys)
A) naaf say laykar guthno tak

147) Mardon ko takhnay neechay paijama ya lungi wa ghairah pahenna kaisa hai?
A) us say hamaray Huzoor SAWS nay sakhti say mana farmaya hai aur us par jahannam ki waeed
sunaye hai aur yeh mutakabbireen aur gunaahgaaro ka tareeqa hai us say bachna laazim hai
(**note** : magar aurton kay liye takhnay dhaankna laazim hai)
148) Auraton ka satar kahaan tak hai?
A) chehray aur hateliyon kay siwa aurat kay liye poora jism satar mein dakhil hai
(**note** : na mehram say parda karnay mein chehra aur hateliyon ka bhi chipana laazim hai)

149) Auraton kay mehram kaun-kaun hai? (Auraton = women / girls)

A) Baap, dada, nana, mamu, chacha, taya, beta, bhatija, bhanja, bhai, damaad inkay a’lawa sub
na mehram hai

150) Kisi ki satar ko dekhnay ka kya gunaah hai? (Uzur = wajah, laanat=bahot ghussa)
A) Huzoor SAWS nay farmaya – Allaah laanat kartay hai, us shaks par jo jaan booj kar kisi ki satar
ko dekhta ho aur us par bhi laanat hai jo bina kisi uzur kay satar dhikhatay ho

151) Auraton aur mardon ka ek doosray ki naqal karna kaisa hai?

A) Huzoor SAWS nay laanat farmayi hai un mardon par jo apnay aap ko auroton ki tarah banatay
hai aur un auroton par jo apnay aap ko mardon ki tarah banaati hai (yaani kapday wa ghairah
 pahenna)

152) Musahfa ek haat say karna chahiye ya do haath say? (Musahfa = haat milana)
A) Musahfa doono haat say karna chahiye

153) Asma e husna kisay kehtay hai? (asma e husna = Allaah kay sifaati naam)
A) Allaah kay naamo ko asma e husna kehtay hai

154) Asma e husna kitnay hai?

A) Asma e husna 99 hai
(Allaah ka zaati naam ‘Allaah’ hai aur us kay alawah Allaah kay jo bhi naam hai woh sifaati
naam kehlatay hai)

155) Asma e husna yaad karnay ki kya fazilat hai?

A) Huzoor SAWS nay farmaya kay - jis nay asma e husna ko jama (yaad) karliya woh jannat mein
dakhil hoga

156) Masjid kisay kehtay hai?

A) jo jagah khalis Allaah ki ibadat kay liye chuni gayi ho woh masjid hai

157) islaam ki teen mashoor masjido kay naam kya hai? (Mashoor = famous)
A) Masjid e haraam, masjid e nabawi aur masjid e aqsa

158) imaam kisay kehtay hai?

A) Jo shaks aagay khaday hokar namaaz padhata hai (jamaat ki namaaz mein) usay imaam kehtey
hai

159) Muqtadi kisay kehtay hai?

A) imaam kay peechay namaaz padhnay walay ko muqtadi kehtay

160) Akaylay namaaz padhnay waalay ko kya kehtay hai?

A) Munfarid

161) Azaan kisay kehtay hai?

A) Namaaz say pehlay ek aadmi buland awaaz say maqsoos alfaaz mein Allaah ki badayi karta hai
aur namaaz ki dawat dayta hai usko azaan kehtay hai

162) Azaan daynay walay ko kya kehtay hai?

A) Mu’az’zin

163) Kin namaazon kay liye azaan di jaati hai

A) Paanch farz namaazon aur juma ki namaaz kay liye azaan di jaati hai

164) Bayaan kisay kehtay hai?

A) Deen ki baat loogon kay saamnay pesh karnay ko bayaan kehtay hai

165) Hamd kisay kehtay hai?

A) Nazam kay andaaz mein Allaah ki tareef karnay ko hamd kehtay hai
166) Naat kisay kehtay hai?
A) Huzoor SAWS ki tareef mein padhay gaye ash’aar ko naat kehtay hai

167) islaami maloomaat kisay kehtay hai? (islaami maloomaat = islamic knowledge)
A) Deen islaam ki baatein jaan laynay ko islaami maloomaat kehtay hai

168) ilm e deen hasil karnay say kya milega? (ilm e deen = islamic knowledge)
A) Huzoor SAWS nay farmaya kay jo shaks ilm e deen hasil karnay ki koshish karta hai - Allaah
us kay liye jannat ka raasta asaan farmadaytein hai

169) ‘Masail’ aur ‘fiqha’ kisay kehtay hai?

A) Masail : Deen ki woh baatein jin mein amal ka tareeqa ya uska saheeh aur ghalat hona bataya
jaaye –usko‘masail’ kehtay hai
Fiqha : amali zindagi kay ahkaam ko dalaa’il ki raushni mein jaannay ka naam ‘fiqha’ hai

170) Fiqha kay mashoor imaam kitnay hai ?

A) fiqha kay mashoor imaam 4 hai :1) Imaam e Abu Hanifa (Rahmatulaahi alaih)
2) Imaam e Shafaee (Rahmatulaahi alaih)
3) Imaam e Maalik (Rahmatulaahi alaih)
4) Imaam e Ahmad bin Hanbal (Rahmatulaahi alaih)
(R.H.) = RAHMATULLAAHI ALAIHI (un par Allaah ki rahmat ho)

171) Deen ka ilm rakhnay walay ko kya kehtay hai? (aalim = moulana / scholar)
A) Aalim

172) Shra’ee masail ka jawaab daynay walay ko kya kehtay hai?

A) Mufti

173) Huqooq kya hai aur uski kitni qismay hai? (Huqooq = rights)
A) Huqooq woh hai – jin ki adayegi humaray upar farz hoti hai.
Huqooq ki 2 qism hai
1. huqooq ul laah – yaani Allaah kay huqooq jaisay – namaaz, roza, zakaat, hajj wa ghaira
2. huqooq ul e’baad – yaani bando kay huqooq jaisay – maa-baap kay huqooq, aulaad kay huqooq, padosi
kay huqooq wa ghairah

174) Ek musalmaan kay doosray musalmaan par chand huqooq batao?

A) ek musalmaan kay doosray musalmaan par 5 huqooq hai :
1) salaam ka jawaab dayna
2) mareez ki mizaaz pursi karna
3) janazay kay saath jaana
4) daawat qubool karna
5) cheenk ka jawaab dayna (yar hamu kal laah) kehna

175) Salaam karnay ka kya hukum hai?

A) jab kisi musalmaan say mulaqaat ho to “as salaamu alaikum wa rahmatullaahi wa barakatuh”
kehna hamaray Huzoor SAWS ki sunnat hai (aur is salaam par 30 neikiyaan hasil hoti hai)

176) Salaam kay jawaab daynay ka kya hukum hai?

 A) salaam ka jawaab dayna bahot zaroori hai agar jawaab nahi dayga to bahot gunaahgaar hoga

177) Talbaa (students) par ustaad (teacher) kay kya huqooq hai? (talib e ilm – student)
A) Ustaad bhi maa-baap ki tarah hai – isliye ustaad ka bahot adab aur ahteraam karein aur unki
baton ko maanay – unki khidmat karein aur hamesha uskay liye dua karein

178) Kisi musalmaan (eeza e muslim) ko takleef dayna kaisa hai?

A) Haraam hai

179) Namaaz say pahlay haat, muuh, pair aur sar ka masah karnay ko kya kehtay hai?
A) Wuzu

180) Tayammum kisay kehtay hai?

A) Paak mitti ya us jaisi cheez say badan ki paaki hasil karnay ko tayammum kehtay hai

181) Karbala kaun sa muqaam hai?

A) iraaq mein ek jagah ka naam hai jahaan Hazrat Hussain (R.A) ki shahadat huyi

182) Aab e zam – zam kya hai? (Aab e zam - zam = zam - zam ka paani)
A) Barkat waala paani jis ka ku’aan kaaba kay paas hai

Huzoor SAWS nay farmaya – neiki ki raah batanay waala, neiki karnay waala ki tarah hai
-Deen aasaan hai -Paaki aadha emaan hai -haya emaan ka hissa hai -achchi baat karna neiki hai - (hadees)

183) Sadqay jariyah kisay kehtay hai? (sawaab e jariyah = sadqay jariyah)
A) Koi aisa neik kaam jis ka sawaab marnay kay baad bhi milta rahay jaisay masjid ki tameer karna,
ku’aan kudhwana jis ka paani loog istemaal karein wa ghairah

184) Esaal e sawaab kisay kehtay hai? (marhumeen = jin ka inteqaal hogaya ho)
A) ibadat e maaliyah (maal) ya tilawat e quraan ka sawaab marhumeen ko bhejna esaal e sawaab
kehlata hai jaisay – Sadqa, hajj wa ghairah
185) Gaana sunna kaisa hai? (Gaana = songs / music)
A) Huzoor SAWS nay farmaya gaana sunnay say dil mein nifaaq paida hota hai aur irshaad farmaya
kay qiyamat kay din aisay logon kay kaano mein seesa pighla kar daalajayega, isliye gaana
sunnay aur sunaanay say bachna laazim hai

186) Tasveer khichna aur khichwana ya jaandaar tasveer banana kaisa hai? (Tasveer = photograph)
A) bahot bada gunaah hai - Huzoor SAWS nay farmaya aisay logon ko qiyamat kay din saqt azaab
hoga

187) Qiblay ki taraf muuh ya peeth karkay istenjaa karna kaisa hai?
A) Aisa karna gunaah hai

188) Khaday ho kar payshaab karnay ka kya hukum hai?

A) khaday ho kar istenjaa na kiya jaaye – khaday ho kar karnay mein bahot say nuqsanaat hai

189) Kapday ya jism par payshaab kay chitay padh jaaye to kya karein?
A) fauran dho liya jaaye kyunki Huzoor SAWS nay farmaya kay payshaab kay chiton say bacho
kyunki qabar mein azaab payshaab say na bachnay ki wajah say hota hai
190) Jhoot bolna kaisa hai?
A) jhoot bolna bahot bada gunaah hai – ussay aadmi halakat mein parjata hai

191) Gaali dayna aur jhagdra karna kaisa hai?

A) bahot bada gunaah hai

192) Urdu kis ko kehtay hai?

A) Hindustaan mein musalmaano ki aam zubaan ko urdu kehtay hai

193) ikhlaas kisay kehtay hai?

A) Har kaam mein Allaah ko raazi karna aur khush karna maqsood ho - woh ikhlaas hai

194) Riya kaari kisay kehtay hai?

A) Neik kaamo mein ghair ul laah ki khushi aur diklawa maqsood ho - woh riya hai

195) Sood layna dayna, sood khana aur sood kay kisi bhi muaamlay mein padhna kaisa hai?
A) Haraam hai (sood = interest)

196) fashion parasti ka kya hukum hai?

A) musalmaano ko har muaamlay mein Huzoor SAWS ki taleemaat par amal karna laazim hai –
Fashion kay taur par ghair – musalmaano ki naqal karna aur unki mushabihat ikhtiyaar karma
bada gunaah hai

197) munafiq ki nishaaniyaan kya hai?

A) Huzoor SAWS nay farmaya kay munafiq ki 4 nishaniyaan hai :
1. jab baat karein to jhoot bolay
2. kisi say waada karay to waada khilaafi karay
3. amanat mein qiyanat karay
4. kisi say bahez ho jaaye to gaaliyaan day

Zaaya hai woh ilm jis par amal na kiya jaaye

198) Kuch aasaan neikiyaan batao?

A) Huzoor SAWS nay farmaya –
 YATEEM KAY SAR PAR HAATH PHAIRNA : jab koi shaks yateem kay sar par haath phairta hai to Allaah
har baal kay badlay mein neikiyaan ata farmata hai
 ACHCHAY AKHLAAQ : momin apnay achchay akhlaaq ki wajah say, khaday ho kar ibadat karnay walay
aur roozay daar kay martabay ko haasil karlayta hai
 MUSALMAAN KI TAKLEEF DUUR KARNA : jo shaks kisi musalmaan ki koi takleef wa parayshaani duur
karayga to us amal ki wajah say Allaah qiyamat kay din us ki takleef wa parayshaaniyon ko duur
kardayga
 TASHBEEH : jis nay din mein 10 martaba ‘subhaan nal laahi wabi hamdihee’ kaha to us kay gunaah
muaaf kar diye jaayeingay agar chay samundar kay jhaag kay barabar hi kyun na ho aur jis nay 100 baar
‘SUBHAAN NAL LAAHI WABI HAMDIHEE’ padha uskay liye 1,24,000 neikiyaan likhijaayengi

 MOMIN KAY LIYE DUA KARNA : jo shaks mumin mard aur auraton kay liye dua e maghfirat karein to
usay har mumin mard aur aurat kay badlay Allaah ek neiki ata kartein hai
  KALIMA PADHNA : jo bhi banda kisi waqt din ya raat mein ‘LAA E LAAHA ILLAL LAAH’ kehta hai to us
kay burayiyaan mit jaati hai aur us kay badlay neikiyaan likh di jaati hai
 QURAAN KI TILAWAT : jo bhi shaks quraan ka ek bhi lafz padhay usay 10 neikiyaan milti hai aur alif laam
meem ek harf nahi balkay alif ek harf hai aur laam ek harf hai aur meem ek harf hai – jis par 30 neikiyaan
milti hai
 SALAAM KARNA : kisi musalmaan ko ‘as salaamu alaikum wa rahmatul laahi wa barakatuh’ kay alfaaz
say salaam karnay par 30 neikiyon ka sawaab milta hai
 DUROOD E SHAREEF : juma kay din asar ki namaaz padh kar usi jagah baith kar yeh durood 80 baar
padhnay par 80 saal kay neikiyaan miltay hai aur 80 saal kay gunaah muaaf hotay hai
“ ALLUMMA SALLI A’LA MUHAMMADIN NIN NABI YIL UM’MI’YI WA ALA AA’LIHI WASAL’LIM
TASLEEMAA” aur jis nay ‘JAZ ALLAAHU ANNAA MUHAMMADAM MAA HUWA AHLU’ ek baar
padha us kay liye 70,000 faristay ek saal tak neikiyaan likhtay rahengay
 QURAAN KA SAWAAB : 3 baar suray fatiha padhnay par 2 quraan ka sawaab hai, 4 baar ayatal kursi
padhnay par 1 quraan ka sawaab hai, 4 baar suray qadar padhnay par 1 quraan ka sawaab hai,2 baar
suray zilzaal padhnay par 1 quraan ka sawaab hai, 2 baar suray al adiyaat padhnay par 1 quraan ka
sawaab hai, 4 baar suray nasr padhnay par 1 quraan ka sawaab hai, 4 baar suray kafiroon padhnay par 1
quraan ka sawaab hai, 1 baar suray yaseen padhnay par 10 quraan ka sawaab hai.
 SURAY TAKASUR : 1 baar suray takasur padhnay par 1000 quraan ki ayatein padhnay ka sawaab hai
 LA HAULA WALAA QUWWATA ILLAA BIL LAAH : padhnay mein 99 bimariyon ki dawa hai aur sub say
halki bimari fikar aur parayshani hai
 LAA E LAAHA ILLAL LAAHU WAHDAHOO LAA SHAREEKA LAHOO A’HADAN SAMADAN LAM YALID
WALAM YUU’LAD WALAM YA KUL’LAHOO KUFUWAN A’HAD : ek baar padhnay walay kay liye 20,000
neikiyaan likhijati hai
 ALLAAHUM’MA A’JIRNEE MINAN NAAR : yeh dua har roz fajar aur maghrib kay baad 7 baar padhi jaaye
to Allaah usay jahannum ki aag say mehfooz rakheingay

199) kisi ghair-muslim ko agar musalmaan banna hoto kya karna chahiye? (maanay = meaning)
 maanay samajh kar dil say maannay aur zubaan say is baat ki gawahi day kay - “Allaah kay siwa koi
ibadat kay layaq nahi aur Muhammad SAWS Allaah kay rasool hai”
( yaani kalima shahadat padhay -
‘Ash hadu al laa e laaha il’lal laahu wa ash hadu an’na muham’madan abduhoo wa rasooluh’ )
 Phir ghusl karkay paak hojaaye
 Achcha sa islaami naam rakhay
 ilm e deen sikhay – jaisay wuzu,ghusl wa ghairah aur quraan sikhay aur us ki tilawat karay
 Namaazo aur duusray islaami ahkaam ki pabandi karein
 Aur ulema (aalim) say madat aur rahnumayi hasil karein

200) Tarjuma – kalmaat e islaam aur emaan e mujmal

 2nd KALIMA SHAHADAT : ASH HADU AL LAA E LAAHA IL’LAL LAAHU WA ASH HADU AN’NA
MUHAM’MADAN ABDUHOO WA RASOOLUH.
(gawahi dayta hoon kay Allaah kay siwa koi ibadat kay layaq nahi aur gawahi dayta hoon kay
Muhammad SAWS Allaah kay banday aur us kay rasool hai)

 3rd KALIMA TAMJEED : SUBHAANAL LAAHI WAL HAMDU LIL LAAHI WA LAA E LAAHA ILL LAL
LAAHU WAL LAAHU AKBAR, WALA HAULA WALA QUW’WATA IL’LAA
BIL’LAA HIL ALI YIL AZEEM.
(Allaah ki zaat har aieb say paak hai aur tamaam tareefein Allaah hi kay liye hai aur Allaah kay
siwa koi mabood nahi aur Allaah sub say bada hai aur nahi hai gunaahon say bachnay ki taqat
aur neiki karnay ki ki quwwat magar Allaah ki taufeeq say jo buland hai azmat wala hai)
  4th KALIMA TAUHEED : LAA E LAAHA IL’LAL LAAHU WAH DAHOO LAA SHAREEKA LAHOO, LAHUL
MULKU WA LAHUL HAMDU WAHUWA A’LAA KUL’LI SHAI IN QADEER.
(nahi hai koi ibadat kay layaq siwa e Allaah kay woh akayla hai uska koi shareek nahi – usi kay
liye mulk hai aur uski tareef hai aur woh har cheez par qaadir hai)

 EMAAN E MUJMAL : AAMANTU BIL LAAHI KAMAA HUWA BI ASMAA E HEE WA SIFAA TIHEE WA
QABILTU JAMEE'A AH-KAAMIH.
(emaan laya mein Allaah par jaisa kay woh apnay naamo aur sifaton kay saath hai aur mein nay
us kay tamaam ahkaam qubool kiye)

201) Miswaak kay kuch faieday batao?

 Muh paak aur saaf hota hai
 Allaah razi hotay hai
 Muh say khusboo aati hai
 Daanton ko saaf karti hai
 Masoordon ko mazboot karti hai
 Meiday (stomach) ko saaf karti hai
 Balgham ko khatam karti hai
 Zubaan ko saaf karti hai
 Chehray ko raunaq dayti hai
 Faristay khush hotay hai

202) ‘Hidayat’ aur ‘Maghfirat’ kay matlab kya hai?

A) Hidayat : seedha raasta, neik raah(siraatum mustaqeem)
Maghfirat :muaaf karna, gunaah par giraft na karma

( ***Note*** : Mazeed tafsilaat kay liye ulema (aalim) say poochay )

(********PRINT & DISTRIBUTE FOR ENDLESS REWARD********)

JOINTLY COMPILED BY :

NOOR BAITULMAAL
Office : 12/2 R.T., Prakash Nagar, Begumpet, Sec-bad-03, India.
Contact : 98854 79221, 040- 27762512
______________________________________________________________________________________________
Centre for providing financial assistance to poor muslims widows
(Donation of Zakaat , Sadqaat & Qurbani Skins are invited)

TALEEM E BALIGHAAN
(A division of Madarsa Siddiqia Arabia)
Viqar Nagar, Oxford High School,
Principal : Hafiz Mohd. Ishaaq (Khateeb Masjid e Arqam) Ph : 98854 79221
Hafiz Abdul Hafeez (Naib Imaam Masjid e Arqam) Ph : 99666 63017
______________________________________________________________________________________________
Centre for learning :
 1. Nazirah Quraan 2. Arabi Qaedah with Tajweed
3. Deeniyaat 4. Urdu

USEFUL ISLAMIC WEBSITES :

 www.deeneislam.com
 www.darsequran.com
 www.kr-hcy.com CELL-PHONE MADARSA
 www.ahlehaq.com
 www.islamibayanaat.com FOR ISLAMIC - DUAS - KALIMAY & ISLAMIC SMS:
 www.deeniyat.com SEND 3 SMS FROM YOUR CELL PHONE –
 www.minsid.com TYPE SEND TO
 www.noorehidayat.org JOIN ISLAMITALEEM – 09870807070
 www.khanqah.org JOIN ILM4MOMN – 09870807070
 www.khatm-e-nubuwwat.com DEENIYAT – 54646
 www.armughan.in
 www.practiceislam.com ( THE ABOVE SERVICES ARE FREE & FOR INDIAN
 www.syedanzarshahqasmi.com MOBILES ONLY )
 www.alquranic.com
 www.quranicsciences.com
 www.3dmekanlar.com
 www.muftitaqiusmani.com
 www.central-mosque.com

you can send suggestion & comments or any Islamic material, books or websites you
have etc. &
if you need any Islamic books, articles & materials etc. please mail me –
AKHILISM@GMAIL.COM

_______********_______