Sa ilalim ng karagatan ng mga bituin Ramdam ng damo sa ating likuran, at ng kumot ng ulap na sumasayaw sa hangin, Ang pulso ng mga damdamin Mga kwentong gustong kumawala sa mga pusong matagal na nilang gustong lisanin Nung gabing yon, walang kibo ang mga kuliglig, tumigil sa pagkumpas ang mga sanga, pinatahimik ko ang buong kalawakan para makinig sayo, at noon, nakilala kita Kinuwento mo sakin ang mga sikreto ng 'yong nakaraan. Sinagot ang mga paano, kailan, mga sino at saan, ang mga pinakamasaya, pinakamalulungkot mong karanasan. Hindi ko makakalimutan ang gabing yon Nang pinatong mo ang iyong daliri sa mga labi mong nagkukulay ube na sa lamig At sa sandaling bumukas ang iyong bibig nagmistulang entablado ang hinihigaang sahig, nung nagsimula kang umawit. Pinakinggan ko ang tugtog, tugtog, tugtog. Ang tibok ng puso mo sa ilalim ng tinig mong binabaybay ang mga salita at tono ng kantang pamilyar na sinulat nating dalawa. Pinakinggan ko ang bawat salita, ang bawat paghinga, ang bawat pagtaas at pagbaba, Pinakinggan kita sa bawat pagbulong at pagsigaw,
sinabayan ka ng ingay ng mundo pero ang
pinakinggan ko'y ikaw. Dahil alam ko nung gabing 'yon, ang kailangan mo ay hindi mga pangako, hindi mga regalo, Hindi mo kailangan ng mga puring mapagpalalo, hindi mo kelangan ng mga rosas na galing sa bibig o mga salitang nakakakilig, alam ko ang kailangan mo ay mga tengang makikinig. Kaya't nakinig ako, habang kinukwento mo yung tungkol sa paborito mong laruan nung bata ka pa, yung isang beses na naiyak ka sa singing contest dahil sa kaba. Yung tungkol sa unang lalaking nagpatibok ng puso mo, nakinig ako sayo. Nakinig ako sayo dahil mahal kita. Kung hindi mo iyon narinig nung unang beses na nagpakilala ako sayo Inuulit ko sayo ngayon, mahal kita. At hindi ito yung mahal kita na naririnig mo sa mundo. Ito yung mahal kita na pinakatotoo - ang mahal kita na makikinig sayo. Kaya't ikwento mo sakin ngayon kung pano mo natuklasan ang pag ibig at ikwekwento ko sayo kung pano ko 'to nilikha. Ikwento mo sakin kung pano ka nila sinaktan at ikwekwento ko sayo kung paano nila ako pinahiya, kung pano nila ako binugbog, kung pano nila ako pinako, at kung paano ako pumayag alang alang sa pangako. Ipaalala mo sakin kung ilang beses kang naligaw, at ipapakita ko sayo kung ilang beses kitang hinanap,
Ipaalala mo sakin kung ilang beses kang nabigo, at
ipapaala ko sayo kung ilang beses kitang niyakap. Ipakita mo na handa ka nang magtiwala, na handa ka nang magmahal at ipapakita ko sayo kung paano magdasal. Huwag kang matakot magkwento. Makikinig ako sayo, naiintindihan kita dahil alam ko rin ang pakiramdam ng hindi pinakinggan. Minsan, nakita kita sa dating tagpuan Sa ilalim ng karagatan ng mga bituin Ramdam ng damo sa iyong likuran, at ng kumot ng ulap na sumasayaw sa hangin Ang pulso ng mga damdamin Mga kwentong gustong kumawala sa pusong matagal na nilang gustong lisanin Pero nung gabing 'yon--nung gabing 'yon, galit na galit ang mga kuliglig, walang tigil sa pagkumpas ang mga sanga, nagiingay ang buong kalawakan para sayo. At noon, niyakap kita, pero hindi na ako naramdaman ng manhid mong katawan. Sinabi ko sayong mahal kita, pero hindi mo ako pinakinggan, ang pinakinggan mo ay ang mundo na nagsasabing handa ka ng magmahal kung handa ka ng masaktan, Pero lagi mong tatandaan na hindi lahat ng sugatan ay tama ang pinaglaban. Ngayon, may nangyayaring rebolusyon sa puso mo -Ikwento mo sakin, at makikinig ako.