Terwi tebberwi

Sγur: D.Messaoudi

Ta d tawacult n yimaγrasen
Гurwat igumiyen !
Wa d agraw n yiwaṭaniyen
Гurwat ifṛankfunen !
Wa d akabar n yiğemhuriyen
Гurwat inselmiyen !
Wa d amussu n yimsezzayeriyen
Гurwat imesγerrbiyen !

Terwi tebberwi
Igguma ad d-iban yixef-is

Kra ččan ṛwan yerna rran ayen ran di rrif

Kra ddan εerrian yerna zhan s yeγsan war adif
D imṛayen i yeččan d nitni i yeṭṭfen aṣarif
D imnayen i yeεran d nitni i yeddmen ssif

Terwi tebberwi
Igguma ad d-iban yixef-is

Wi n umalu wi n usammar
Wi n temdinin wi n tuddar
Kečč d amsaltu wi d imukar
Kečč d ufrin wi d tisigar

Terwi tebberwi
Igguma ad d-iban yixef-is

Ayen yebγun iḍru di tmurt ur igi i uneγmas aγilif

Serrin isallen ẓiden am ttut ur islik uγmis m’ur islif
Aggag yugin kennu γur-sen m’ur immut ittwazen d utlif
Seftin gar-aγ abihu berriken seγrin tidett mi tettiẓẓif

Terwi tebberwi
Igguma ad d-iban yixef-is

Atan mmi-s n ccahid neγ amjahed

Semdet-as ar tt-iqqed
Atan mmi-s n winna wer n-juhed
Sekkest-as seg wayen ismed

Terwi tebberwi
Igguma ad d-iban yixef-is

Ittwasettef uγerbaz yerna ittwanna i uselmad εemmed

Гas ur ilmid unalmad kra xersum γef ubrid ibεed
Innerra uγerbaz d tagrurt tanaḍt n uselmad tettwanγed
Гas ur d-iggri di tγuri wayra nitni la qqaren tekkat treεεed

Terwi tebberwi
Igguma ad d-iban yixef-is
 Netta d amṛay ayen iga ilha
Гas ulamma d ssafuha
Netta d menwala la s-qqaren ha
Гas ulamma d stettuha

Terwi tebberwi
Igguma ad d-iban yixef-is

Siwel ay-ungif susem ay-ufhim

Immečč wukrif inṭerr wufḍim
Siker amγid sutel bu-udrim
Imzel ur immid iwḥel ur iḍlim

Terwi tebberwi
Igguma ad d-iban yixef-is

Sufella “ssidna” izha ijjawen meṛṛa ay icedha

Swadda agdud “irḍa” s qassamen netta idha
Inaw-is dayem iwata iṣka akk γef tmucuha
Win ikerhen ay d-inna aḍad γur-s iwehha

Terwi tebberwi
Igguma ad d-iban yixef-is

Acu ara d-yeg upetrul ay ibγu yerr-it-id d adrim

Гas taxzant tsettef teččur mačči i ugdud ara d-iqqim
Senzen ula d tiniri yes-s bnan s ublaḍ urqim
Sufγen acḥal d ikerri εni tettum Bettou wer n-γrim ?

Terwi tebberwi
Igguma ad d-iban yixef-is

Mi nedda d wa ideqqem-aγ wihin

Mi nγil akk-a teffeγ-aγ akk-ihin
M’ur nemmut da tguna-y-aγ dihin
M’ur neqbil ta sqeblen-aγ tihin

Terwi tebberwi
Igguma ad d-iban yixef-is

Yal argaz nebγa γeḍlen-t ur d-yuli

Ma d win d-sbedden fell-aγ ur d-idli
Yal ma nḍal s azekka skeflen-d iḍelli
Ma γef iḍelli ssawlen deg-s ur nelli

Terwi tebberwi
Igguma ad d-iban yixef-is

Nnan kkset taṛumit ta d tutlayt n wid iggumin

Asmi nessuter tamaziγt serkin-d fell-aγ at-ddin
Asmi tenneḍran tlafsa γur-sen qeblen zunik ay ugin
Nnan daγ si tama-nniḍen ifti wazal n taεrabt γef sin

Terwi tebberwi
Igguma ad d-iban yixef-is

Di yal tiγmert ağadarmi neγ aεsekri ibded di tili

Imi nitni d inezgalen n tmetti γur-sen aqader ur illi
 M’ur k-iwala tumeẓ-ik tegdi s tṛuka ara k-isemlelli
Ma teccetkaḍ fell-ak terki yax anezzarfu yid-s ittili

Terwi tebberwi
Igguma ad d-iban yixef-is

Mahel ar d-ifak waggur tessutreḍ adrim di medden

Xemmel ad d-tawiḍ amur s yicekkalen ara k-ddmen
Nṣebber ar d-fell-aγ iferreğ kemmlen deg-neγ ẓẓaden
Uqbel ad d-fell-aγ ifeğğeğ s ugerruj ad sriffgen

Terwi tebberwi
Igguma ad d-iban yixef-is

Anida terriḍ ḍefren-k am tili-k

Anida teddiḍ gemren-k am ubrik
Anisa tekkiḍ tessenzeḍ iri-k
Anisa tbdiḍ tesḥeṣleḍ ixef-ik

Terwi tebberwi
Igguma ad d-iban yixef-is

Seg mi terwi tebberwi γef yizzayeriyen

Uγalen meṛṛa am yiḍan yesḍen
Deg wagar-asen s urrif la ttemyegzaren
Armi ttun wid-nni i ten-ismerkayen

Terwi tebberwi
Igguma ad d-iban yixef-is

Aki ay-azzayri kzi acengu-y-ik

Cemmeṛ i yiγallen ddem amrig-ik
Ggal ur ḥennet ad d-terreḍ nnif-ik
Гtes ur ttuγal ad yalek wawal-ik

Terwi tebberwi
Maca iban ad d-iban yixef-is

Wali s wallen-ik ay ttegen yimasayen

Kzi s wallaγ-ik m’ur musen iεdawen
Nadi s timmad-ik anida i ddren
Seqsi s yimi-k acu i ttetten
D acu d wanida kesben i warraw-nsen
D acu wi lemmden d wanida qqaren
Aniwi issazfen Lezzayer γlayen
Aniwi i d-isnulfan imesrebraben

Terwi tebberwi
D ulaqrar ad d-iban yixef-is