RAM CHU I LUAH ANG U Khawtinthanga Ralte Orissa for Christ chuan hmachhawp awm sa bawhzui tur leh

hmachhawp thar tam tak a duang leh tawh a. Hengte hi mi thahnemngai sum thawh khawm atanga Orissa Kristian tihduhdah tuar te tana an thawh sak tur hi Zoram mipui te hriat ve zel hi a pawimawh avangin chanchinbu mi te pawhin rawngbawlna a ngaia lo pho chhuak leh turin ka sawm che u ani. 1. Chenna in 30 vel leh biakin 7 sak tur pawimawh bik la awm hi chhunzawm turin Ni 25/1/2011 khan Pu. P.C. Lalkhuma Venghlui mistiri Leader hovin mi 5 an liam thla leh ta a. Anni ho hi kum hmasa lama zuk kal tawh, a ngaihna hria vek an kal leh thei hi a lawmawm hle, i tawngtai pui ang u. 2. Committee in rusum li bera a hman Khandamal District Kristian te hi kristian naah nghet hle mahse, Pathian thutak hriatna ah an hniam avangin chhandamna leh piantharna awmzia pawh an la hre lo tluk a ni a. Heng ah te a hma an sawn theih nan Leadership Training hi urhsun taka ni engemaw zat neihpui turin Patron Upa Dr.P.C.Biaksiama leh Pu Saihmingthanga Sailo te pawh 25.1.2011 khan an zu kal mek bawk a. Udhaiguri/Happy Valley, Kotagar leh Jeypore khua ah te Training hi neihpui an ni ang. Mi 5000 emaw vel lai te chu pungkhawm thei tura beisei an ni. Tawngtai miten he training hi a hlawhtling ngei theih nan tih tak zet a tawngtai pui turin kan sawm che u a ni. 3. Healing Crusade : Kandhamal District chhunga Healing Crusade nei turin Pi B.Lalremtluangi leh Pu R.Vanlalzauva te chu February 2011 chhung hian an zuk thawk thla leh dawn a, hei pawh hi nasa taka tawngtaipui an ngai bawk a, theihtawp i chhuah leh ang u. 4. Ramluah thu : Kan Synod hian he kumthar ah hi chuan helai Kandhamal ah emaw hian Missionary tir in hma a la tawh ang chu maw tiin a ngaichang reng a, mahse chutiang lam a awm tak loh ah chuan Committee chuan ngaihtuahna thar neiin thil chi 4 hlawm lian tak tak a ruahman chhin ta a ni. a) Evangelism : Heng tribal mawl tak tak leh dinhmun hniam tak tak kristian te hi Pathian thu taka chawmlian tur leh chhandamna leh piantharna thu te kohhran kalhmang pangngai anga kohhran phunngeh tur te a rawngbawlna zu tan turin thlaraubo vei mi, Evangelistic Theologian ah te inpe thei awmse a duh hle a, chutiang mi chu Lalpan la pe ngei turah beisei ila. Tunah hian Pu R.Vanlalzauva, Revival Speaker pawh he rawngbawlna tan tur hian a inpeih reng a, ani hi he Committee ViceChairman pawh a ni a. Tin, Pu P.C.Lalkhuma, Mistiri Leader ber pawh tawng thiamsa lo ni bawk nen,he rawngbawlna tan tur hian a inpeih reng bawk a, bung nghal mai thei tur a ni. He District chhunga rawngbawl mek Rev.Dr.Samantha chuan Bangla

nuam tak leh Quarter sak sa mizo rawngbawltu te ngei luah mai theih turin a dah awl reng a, ani hian min nghak reng bawk a ni. b) Education : Heng hnam hnufual lutuk ziak leh chhiar thiam lo ten Bible tal an chhiar thiam ve theihna turin Elementary Sikul kristian naupangte tan hawnsak hi thil pawimawh takah a ruat bawk a, hmalak dan ngaihtuah zel ani ang. c) Health Care : A ram sawrkar hmasawnna in a thleng pha lo lutuk hi hriselna lam ngaihtuahpui pawh an tul hle a ni. Damdawi lamthiam inpe thei te pawh la mamawh zel tur a ni. d) Economic : Eng zirtirna tak tak mah an la dawng lo va, helai ram hi a kilkhawr deuh bawk a, tlawh pawptu an awm lo ani ber. A ram hi a tha em em thung a, awlsam taka eizawnna mumal insiamtheihna ram alo ni a, Aiengte a tha duh em em a, an eizawnna tak pawh ani a, mahse an mawlna khu remchangah hmangin Maruari hovin anmahni duh angin Kg .ah Rs.2/- chauhin an leisak thin a, khawpui lamah lalutin an process hnu ah Kg.ah Rs.80/- te in a hralh leh chur chur thei si a. Chuvangin hma han lak puiin processing han tihsak ila nasa takin an retheihna pawh kan sutkianpui thei ang tih ngaihtuahna pawh a awm a, heng ti hlawhtling tur hian thil harsa lutuk awmin a lang lova ni. Amaherawhchu kan sawi tak zawng zawngte kha ti hlawhtling tur chuan tawngtai mi te nasa taka tawngtaiin Pathian hnenah an tan i dil pui ang u. Tun tuma Upa Dr.P.C.Biaksiama te kal tur hian heng kan sawitak survey hna te pawh uluk takin an rawn nei nghal tura ngaih a ni a. Chik taka zir chian a, he District pumpui pawh hi tlawh kual vek pawh a tul ang. RAMLUAHTHU la tur an nih avangin an pawimawh hle a, Pathian hruaina kan dilpui ang a, he District hi Lalpa rama puang thei turin zoram kristian te inbuatsaih ila, chumi atan chuan nasa takin Lalpa hnenah I dil ang u. Ka hmingin engpawh indil chuan chu chu ka ti zel ang. (John 14:14) Lalpa chuan amah ringtlattu te chu tanpui turin khawvel zawng zawngah a mit a len ruai ruai thin a ni (II Chro 16: 9) he rawngbawlna atan hian chhiartu duh tak i rilru lo hmang ve thin ang che. Headquarter : Upa Dr. Rokamlova Building, Dawrpui. Phone - 9436154566 Copy to :-Editor _____________________________ Khawngaihin i Chanchinbu zahawm takah ka thuziak hi min lo puanchhuahsak turin ka ngen a che. I rawngbawlpui,

KHAWTINTHANGA RALTE Dinthar Tlang, Aizawl.