1

AMO LAIKA A KARAI MUNGGA

(AMOS)

I. SHINGDU LABAU NI (HISTORICAL CONTEXT OF AMOS WORK)

A.Myihtoi Wa ( The Prophet)

Amo gaw lungrawk hte bum ni shinggrup da ai Tekoa kahtawng kaji na re. Tekoa mare gaw Yuda
mungdaw kaw na mare rai nna, Yerusalem mare a dingda maga deng 12 tsan ai shara hte, Belehem mare a
dingda maga deng 6 tsan ai shara hta nga ai mare re. Amo ngu ai mying a lachyum gaw lit li gun ai wa
(burden-bearer) ngu ai re. Dingda Yuda mungdan masha rai nna, dingdung Isreala mungdan hta myihtoi
htoi na matu Karai Kasang shaga la hkrum ai wa re (7:12-13, 15). Myihtoi dinghku na pra ai masha
mung n re ai sha n-ga, myihtoi htoi sha ai wa mung n re. Yu maya sagu rem ai wa hte lakum si hte kan
bau ai wa re (7:14). Dingdung Isreala mungdan Behtela mare kaw myihtoi htoi ai wa re ngu nna chyum
ninghkrin law malawng hkap la ma ai. Behtela mare gaw hkawhkam Yerobom II wa hpara jawng de ai
shara rai nna, kaga maigan hpara ni law law hpe mung nawku ai shara re. Kyang lailen hten za ai hte
ngang gayut pyaw len ai shara re. Dai zawn re ai aten masa hta, Amo Karai Kasang a mungga htawn tsun
ai re. Yu maya sagu rem ai wa sha rai tim, Hebrew ga atsawm chye shaga ai hte ga num suk rawng ai (ga
shaga ram ai) wa re. Labau htunghkying ni hpe hkaja da ai wa rai nna, makam masham ngang ai wa rai
wu ai (1:3-8, 13; 2:3,9,7). Sagu ni hpe zingri htim sha ai nam du sat ni hpe gwi gwi gasat hkinghkap ai wa
re ai hte maren, masha shada n tara ai hku dip sha roi sha ai hpe gwi gwi tsun shaga ninghkap ai wa mung
re. Behtela mare na hkinjawng Amaziah wa shi hpe gumhpraw lu na matu myihtoi htoi shakut ai wa ngu
nna mara shagun ai shaloi, dai hpe n dang let, shi a myihtoi ga gaw Karai Kasang kaw na lu la ai hte,
Karai Kasang htawn tsun shangun ai mungga majing re ngu gwi gwi nighkap let bai tsun ai wa re. Israela
dingdung mungdan hta hkawhkam Yeroboom II up ai aten hte, dingda mungdan Yuda mung hta
hkawhkam Uzia up hkang ai aten BC 760-759 laman myihtoi ga tsun ai wa re.

B.Mung Masa Shingdu Labau (Political Background)

Dawi gawgap da ai Israel mungdan gaw Shawlamon hkawhkam a lak htak hpang e lahkawng
brang garan mat sai. Ndai mungdan lahkawng hta na Yeroboam I, gawgap sa wa ai dingdung mungdan
gaw grau n-gun ja nna Omri wa hkaw dung ai aten hta n-gun ja dik tai wa sai. Omiri gaw Samari mare
hpe BC 879 hta de tawn nna mare daju shatai da sai. Omri gaw Hpiliki (Phoenicia) mung ni hte mung
jinghku hku nna, shi a kasha Ahab a matu hkawhkam a shayi sha Yezebela hpe la ya wu ai. Hkawhkam
jan Yezebela gaw Karai Kasang hpe n chye ai jan re ai hte maren, shi a Bala nawku htung hpe Israela
mungdan hta woi sharawt, nawku woi sai. Dai hpe Yehu ngu ai wa woi awn nna, rawt malan ai hte Ahab
aru arat ma hkra hte, Bala hpara nawku ai ni hpe atsai awai shamyit kau nu ai ( II HkawHKam 9, 10). N
dai lam a majaw, shawng de jinghku hku da ai, Yuda hte Hpiniki (Phoenicia) ni a madi shadaw ai lam n
nga mat sai. Bai htingbu mungdan rai nga ai, Suri ni mung shang dingsa bang wa sai. Suri hkawhkam
Hazaela gaw shi a mare daju Damasku kaw nna Israel masha ni hpe adip arip galaw ai hte, lamu ga nkau
myi hpe kashun daw la ya ma ai. Rai tim, BC 805 hta Asuri hkawhkam Adadnirari III Suri hte Israela
mung ni hpe gasat dang la kau sai. Rai tim, Asuri ni mung BC 802 hta tinang mungdan kata yak hkak lam
ni nga wa ai majaw shi a hpyen dap ni hpe Israela mungdan kaw na bai dawm la kau sai. Dai majaw,
Israela mungdan gaw hkawhkam Yosha hte Yeroboam II ni a lak htak hta mungdan shanglawt bai lu sai.
BC 787 hta Yeroboam II gaw Arabia panglai du hkra mungdan hpe maden jat let Samari mare gaw, sut su
nga mai ai mare tai wa sai. Israela mungdan ting sut masa rawt jat kalu kaba ai hte hpaga yam ga grai ngai
ai aten hta Amo myihtoi htoi ai re.

C. Makam Masham Masa Shingdau Labau (Religious Background)

Israela myu ni sut su nga mu nga mai lam hta rawt jat galu kaba wa ai rai tim, Karai Kasang hte tawn
da ai ga shaka hpe hkan shadik shatup ai lam hta ning ra wa sai. Hkik hkam ai nawku htingnu ni hta,
 2

nawku masha law law wa n rau n htau rai nawku nga ma ai (4:4f; 5:21-24). Rai tim, nawku htingnu ni
hkan maigan hpara ni hpe adan aleng tawn let, nawku jaw jau wa ma ai majaw, Yehowa hpe chyu sha
nawku ai lam n rai mat sai (4: 11-14). Israela ni gaw shanhte hkum shanhte, hpung shingkang kaba dik ai
Yehowa a nawku masha ni ngu hkam la let, shaning ting a du hkra ladaw ni hpe masat nna, hkungga
nawng poi ni, hkik hkam ai lu sha poi ni hte rai, nawku ma ai (4: 4f; 5:5, 21-24). Yehowa Karai hpe
mahkawn mangwi hte shakawn ai hta mung shanhte a nga mu nga mai ai lam hta Yehowa Karai hpe
shang lawm shangun ai hku sha shakawn ma ai. Mahkawn mangwi hte tinang hkum hpe Karai Kasang hta
grau shagrau shakawn la ma ai. Yehowa hpe nam man hkungga nawng jau ai rai yang, Karai a man hta
dingyang shang tsap nga ai ni tai sai ngu hkam la ma ai.

Dai lam ni hpe Amo tsun sharai ai gaw, shinggan shingni hku ntsa lam hkungga sak nawng ai lam
hte kyang lai len hten za ai hpe, Yehowa n dawng n yawt nga ai ngu tsun sharin wu ai. Yehowa gaw
dinghpring ai Karai rai nna, mungdan yawng a ntsa up hkang nga ai. Dai majaw, n ding n man, n hkru n
kaja ai, n tara ai ni yawng a ntsa je yang na ra ai. Israela ni hpe sut su nga mai shangun ai gaw Yehowa
makawp maga chyeju jaw nga ai sakse re. Rai tim Israela ni gaw, Karai Kasang a sharawng awng ai lam
hpe malap mali di nna, Karai Kasang a sharawng awng ai lam hpe n hkan sai. Dai majaw, Yehowa Karai
Kasang gaw jasam mungdan ni hpe jai lang nna Israela hpe daw dan je yang na ra ai. Kade nna yang,
Israela hpe daw dan je yang na ra ai. Kade n na yang Israela hpe daw dan je yang na matu mungdan
langai rawt galu kaba wa na ra ai ngu Amo myithtoi ga tsun wu ai. Amo a myihtoi ga hte maren, Asuri ni
n-gun ja wa nna, Israela mungdan hpe BC 721 ning hta gasat dang la kau nna, dingdung Israela myu sha
ni hpe bawng hku rim la kau ai hkrum sha sai.

D. Nga Pra Masa hte Sut Masa Shingdu Labau (Social and Economic Background)
Myihtoi Amo a aten hta Israela mungdan gaw sut masa ring chying ai hte maren, ja gumhpraw sut
gan hta pyaw len nga ai ni law law re. Sut gan gaw masha hpe git hkang da ai hte, sut gan a mayam tai
nga ai ten re. Lu su kun myi ni gaw, kashung ta na nta, n lum ta na n ta ni gap da ma ai. Magwi kawng
yupku hta galeng let, sagu dumsu shan ni sha let, tsabyi n tsin ni lu let, poi ni galaw rai, nga lu tim, mung
masha ni a akyu ara hpe kachyi myi pyi n yu ya ma ai (6:4-6). Num ni mung tsabyi lu len ma ai. Lu su ai
ni matsan mayan ni hpe adip arip hte zingri zingrat di ma ai (4:1). Hkawhkam hkaw seng ni a aru arat ni
hte, hpaga ga ai htinggaw na ru sai ni sha, lu su nga mai nna, mung masha malawng maga gaw matsan ma
ai. Dai majaw, lu su ai ni hte matsan ai ni a lapran mala hka ai lam grai kaba wa ai hte, n tara ai, dip sha
roi sha ai lam ni, ja gumhpraw hte matsan ai ni a ntsa, gamyet zingri ai lam ni grai law wa ai.
Yi hkau na galaw sha ai ni gaw, lu su kun mi ni matsan dum yang she nga pyaw ai masa rai nga
ai. Du hkra ladaw a jahten shaza lam ni a majaw lu su ai ni hpe, shamyet shanat ra ai shaloi, n tara ai hku
bawdaw la ai zawn, hka n lu jaw ai shaloi mung matsan dum lama ai lam n nga ai sha, yi sun hkauna ni
hpe ting la ya ma ai (2:6f; 5:11; 8:4-6). Dai majaw, n tara ai amu ni shara shagu hta nga nga nna, tara agyi
ni mung mayun kum hpa la let, kyang lai len hten za ma sai (5:10,12). Dai re ai majaw, matsan ai ni gaw
makawp maga la na kadai n nga, lu su ai ni a npu e adip arip rai, baw gum dagup taw nga ra ai aten Amo
myihtoi ga tsun ai re.

II. MYIHTOI LAIKA A GA HKRANG MASA (OUT LINE)

Amo laika gaw myihtoi kaji ni a laika buk hta numbat masum hta bang da hkrum ai laika re. Rai
tim, myihtoi laika ni yawng hta laika buk hkrang hku shawng nnan ka da ai myihtoi laika re. Amo a
shawng daw de Moshe, Samuela, Nahtan, Gad, Elia hte Elisha zawn re ai myihtoi law law nga lai wa sai
rai tim, shahte a myihtoi ga ni laika buk hkrang hku n mu lu ai sha, labau maumwi hkan e kapik kapawk
sha mu chye lu ai. Amo laika hpe ntsa lam daw mali hku garan nna, chye na la mai nga ai.

A. Mungdan matsat a ntsa Karai Kasang jeyang na lam (1:1 2:16)

(1) Damasku 1:3-5
(2) Gaza 1: 6-8
 3

(3) Turu 1:9-10

(4) Edom 1:11-12
(5) Ammon 1:13-15
(6) Moba 2: 1-3
(7) Juda 2:4-5
(8) Israela 2:6-16.

B. Israela ni a yubak mara hte Karai Kasang ari jaw na lam ( 3-6)
(1) Israela ni a yubak mara a majaw Yehowa ari jaw na lam (3:1-15)
(2) Israela ni madat mara ai lam n nga ai majaw Yehowa ari jaw na (4:1-13)
(3) Yehowa hpang de bai n htang wa na matu Israela hpe lajin ai lam (5:1-17)
(4) Sharung shayawt ai ga hte myit malai lu na matu shaga ai lam (5:18-27)
(5) Isralea hpe jahten sharun kau na lam (6:1-14)

C. Myihtoi wa mu ai shingran (7:1 9: 1-10)

(1) Dinggam yaw (7:1-3)
(2) Wan (7:4-6)
(3) Shadawn sumri (7:7-9)
(4) Hkinjawng Amazia hte Amo ga htai lai hkat ai lam (7:10-17)
(5) Namsi ka tawng (8: 1-14)
(6) Hkungri (9:1-10)

D. Yehowa Israela hpe bai gram lajang la na lam (9:11-15)

III. A HKYAK AI GA LAMI NI (KEY WORDS)

A. Masha shada tara rap ra lam
Myihtoi Amo gaw shinggyim masha shada lapran na, tara rap ra, ra ai lam hpe ndau shana ai
myihtoi re. Mungkan sut gan ni hte pyaw len nga ai sahti kun myi ni, matsan chyaren ni hpe dip sha, roi
sha rai, n tara ai hku, ja gumhpraw tam la nga ma ai. Tara rung hta, mayun kum hpa la let matsan masha
ni hpe dip sha ai lam ni galaw nga ma ai. Grau nna, Karai Kasang a masha ni re ngu tim, tinang hkum
shagrau la nna, kaga masha wa a ntsa n tara ai hku amyat htuk la ai lam galaw nga ma ai. Dai lam ni gaw,
Karai Kasang a man e n shawp ai amu ni rai mat ai lam, myihtoi wa shadum sharin ai re.
(1) Sahti kunmyi ni pyaw hpa lam hta len ai lam (3:15; 4:1; 5:11; 6:1,4-6; 8: 4-6)
(2) Matsan mayan ni hpe roi rip, dip sha ai lam (2:6-8; 3:9; 4:1; 5:7, 11; 8:4-6)
(3) N tara ai hku ja hpaga tam ai lam (8:5)
(4) Tara rung ni n tara ai lam (2:7; 5:10, 12, 15)
(5) Sawt ai myit masin hte nawku daw jau ai lam (4:4-5; 5:21-23; 8:5)
(6) Tara rap ra ai lam hte asak hkrung ra ai lam hta tut lwi nga ai hka shi zawn lwi nga shangun ra ai lam
(5:24).

B. Tara jeyang na lam

Israela ni a yubak mara majaw Karai Kasang kaw na jeyang ai lam du na re ngu nna, myihtoi wa
aja awa htawn tsun ai re. Yehowa Karai gaw mungdan yawng hte, nga yawng danghta hpe hpan shalat ai
Karai re. Dai majaw, tara maigan amyu ni hpe mung shanhte a n hkru n kaja ai lam hta hkan nna, Yehowa
jeyang na re. Israela ni gaw grau nna, hpan madu hpe chye nga ninglen, n hkru n kaja ai lam hpe galaw ai
majaw grau kaba ai ari jaw hkrum na, re ngu nna tsun shadum ai re. Hkai n mai ni htenza ai, Ana zinli ni
byin ai, grai gumshem ai hpyen ni shang gasat hkrum ai hte mungdan hpe jahten sharun nna, mung masha
ni hpe, bawng hku woi mat wa ai zawn re lam ni gaw Karai a tara jeyang ai kumla ni rai nga ai. Kaba dik
ai jeyang ai lam gaw Israela ni Karai Kasang hpe shaga yang nhtan ya ai, Karai Kasang hpe garum hpyi
yang atsin sha nga mat ai lam ni mung tara jeyang ai kum la ni rai nga ai. Shinggyim wuhpawng hpe n
 4

tara ai hku (sh) n rap ra ai hku maw mawn ai lam gaw Karai kaw na ari hpe du wa shangun ai lam ni re
ngu Amo aja awa htawn tsun wu ai.

(1) Nga yawng danghta a Karai (4:13; 5:8; 9: 5-6)

(2) Mungkan mungdan yawng a Karai (1:3- 2: 16; 3: 6-7: 9:7)
(3)Mungdan ni hpe tara jeyang na lam (1:3-2:3)
(4) Du wa na tsin yam ni ( 3:14-15; 6:8, 11; &:9, 11, 17; 9: 1-4)

C. Myit mada lam

Myit malai ai hte Yehowa hpe teng man ai hku tam let, hpyi sit shang yang Yehowa gaw myit
mada shara bai jaw na, bai mawai la na re ngu nna, Amo wa htawn tsun wu ai (9:11-12). Maigan amyu ni
a lapran na, n -gu hpe hkying hta hkying ai zawn , naw ngam nga ai Israela ni hpe hkying la let chyeju bai
jaw na.
(1) Yehowa hpe tam ra ai lam (5:4-6, 14-15)
(2) Ngam nga ai Israela ni hpe bai mawai la na (5:15; 9:9-10)
(3) Israela hpe shaman chyeju bai jaw let bai gram lajang la na (9:11-15)

IV. KARAI MASA MUNGGA (THEOLOGICAL MESSAGE)

A. Ga shaka hte seng ai ga sadi hte jahkrit sharim ai lam (Covenant promise and Threats)
Israela amyu gaw Karai Kasang lata la ai amyu re ngu ai Moshe a matsun ga hta mahta nna
myihtoi ga tsun wu ai. Mungga madung gaw, Israela hpe Egutu kaw nna shaga shapraw la ai mabyin hpe
a hkyak kaba hku hkai ai mungga re (3:1-8). Karai Kasang gaw, Egutu kaw bawng dung nga ai kaw nna
shalawt la ai Karai, nam mali hkrun lam kaw bau maka ai Karai, ga sadi jaw da ai mungdan lamu ga hpe
madu la shangun ai Karai re (2:9-10; 9:7; 5:25). Yehowa gaw Israela hpe Shi a wuhpung langai, dinghku
langai hku shatai ai re. Dai hta sha n-ga, Israela gaw Yehowa hta sadi dung let sak hkrung ra ai ngu ai, ga
shaka hte Yehowa woi lakawn wa ai re ( Pru. 19:1-6). Dai majaw, Israela gaw Yehowa hpe chyu sha
nawku daw jau ra ai (3:3), dai gaw Karai Kasang hte Israela lapran tawn da ai ga shaka hte seng ai
ganawn mazum lam re. Dai ga shaka hta sadi dung nga jang, Yehowa gaw Israela ni a Karai rai nga na
rai nna, Israela mung Karai a amyu rai na, ngu ai Karai a ga sadi grin nga na re. N dai kaw Karai a ga
madat let sadi dung jang shaman chyeju lu na, ga n madat ai sha sadi n dung jang dingnye lu na ngu ai
jahkrit sharim ai lam lawm ai. Rai tim, Israela gaw yubak mara galaw ai hku nna Karai hte tawn da ai ga
shaka hpe jahten sharun ma ai. Ga sadi n dung ai lam gaw, ga shaka hte seng ai matut mahkai lam
(covenant relationship) hpe hkra machyi shangun sai. Dai majaw, Yehowa shaman chyeju dawm la kau
sana rai nna, dagam dala hte mara jaw jeyang ai hkrum sha ra na ngu nna Amo htawn tsun ai re.

B. Israela hkrat sum na re ngu jahkrit sharim ai lam ( the threat of doom)
Yehowa tawn da ai ga shaka hta mahta nna, la ra ai lit hpe ahkyak n shatai ai sha, sut su ai ni
matsan chyaren ni a ntsa dip sha roi sha ai lam galaw sai. Hpaga yamga lam hta n dingman ai joi jang ni
lang rai amyat tam sai. Tara agyi ni mung mayun kumhpa ni hkap la rai, n tara ai hku tara jeyang ai lam ni
galaw sai (8:7; 5:11-15; 6:12; 8: 4-6). Lu su ai ni tinang a tinggyeng matu sha myit nna, matsan mayan ni
hpe garum shingtau lam nnga ma ai. N dingman ai, n tara ai, hku asak hkrung nga ai hpe Yehowa mu nga
, chye nga ai hpe Israela ni n dum ma ai. Yehowa hpe hkungga nawng, nawku daw jau jang Yehowa myit
dik sai ngu hkam la ma ai (4:4,5; 5:4, 21-24). Jep ai tara hpe shadik nna, Yehowa sharawng awng ai hku
asak hkrung na n myit ma ai. Mung up salang ni mung, Yehowa hpe malap mali rai mungkan lam hta
pyaw len hten za ma ai. Dai majaw Amo gaw, Yosep a hkala n ba hkrum ai lam hpe hpa n yawn ma ai
(6:6) ngu tsun wu ai. Dai lam ni gaw, Yehowa a man e sadi n dung ai lam rai mat sai. Yehowa a amyu hku
lata la ai hpe n gawn n sawn di ai ang sai. Si ging ai ana shabyin na maka kum la rai nga ai. Israela ni a n
ding man ai, n tara ai, n rap ra ai lam ni gaw ding man ai Karai Kasang a man e, n ju n dawng hpa rai sai
majaw (2:6), Karai a jeyang ai nhtoi Israela ni a ntsa du wa magang ra ai ngu tsun shadum wu ai. Israela
 5

ni a matu Karai Kasang gaw hkye la ai wa, ngu nna labau hta hkai hkrat wa tim, ya gaw jeyang ai labau
byin wa magang ra ai ngu daru shadum wu ai. Karai Kasang gaw jam jau tsin yam ni hpe Asuri masha ni
hku nna dat dat let, Israela hpe dingnye jaw jahten sharun kau na re, ngu nna sharung sharawt mahkawn
hte shadum sharin ga tsun wu ai. Dai majaw, nanhte a mahkawn mangoi ni hpe jasim kau mu, na a tingse
ni a mahku, ngai n na ra n ngai. Tara malang ai lam hka zawn, dinghpring ai lam tut lwi ai hka nu zawn
lwi nga u ga (5:23-24) ngu nna, Israela hpe tsun shadum wu ai.

C. Yehowa gaw mungkan ting a Karai hte shingra tara a madu re (Yahweh is God of nations and
nature)
Yehowa gaw n dai mungkan rai n nga shi ai aten kaw nna, nga ai karai rai nna, mungkan ting hpe
up hkang nga ai Karai re. Shi a up hkang ai hte hkye hkrang la ai labau gaw Israela amyu ni sha n rai
mungkan amyu shagu hte mung seng nga ai. Myu shagu a labau shagu hta Karai Kasang a hpung
shingkang hpe shadan dan ai lam mu lu nga ai (1:3- 2:3). Yehowa gaw mungkan a mai kaja lam hpe
makawp maga nga ai wa rai nna, n hkru n kaja lam a ntsa tara jeyang nga ai wa re. Mungdan langai ngai
hpe jai lang nna kaga mungdan ni hpe jeyang nga ai (6:14). N dai mungkan gaw Karai Kasang a hkang da
ai lam hta asak hkrung na matu hte Shi a sharawng awng ai lam hta daw jau let asak hkrung mai nga ai
(7:1, 4; 4: 6-11).
Shingra tara hpe mung Yehowa jum tek nga ai rai nna, shingra tara ni gaw Karai Kasang a hpung
shingkang hpe shadan shapraw nga ai lam, Amo htawn tsun nga ai (4:6-11). Shingra tara hpe jai lang akyu
jashawn nna mung, mungkan shinggyim masha ni hpe jeyang nga ai. Ga shadawn - hku hku shangun
let, sha hpa taw ai lam shabyin timung nanhte ngai hpang de n wa ma ai (4:6,7,8).

D. Myit malai lu na matu shaga la ai lam ( a call to repentance)

Amo htawn tsun ai gaw, Yehowa a yaw shada lam gaw Israela hpe jahten shaza kau na matu n rai,
Yehowa gaw Israela ni a lapran hta yu nga, bungli galaw nga ai wa rai nna, Israela hpe myit malai let shi
hpang de nhtang wa na matu ra sharawng ai lam tsun dan wu ai. Ari jaw tim, Yehowa a yaw shada lam
madung gaw, Israela ni myit malai lu na matu re lam shadum nga ai (4:6-12). Ya dai ni jang, tengman ai
myit malai hte Yehowa hpang de bai wa nna, Yehowa hte tawn da ai ga shaka hpe kalang bai shangang
shakang na matu, hpyi nem ai mungga rai nga ai (5:14-15).

Sharin La Na Lam Ni (Lessons From the Book of Amos)

1. Yehowa Karai Kasang gaw Israela ni a Karai Kasang sha n rai, mungkan ting a Karai Kasang re.
Mungkan ting hpe up hkang nga ai Karai rai nna, masha shada n tara, roi rip dip sha ai ni yawng a
ntsa ari jaw tara jeyang nga ai wa re.
2. Yehowa Karai Kasang sharawng awng ai gaw hkungga nawng ai n rai, Yehowa a man e teng man
ding hpring ai a sak hkrung lam she re.

3. Karai Kasang anhte yawng hpe ap da ai lit gaw n dai mungkan hta tara rap ra ai lam hpe, tut lwi
nga ai hka shi zawn lwi nga shangun na matu hte; matsan mayan ni hte dip sha roi sha hkrum ai
ni hpe makawp maga, garum ningtum na lam re.

4. Ja gumhpraw, arawng aya, sut rai ni a ntsa myit machyu let gumrawng gumtawng ai ni; matsan
mayan ni, gaidawng gaida, jahkrai n mai ni hpe n tara ai hku roi rip sha ai ni, amyat htuk sha ai ni
hpe aten du jang Karai Kasang jahten shaza kau na ra ai.

5. Aten shagu, byinda masa shagu hta, Karai Kasang a lata la, hkye la, shagrau shatsaw la na hpe
sha kam sham myit kaba hte myit mada nga ra ai. Kaga myu sha ni hpe htang kaba, kam hpa ai
 6

myit jasat n mai rawng ai. Dai gaw, Karai Kasang she anhte hpe shaga la, lata la, hkye mawoi la,
garawt shatsaw la ai, ngu ai makam hpe shagrit shayawm kau ai lam rai nga ai.
6. Karai Kasang a man e tengman ding hpring ai lam n nga ai hte Karai kaw sit shang ai, n tara ai
hku lu la ai gumhpraw ni hte chyeju shakawn poi ni galaw ai, tinang a akyu a matu (sh) amying
gumhkawng na matu chyeju shakawn nawku hpawng ni galaw ai lam ni hpe Karai Kasang n hkap
la na re.

7. Kaning re ai yubak mara myi galaw hkrup kau ai rai tim, teng man ai myit malai hte Karai kasang
hpang de bai nhtang wa yang, Karai kasang gaw mara raw dat ya nna, shaman chyeju ni hte bai
anhte a asak hkrung lam hpe gaw sharawt la na re.

Ginlen Shalai ai,

Rev. Dr. Lahpai Awng Li

MIT, Insein.
Nhtoi. 30 May, 2017.