DAIN HA MGA PANGADJIAN MADAWHAT HA ISRA WAL

MIRAJ
DAIN HA MGA PANGADJIAN MADAWHAT HA ISRA WAL MIRAJ
Kiyawah dain ha Kitab: AL ISRA WAL MIRAJ biyaktul hi Allamah Jalaluddin as-Suyuti (rah)

:

( (

Hitukbal natuh in pamudji iban pagsarang-shukur pa Tuhan natuh Rabbul alamin sabab sin salagguh-
lagguh nimat Niya pa mga eepun Niya bar-iman, amu na in pag-Isra iban pag-Miraj sin kakasi Niya
Junjungan natuh Nabi Muhammad (saw). Salawat iban salam ha Nabi Muhammad (saw) lapay na in ahli
kaluargah niya iban mga sahabat niya kiyaridhaan sila katan sin Allah (swt).

Mahuli, hambuuk dain ha mga salagguh-lagguh pakaradjaan jimatu ha Agama Islam amu na in pag-Isra
iban pag-Miraj sin Junjungan natuh Nabi Muhammad (saw). Ha dum pag-Isra iban pag-Miraj niya,
liyanuan sin Malaikat Jibril (as) in jantung niya sin Tubig Zam-Zam. Ampa hipuh sin Malaikat Jabril (as) in
laum daghal niya sin iman iban hikmah. Ampa siya diya sin Malaikat Jibril (as) pa Masjidil Aqsa. Sahingga
pagdatung nila pa Masjidil Aqsa, nagsambahayang sila iban sin mga malaikat ditu. Imasubu in mga
malaikat pa Jibril (as):

Ya Jibril, hisiyu in iban mu yan?

Laung sin Malaikat Jibril (as):

Amu na ini in Muhammad, Rasul sin Allah, iban pungkasan sin katan kanabihan
.
Imasubu na in mga malaikat bang kitatukbal na kaniya sin Allah (swt) in pagka-Rasul, sartah tiyanghuan
sila sin Malaikat Jibril (as). Ampa nagdurah-durah namudji in katan malaikat pa Junjungan natuh Nabi
Muhammad (saw) ha kabtangan:

Kasajahitraan kaniya dain ha Allah, hambuuk taymanghud iban hambuuk khalifah. Siya na in sarayaw-
rayaw taymanghud, iban sarayaw-rayaw khalifah, iban in pagdatung niya yan mari amu na in sarayaw-
rayaw pagdatung.

Ampa nila piyagbak in niyawalihan sin katan Anbiya (as), sahingga hambuuk-hambuuk in mga Nabi sin
Allah (swt) namudji pa Allah (swt) ha sabab sin pagnabi sin Junjungan natuh Nabi Muhammad (saw).
Laung hi Nabi Ibrahim (as):

In katan sanglit tudju pa Allah amu in naghinang kakuh Khalil Niya (atawa bagay Niya), iban nagdihil
kakuh pagkawasa malagguh, iban naghinang kakuh hambuuk ummat bar-ibadat amu in pangagaran sin
mga tao, iban nagsalamat kakuh dain ha kayu sahingga hinang Niya in kayu mari kakuh mahagpay-
hagpay ibang nagdara sin kasalamatan.

Laung isab sin Nabi Musa (as):

In katan sanglit tudju pa Allah, amu in naghimumungan mari kakuh sin sasawa-sawa himumungan, iban
nag-pih kakuh bilang hambuuk Nabi iban hambuuk Rasul, iban nagpaturun kakuh sin Taurat, iban
nagjuljanah kan Firaun iban nagsalamat ha Bani Israil labay dain ha sangsah ku, iban naghinang sin
kaibanan dain ha ummat ku mga manusiah amu in namanduh pa kasabunnalan iban piyamarinta nila in
haq.

Laung isab hi Nabi Daud (as):

In katan sanglit tudju pa Allah, amu in nagdihil kakuh kawasa malagguh, iban naghinduh kakuh sin Zabur,
iban nagpalunuk sartah nagpataalluk kakuh sin basih, iban nagpataalluk kakuh sin kabud-buran miyagad
nanasbi kakuh iban sin mga manuk-manuk, iban nagdihil kakuh sin hikmah iban kasawa ha
paghimumunagan.

Laung isab hi Nabi Sulaiman (as):

In katan sanglit tudju pa Allah, amu in nagpataalluk sin hangin iban sin mga shaitan sahingga hinang nila
in unu-unu na kabayaan ku biyah na sin mga kabilik-bilikan iban mga pattah iban mga luluunan biyah
tungkang dakulah amu in nakabubutang ha tampat tartantu, iban naghinduh kakuh sin bissara sin mga
manuk-manuk, iban iyanugharaan Niya aku dain ha katan unu-unu na, iban piyataalluk Niya kakuh in
katan mga sundalu sin shaitan iban manusiah iban mga manuk-manuk, iban piyalabi Niya aku dain ha
kamatauran sin mga eepun Niya bar-iman, iban nagdihil kakuh pagkawasa malagguh amu in dih tumup
kansiyu-kanisyu na puas dain kakuh. Iban hinang niya in pagsultan ku hambuuk pagsultan marayaw amu
in wayruun hisab niya.

Laung isab sin Isa (as):

In katan sanglit tudju pa Allah, amu na in nagpapanjari kakuh bilang Kalimah Niya, iban hinang Niya aku
biyah kan Adam amu in piyapanjari Niya dain ha lupah ampa niya iyan Kun! sahingga na-awun magtuy,
iban hinduh Niya kakuh in Kitab, hikmah, iban sin Injil, amu in nagpapanjari kakuh taga gaus himinang
manuk-manuk dain ha lupah ampa kuhuyupun sahingga mahinang bunnal manuk-manuk dain ha izin sin
Allah, iban amu in naghinang kakuh taga gaus magpakitah ha tao piyag-anak buta iban magpaulih sin tao
i-ipul, iban amu in nagpapanjari kakuh taga gaus magbuhih sin patay dain ha izin Niya. Iban amu in nag-
angkat kakuh dain ha dunya ini, piyalanuh niya aku iban siyalamat Niya aku iban sin inah ku dain ha
kangian sin shaitan sahingga wayruun tiranan makapamuhingah kamuh in shaitan.
Nakapamudji mayan in mga kanabihan katan pa Allah (swt), simubli isab in Junjungan natuh Nabi
Muhammad (saw) namudji:

: .

In katan sin kamu nakapamudji na pa Tuhan niya Allah. Bihaun aku isab in mamudji pa Tuhan ku.

In katan pudji tudju pa Allah, amu in nagdaak kakuh bilang rahmat pa katan alam iban bilang nagdara sin
bandah iban habal marayaw, iban nagpaturun kakuh sin Furqan amu in kabakan duun in katarrangan in
katan unu-unu na, iban nagpapanjari sin ummat ku sarayaw-rayaw ummat piyaguwah pa pagkahi
manusiah, iban naghinang sin ummat ku ummat partangahan, iban naghinang sin ummat ku ummat
panagnaan sartah sila in ummat kahinapusan, iban Siya in nagpaluag sin pangatayan ku, iban nag-ig sin
pardusahan ku, iban nagpataas sin sasabbutan kakuh, iban naghinang kakuh bilang hambuuk tao mag-
uukab iban magtatambul.

Laung hi Abu Jafar ar-Razi (rah), Nagpungkas sin Nubuwwah iban nag-ukab sin shafaah ha adlaw
qiyamah.

Mga Ummat Muslimeen, malagguh tuud in pangadjian makawah sin kitanyu dain ha pag-Isra iban pag-
Miraj sin Junjungan natuh Nabi Muhammad (saw). Duun ha dum yan timarrang ha taynga sin katan
kanabihan iban katan kamalaikatan dain ha dilah sin Nabi natuh Muhammad (saw) in kamulliyahan niya,
lapay in kamulliyahan sin kitaniyu ummat niya. Sahingga siyabbut sin Nabi natuh Muhammad (saw) in
kamulliyahan natuh ha hadarat sin katan kanabihan iban sin katan kamalaikatan.

Ampa siya siyambag sin Tuhan Mahasutsi:

. :

Ya Muhammad, sabunnal tuud piyapanjari Ku kaw bilang kakasi Ku, sartah in yan kiyalulukis na ha Taurat
Muhammad kakasi sin ar-Rahman. Piyara Ku kaw saplag pa katan manusiah bilang magdara sin habal
marayaw iban bandah kanila. Iban piyaluag Ku kaymu in pangatayan mu. Iyampun Ku kaymu in katan
kasallaan mu. Iban piyataas Ku in sasabbutan kaymu, sahingga dih masabbut buwat malaingkan subay
ra isab kaw masabbut sartah kakuh. Piyapanjari Ku in ummat mu bilang sarayaw-rayaw ummat piyalahil
pa pagkahi manusiah. Piyapanjari Ku in ummat mu ummat partangahan. Piyapanjari Ku in ummat mu
ummat awwalun iban huling ummat. Piyapanjari ku in ummat mu amu in dih makadjari kanila in
magkhutbah sahingga sila magnaik-saksih sin sabunnal tuud in ikaw eepun Ku iban daak Ku.
Nagpapanjari Aku mga manusiah dain ha ummat mu amu na in pangatayan nila in magnanasihat kanila.
Piyapanjari Ku kaw panagnaan Nabi piya-awun, sartah kahinapusan Nabi piyalahil, iban panagnaan Nabi
parulihun Ku ha adlaw mahuli. Dihil ku kaymu in Surah al-Fatihah amu in wayruun ku dihil pa kanisyu-
kansiyu na Nabi nakauna dain kaymu. Dihil ku kaymu in mga kahinapusan ayat sin Surah al-Baqarah
dain ha mga pangartaan dain ha saum sin arash, wayruun ku yan kiyarihil pa kansiyu-kansiyu na Nabi
nakauna dain kaymu. Tiyukbal ku kaymu in Kauthar. Iban dihilan ta kaw 8 nimat: Islam, hijrah, jihad,
sambahayang, zakat, puasa ha Ramadhan, panaabbit pa hinang marayaw, panglangi dain ha hinang
mangih. Iban piyapanjari Ku kaw mag-uukab sin shafaat ha adlaw mahuli iban nanghinapusi sin pagnabi.

Dain ha sabab ini, patut tuud ha hambuuk Muslim in hitanum niya pa bigi jantung niya in pagshukur pa
Allah ha sabab sin Nabi Muhammad (saw) iban manglaggui ha pag-Isra iban pag-Miraj niya.

Mura-murahan tiyawfiqan kitaniyu katan sin Allah (swt). Wassalam