Editor: H.

Malsawmtluanga
Ph: 9615425400 / 9436784572 sawma6970@gmail.com

Thingsulthliah Students Union

Jt. Editor: Lalromawia Ph:2370285 Correspondents: K.Khualluna : 9862217691 Lalbiaktluanga : 9612322711 Ramngaizuala : 9862386148 ramngaiahmar@gmail.com

Thingsulthliah Sub - Town Weekly Newspaper

VOL. VII

No. 32 THINGSULTHLIAH

Ni 24 August 2013

(INRINNI)

CRUSADE & CAMPING

Nizan atang khan Thingsulthliah Corps Biakin-ah Crusade neih a ni a, Speaker J.Lalthangliana, TEM Speaker, Tachhip Corps niin team member 15-in an tawiawm. Crusade hian Pathianni zan thleng a awh ang a, Karleh Thawhleh zan atangin Tst S.A. Complex-ah a mamawhtu apiangte tan Chhandamna Camping buatsaih chhunzawm a ni ang. Camping lut turte chuan Buhfai mahni tla tawk tur, Mutbu leh Thosilen, Bible leh Note bu, hlabu, pen, Mombati te ken tur a ni. Tlai dar 5:30-7:00 chhungin Registration tihfel vek tur a ni. RAWNGBAWLNA NEI DAWN Vawiin Inrinni zan atanga naktuk Pathianni zan thleng awh turin, Tst Presbyterian Kohhran-ah Pu Lalremruata (Synod Revival Speaker) chuan rawngbawlna a rawn nei dawn a. Hei hi Synod hmalakna, tun kumtawp a Mizoram Inthlanpui a boruak tha leh muanawm tak a awm theihna tura hmalak kal zel bawhzuina tura tih a ni. ANTI-TOBACCO CAMPAIGN Nimin ni 23.8.2013(Zirtawpni) khan Thingsulthliah High School leh Higher Secondary School-ah Anti-Tobacco Awareness Campaign neih a ni. Campaign neia lokal te chu Pu V.L.Bela, Vice President, Indian Society on Tobacco & Health(Mizoram Chapter), Pu R. Lalremruata, Project Coordinator, Mizoram State Tobacco Control Society leh Pu K. Lalchhanhima, Chairman, Anti-Tobacco Committee, Thingsul-Tlangnuam te an ni. Chawhma-ah High School ah kalin chawhnuah Tst HSS-ah Anti-Tobacco Awareness Campaign hi an nei. TEACHERS DAY PROGRAMME Tunkar Ningani khan Thingsulthliah Teachers Association (TTA) Executive ten Meeting an nei a. Teachers Day (5th Sept) chungchang an ngaihtuah a, Kumin Teachers Day lawm dan tur chu hetiang hian an rel. 1. School hrang hrang ten mahni School-ah theuh mahni remchan ang angin chawhma lamah hman nise 2. Chawhnu Dar 1:00 atangin Tst HSS-ah TTA member bakah Pensioner te nen programme siamin hman nise, tlaiah chawhlui kilho nise an ti. 3. Teachers Day pual hian CHC Poor Fund-ah Rs. 2000/- pek nise. 4. Teachers Day lawmna atan hian member tin ten thawhlawm thawh tur a ni a. Thawhlawm thawh dan tur hi School hrang hrangah chiang zawkin la inhriattir tur a ni. TUIRIAL RAL MAXI-CAB FOOTBALL TEAM LA CHAK ZEL Rajiv Gandhi Stadium, Mualpui, Aizawl a Maxi-cab Service hrang hrang te Football Tournament neih mekah Champion lai Tuirial Ral Maxi-cab Service te an la chak zel a. Tunkar Thawhlehni khan Champhai hnehin Nilaini-ah Lengpui Service hnehin semi-final an lut. Karleh Thawtanni-ah semi-final hi Serchhip leh Chhingchhip chak zawk zawk nen an inkhel dawn a, thawhtanni hian Final nen khelh zawh vek tur a nih avangin Tst sub-town Sumo service haw lam Timing hi a khaihlak mai thei a, mipui hriatthiamna an ngen lawk a ni. Final an luh loh chuan service pangngaia kal beisei a ni thung. Tuirial Ral Maxi-cab Welfare Association hian CTI atanga Tlungvel a huap a ni.

LUNGNGAIH DAR RI Ni 19.8.2013(Thawhtanni) Dar 4:10 pm khan Pu R. Lalchhuanawma(54) H/o Chhiarkimi, Tst C/A Aizawl Road chu Kalna avangin an inah a boral a. Lumenpui niin a tuk ni 20.8.2013 Dar 11:00 am-ah Major J.C. Ngurthanzauva, C.O. in a vui. POOR FUND PE Tunkar Thawhlehni khan Tst HSS Students Evangelical Union ten Tst CHC Poor Fund atan Rs. 500/- an pe a, CHC Staff te an lawm hle. CLERK THAR Tst. Govt H/S a thawk turin RMSA hnuaia Clerk Pi Malsawmdawngliani chuan ni 19.82013 khan Joining Report a rawn pe a, amah hi Maternity Leave la mek a ni a, ni 29.8.2013 atangin a chawlh lak a zo ang a, a rawn zawm fel ang. Amah hi RMSA hnuaia Sesawng High School-a thawk a ni a, Tst High School-ah rawn sawn a ni. LAB. TECHNICIAN-AH Pi Malsawmsaki(Tete-i) W/o ST Lalremfela, Seling chu Laboratory Technician hna hmu tharin tunkar Ningani khan Rabung PHC-ah a hna thar hi a han zawm. TST-AH RAWN SAWN LEH
Pu R. Zathianga. C/A(Switch Board Operator) P&E Department, Saitual SubDivision a sawn, hun eng emaw chen a han thawh hnuah Tst-ah rawn sawn leh niin, tunkar Thawhtanni atang khan a hna hi a zawm leh a ni.

RAWN TLAWH DAWN Naktuk Pathinni hmang hian Chawlhhmun UPC(NEI) LAD te chuan Thingsulthliah UPC(NEI) Kohhran an rawn tlawh dawn a. Vawiin-ah lo thlengin karleh Thawhtan-ah an haw leh ang. GOLDEN JUBILEE ORG. COMMITTEE
Nizan khan Thingsulthliah H/S Golden Jubilee Celebration Organising Committee te NREGS Building Thingsulthliah-ah an thukhawm a. Golden Jubilee lawm hun tur chungchang lo ruahman tawh te thlirna neiin a hun tur te an ngaihtuah tha leh niin kan lo hria.