SIMEIKHU KARTIN CHHUAK THINGSULTHLIAH

Dt. 31 August 2013 (INRINNI) PHEK- 3

I hria em? RAMTHAR NI HI Mizoram-a Welsh Missionary lo lut hmasa ber Rev David Evan Jones, Mizo ten Zosaphluia tia kan koh chu ni 31 August 1897 khan Aizawl a lo thleng a. (a hnuhnung zawk, amah thlawp tura lokal Edwind Rowlands, Zosapthara tia koh chu a kum leh 1898 December ni 31-ah Aizawl a lo lut thung) Zosaphluia hian a hma kum 4 zet (11 Jan 1894 atanga 31 Dec 1897) Mizoram-a lo awm tawh Robert Arthington-a Missionary hmahruai Pu Buanga(J.H. Lorrain) leh Sap Upa(F.W.Savidge) te rawngbawlna rawn zawmin Pu Buanga te thian dun chu thla 4 a hrawn hman a; an hnen atang hian Zosaphluia hian Mizo tawng pawh a zir tan nghe nghe a ni. Mizoram-a Chanchintha rawn thlentu hmasa ber (Pioneer Missionary) Rev William Williams chuan Khasi rama a thawh laiin Sylhet lama Mizo Lung-in tangte hnen atanga Mizote chanchin a lo hriatin Mizoram kal duhna a nei ta a. Kum 1891 March 20-ah Aizawl-ah a lokal a. Mistiri leh kuthnathawka inhlawhfate hnenah Pathian thu hrilin tract te a sem a. Mizoram chanchin hi Welsh ramah a zu sawi a. Welsh Presbyterian Mission chuan kum 1892-ah Mizoram chu Missionary tirh luhna atan a thlang ta a. Mizoram-ah hian Rev William Williams chu tirh an tum ta a, mahse vanduaitlak takin a thi ta mai si a. Mi thar an dap leh a, an mithar kal tura an tih chu Theological College-a an zirtir chhungin hun a lo vei hman a. Hetih laiin Robert Arthington-a mi tirh Rev F.W. Savidge(Sap Upa) leh Rev J.H.Lorrain (Pu Buanga) te Mizoram-ah an lo chhuak a, kum 1894, January 11ah Mizoram an lo thleng a ni. A chunga sawilan tawh angin Welsh Presbyterian Mission tirhin Rev D.E.Jones(Zosaphluia) chu kum 1897 August 31-ah a lo thleng veleh ta a ni. Zosaphluia hi Mizoram-ah kum 30 zet a awm a. Amah hi kohhran hna kal zel thlir thiam tak niin, a remruat thiamna chu tun thleng hian Presbyterian kohhran hian a chhawr tangkai hle a ni. Zosaphluia te kha a tirah chuan Welsh Calvinistic Methodist kohhran-in an lo chhuak a, Welsh Mission tih hi hriat dan lar niin kum 1923 atangin Presbyterian kohhran vuah a ni. Synod Khawmpui (1972 Gen. No. 21) angin Zosaphluia Mizoram lo luh ni (31 August) hriatreng nan RAMTHAR NI hi hman chhoh a ni ta a, kum 1973 atang khan August 31 hi Ramthar Ni atan hman a lo ni ta a ni. NAUPANG KHAWMPUI Mizoram UPC, Tst Pastor Bial Naupang khawmpui chu vawiin atanga naktuk Pathinni thleng awh tur Thingsulthliah Kohhran-ah neih mek a ni. Vawiin Inrinni hian rorel a ni ang a, naktuk Pthianni-ah Naupangten thu leh hla hmangin intihsiakna an nei ang. Tin, Pathianni leh hian Presbyterian Kohhran Thingsulthliah Pastor Bial Naupang khawmpui neih a ni bawk ang a, an khawmpui hmanna hmun tur chu hetiang hi a ni ang. 1. Beginner Department Thingsulthliah Kohhran-ah 2. Primary Department Seling Kohhran-ah 3. Junior Department Hospital Veng Kohhran-ah 4. Inter & Sacrament Dept Tlangnuam Kohhran-ah CAMPING NEI Tunkar Thawhleh zan atang khan SA CpmplexThingsulthliah Corpsah Chhandamna Camping neih a ni a. Tukin zing chawei kham khan an chhuak. Camping hi chhawng hnihna neih chhunzawm tur leh tur loh chu naktuk Pathianni-ah ngaihtuah chawp a ni ang. Camping-ah hian mipa 33 leh Hmeichhia 25 (an vaiin 58) an lut a, mipa 2 chu Camp tluan lovin an chhuak leh. Camper te hi Presbyterian 13, SDA 2 leh UPC 2 niin a bak 41 chu Salvation Army an ni. Camping a lut tur hian Chanmari atangin 2, Seling 1 leh New Serchhip atangin 1 an lo lut a, a bak zawng chu Thingsulthliah khua vek an ni. HNATLANG Tunkar thawhtanni(26/8/2013) khan Seling Kohhran chuan hnatlang an nei a, Biakin pahnihna hmun tur an tihfai bakah Presbyterian English School te kalna tur P/S-I building an cheitha a, remchangah classroom pindan turte an siam leh ang.

A LO NIH TAK CHU AN TI - Thangthar hnena Taimak thu sawi tlak lem lo Kohhran/NGO leh Party hruaitu an awm fur ang an ti. - Tunlai vawk natna PRRS hri leng hian vawksa ei a ti tim lem lo an ti. - Tst Tlangpui a Tourist Lodge-ah hian Tourist hi engtikah nge an thlen ang an ti. - Sorkar Dan awmsa duh tawk lova mahni dan siam chawp lekkawh hi reilote atan chuan a hlawhtling duh an ti. - Kan Sub-Town hi Zu zawrh hlauhawmna, Zurui buaina siam leh rukru tana hlauhawm leh si lo kan ni ang em an ti. - Fur khawchhia hi zo se, kan Subtown-ah Camping/Crusade nge lar ang Inthlan Campaign an ti. - Zing tho hma te tana TV en dawna fakna inang channel hrang hrang a lang thup thup hi a va ninawm em an ti. - A thlawna inentirna mai ni lo, damdawi a thlawna sem telah hian inentir a chakawm bik an ti. - Mihlim lam ho hi sana vir loh zawngin an lam kual deuh zel an ti. - Pawisa ba teuh chunga Pathian thu awih awm taka awm hi a inhmeh lem lo an ti. - MLA inthlan a hnai tan a, Party Worker te biak an nuam leh tan tawh an ti. - Mahni in leh lo phu tawk aia incheina uar hi kan awm fur mai, a bik takin hmeichhe tleirawl-ah a ni zual bik an ti. - Zu khap nasat leh spring nem nasat hi a inang, thlah hunah a perh na ting mai an ti. - In bul velah thlasik thlai chin a hun leh dawn ta a, ui leh ar khuahkhirh loh a ninawm leh ngawt ang an ti. SIDE DRAIN SIAM NRELP hnuai atangin Tlangnuam khua-a hna bul tan nan Govt. P/S Gate bul atangin Pu K. Thangdela In thlengin Side drain siam a ni a. Estimate Rs. 50000-in 50 mtrs a thui siam tur a nih laiin 70mtrs a thui an siam thung. TANPUINA PE Seling Hmeithai Association Pi Lalringi, Aizawl Road leh Pi Makkhawni, CP Road te hnenah kar kalta khan tanpuina sum Rs. 300/- ve ve an pe.