Allahr nam loi cúru gorír zibá bicí boro mehérban ar rahámot wála.

Nabi ókkol ór Kissa

1. Mutti hone báiñge

Boóut din age. Bicí age.
Éçe cóor ekkán ót, bicí mocóur manúic uggwá aiccíl.
Manúic íba Aazára aiccíl.
Aazára yé mutti ókkol kinníl.
Cóor yían ot ekkán bicí boro gór aiccíl.
Gór yían ot mutti ókkol aiccíl, boóut bicí mutti ókkol aiccíl.
Manúic ókkol é, mutti úun óre sóoida goittóu.
Ar, Aazára yó, mutti úun óre sóoida goittóu.
Ar, Aazára yé, mutti úun óre fuñzi tóu.

2. Fua Aazára
Aazára’ttu uggwá, cúndoijja fua aiccíl – boóut bicí cúndoijja.
Fua íbar nam, Ibrahím aiccíl.
Ibrahím é dekítou dé, manúic ókkol é, mutti ókkol óre sóoida de.
Íte maincóre dekítou dé, tará mutti ókkol óre, fuñza goré.
Ibrahím é zaintou dé, mutti íin fattór ókkol.
Íte zaintou dé mutti ókkol é, noó hotá hoó, noó fúne.
Íte zaintou dé mutti ókkol é, noó nuksan goré, noó fáaida goré.
Íte dekítou dé, masí ókkol muttir gaar uore boiyé, ar tará íin óre no dáfa.
Íte dekítou dé, undur ókkol é muttir hána ókkol háifelá, ar tará maná no goré.
Ar, Ibarahím é nizoré nize hoitóu: Maincé kiálla mutti ókkol óre fuñza goré.
Ar, Ibrahím é nizoré nize fusár goittóu dé: Maincé Mutti ókkol óttu, kiálla mage.

3. Ibrahím ór Nosíyot
Ibrahím é, ítar baf oré hoitóu:
Óu añár baf, tuñí mutti uún óre kiálla fuñzo?
Ar, Óu añár baf, mutti uún óre kiálla tuñí sóoida goró?
Ar, Óu añár baf, mutti uún óttu kiálla mago?
Becók mutti uún é noó hotá hoó noó fúne!
Ar, becók mutti uún é, noó nuksan goré, yá fáaida goré!
Ar, uún ólla hána arde fiiya ziín rakó?
Ar, becók, mutti uún, óu añár baf, tará no há, yá no fiiye!
Ar, Aazára ekkuippa aiccíl ar no buzé.
Ar, Ibrahím é ítar koum oré nosíyot goijjíl, ar manúic ókkol ekkuippa aiccíl ar no buzítou.
Ibrahím é hoiyé: Aññí mutti ókkol óre báiñggi, zehón manúic giyói, tóile maincé buzíbou.
 4. Ibrahím é Mutti úun Báiñgge
Zehón Idd ór din aiccé, manúic ókkol kúci óiye.
Ar, Idd ólla manúic ókkol neeillé, ar fuain ókkol neeilé.
Ar, Ibrahím ór baf, neeillé ar íba ye Ibrahím óre hoiyé: Tui añárar fúañti, no neelibí néki?
Ibrahím é hoiyé: Añártú gaat gom nái?