Vetus Testament expressions in Sambahsa

Genesis 10 : 8. Kuscho gehneiht Nimrod ; is inkiep ses un heroy ep id ardh.

9. Is eet un saydheroy face IHVH-Adonay.
Ep quo est saygen: “Talg Nimrod, saydheroy, face IHVH-Adonay.”

Genesis 12 : 1. IHVH-Adonay sayct ad Abram:

“Gwask-idi, ex id land, os tien gehnen, ios dom tiens pater,
kyid land quod skausiem tib.
2. Kwehro ex te un megil nation.
Te blagho, creisco tien nam : sdi blaghen.
3. Blagho tien blaghers, tien balstehmer, siem honnise el.
Sont blaghen in te, vasya clans ios glebe.”

Genesis 13 : 13. Bet i mensci os Sodom sont khiter, baygh faultic dia IHVH-Adonay.
14. IHVH-Adonay hat saygen ad Abram, pos Lot hat sransen iom:
“Wehrt ghi tien okwi. Vid ud id loco quer stahs,
kyid Septentrion, kyid Negheb, kyid Schark, kyid Mar:
15. ya, id hol land tu vids,
tib id dahsiem, ed tieni semen in aiwo.
16. Dehm tien semen kam id duil ios ardh:
sei un mensc ghehdiet lehge id duil ios ardh
tienschi semen ghehdiet ses lohct.
17. Stah ub, gwah ep id land in ids longe ed in ids wure :
ya, tib id dahsiem.”

Genesis 14 : 18. Melchisedech, roy os Salem, hat salgiht id dvan ed id vin,

is, ambikwol os Allah Allahen iom supreme Allah.
19. Is blaght id ed sayct:
“Abram est blaghen ab Allah Allahen, iom autor iom waurns ed ios ardh !
20. Ed is est blaghen, Allah Allahen,
qui hat bohnden tien waurgers inter tien ghesors.”
21. Is roy os Sodom sayct ad Abram: “Dah mi i sesens.
Ia maals, ghend id pro te.”
22. Abram sayct ei roy os Sodom:
“Ho lift mien ghesor kye IHVH-Adonay, Allah Allahen,
iom autor iom waurns ed ios ardh:
23. ex id viel tiel id sandalschnur,
niem ghende ject ex quantum est tien.
Nies sayge : < Ego ho richihn Abram :

Exodus 2: 22. Ia gehnt un sunu. Is criet eys nam: Gherschom !

Ya, is sayct: “Eem un mutawoik in kharij !”

Exodus 20: 1. Elohîms baht tod hol wehkwos:

2. “Ioswo, IHVH-Adonay, tien Elohîms qui te ho salgihn
ex id land Misr, ex id serfen dom,
3. Mae sontu pro te alyi Elohîms protie mien faces.
Dwoternomos 5 : (Ia dec commandements)
7. Mae sontu pro te alyi Elohîms protie mien faces.
8. Mae kwehras pro te sculpture ni cada kwiter
es quo est in ia waurns, uber,
ep id ardh, niter, in id wedor, sub id ardh.
9. Mae proschkehmbas ant ia, mae slougas ia,
ya, ioswo, IHVH-Adonay, tien Elohîms,
is ardent Allah, schtrafo id zulm iom paters ep iens sunus,
ep iens trits ed ep iens quarts, pro mien haineusens.
10. Kwehro kyareihsa ibs tusents,
mienims lieubhers, im paleks mienen wehlens.

11. Mae behras id nam os IHVH-Adonay, tien Elohîms, in vain:

ya, IHVH-Adonay ne innocenteiht quel behrt eys nam in vain.
12. Gweup id sabddien kay consecre id,
kam IHVH-Adonay te hat wohlt.
13. Six diens long sloug ed kwehr tien wehrg.
14. Ye id septim dien, sabdo pro IHVH-Adonay, tien Elohîms.
Mae kwehras wehrg, tu, tien sunu, tien dugter,
tien sloug, tien slouga, tien aux, tien asel, quanti tien biesti,
tien mutawoik in tien dwers,
kay tien sloug ed tien slouga rahate kam tu.
15. Mehmdi od has esto serf in lando Misr.
IHVH-Adonay, tien Elohîms, te hat salgihn tetos med nert ghesor, med tenden brakh.
Ep quo IHVH-Adonay, tien Elohîms, te wehlt kwehre id sabddien.
16. Klewosdehdi tien dadmam kam te hat wohlen IHVH-Adonay, tien Elohîms,
kay se prolongent tien diens, pro tien sellt
ep id glebe quod IHVH-Adonay, tien Elohîms, tib daht.

17. Mae maurdhas.

18. Mae zinas.
19. Mae klehptas.
20. Mae respondas contra tien sokwi ka vain schahide.
21. Mae taunayas iam esor os tien sokwi,
mae habskwas id dom os tien sokwi, eys pold,
eyso sloug, eysu slougu, eys aux, eys asel,
ni quantum est os tien sokwi.

Dwoternomos 6 : (Schema Israel)

4. Aur, Israel, IHVH-Adonay, nies Elohîms, IHVH-Adonay oin,
5. ed kamsies IHVH-Adonay, tien Elohîms,
med tien hol kerd, tien hol ses, tien hol intensitat.
6. Tod wehkwos ioswo vos wehlo hoyd
sessiet ep tien kerd.
7. Inculque id tienims sunus, bahdi de id, weikend-ye tien dom,
gwahnd-ye unte id itner, lyehgend-ye ghom, stahnd-ye ub.
8. Diehen id in signe ep tien ghesor.
Id sessiet in diademe inter tien okwi.
9. Scrib id ep ia anetas tiens dom ed ep tien dwers.
Yosua 6 : 20. Id lawum owayt. Kanent schofars.
Ed quan id lawum aurt id voc ios schofar,
Id lawum owayt, uno megil oway, ed id wall pehdt ep stet.
Id lawo steight kyid wastu, ielg wir ant se.
Agent do id wastu.
21. Interdehnt quantum est in id wastu,
ex iom wir tiel iam gwen, ex el terwn tiel el awem ;
tiel iom aux, agnum, asel, med einsos.

Judces 12 : 5. Gilead act do ia passes ios Jordan pro Ephraym.

Quan ies Ephraymi evadeits sayge: “Siem passe”,
Gileads wirs iom sprehge: “Es tu Ephraymi ?” Sei is sayct: “No”,
6. ei saygent: “Sayg ghi: Shibboleth, sask.”
Sei sayct: “Sibboleth”, ne esend parat ad bahe correct-ye,
seizent iom ed gvehnent iom ep ia passes ios Jordan.
Ye tod tid, quargim dwo mil wirs os Ephraym pehdent.

Samuel – 1, 9: 2. Ei eet un sunu. Eys nam, Schawl, un bolt, un gohd.

Neis wir iom Benei Israel eet gohder quem is.
Ud sien oms, ubtos, is eet bulander quem id hol folk.

Samuel – 1, 15: 32: Samuel sayct; “Porcte mi Agag, iom roy os Amalek. »
Agag eiht diemen kyom.
Agag sayct : « Kwe katha hat abvicen id bittert os mohrt ?”

Samuel – 2, 2: 14: Abner sayct ad Joab: “Stahntu ghi ub ies terwns !

Juxte ies face nos !” Joab sayct: “Stahntu ghi ub !”

Chroniques – 2, 7 : 14 : sessiet enderwaurgen, mien folk, i ep qui mien nam est
crien ;
bet mehldsient, paurscsient mien faces
ed reicsient ex ir khiter itners.
Ed ego, aursiem u dia waurns, indeulcsiem ir agos,
schifesiem ir land.

Psalm 23: 2: IHVH-Adonay est mien bach, aum neid.

Ep id travos iom oasis, me rahateiht;
me rahateiht ep id rahatwedor.

Psalm 137: Ana ia fluvs os Babylon

1. Ana ia fluvs os Babylon, wikam ter.
Weyschi plieng, mehmend-ye Zion.
2. Ep ia salks, eni id, wey hieng nies lyres.
3. Ya, noster cipires budeer ud nos id wehkwos uns poem,
noster plundrers, joy :
« Kante nos un poem os Zion ! »
4. Quod, kane IHVH-Adonays poem ep un kharij glebe ?
5. Sei te myehrso, Jerusalem, mien dexter myehrstu !
6. Mien dingv estu glimen mieni geusmen, sei ne te mehmo,
sei ne alo Jerusalem in kap os mien joy !
Ezechiel 25: 17: Meg i kweino, samt febermalamas.
Ed gnohsient: ya, me, IHVH-Adonay,
quando kweinsiem i.”

Qohélét 1: 2: Dum dumen, ayt Qohélét, dum dumen, quant est dum.
3. Quod vantage pro el mensc in els hol jakhd,
quos el hat jakhd possowel ?
4. Un cycle eiht, un cycle gwehmt ; in aiw id ardho staut.
5. Sowelo bleict, Sowel sehnct ; gwahskwt sien loc ed bleict ter.
6. Gwaht id nan, tournt kyid septentrion, tournt,
tournt ed gwaht, id annem, ed reict sien tours, id annem.
7. Vasya torrents sreunt do id mar ed id mar ne est plen.
Quetro ia torrents sreunt, tetro reikent sreutum.
8. Vasyo wehkwos malalt, el menscis ne maght tolke de.
Id ok ne satasct ob vide, id aur ne pehldt ob aure.
9. Quo buit sessiet, quo buit kwohrn sessiet kwohrn :
est neid alnos nov possowel.

Qohélét 3: 1: Uno moment pro quant, un tid pro quant eiskwen sub ia waurns.
2. Un tid kay gehne, un tid kay mehre.
Un tid kay plante, un tid kay exstirpe id phyt.
3. Un tid kay xehne, un tid kay schife.
Un tid kay breche, un tid kay struge.
4. Un tid kay plange, un tid kay glihes
Un tid se lamente, un tido danse.
5. Un tid kay xubhes petras, un tid kay sammel petras.
Un tid kay stringes, un tid kay abstehme stringes.
6. Un tid kay soke, un tid kay luses.
Un tid kay gwupes, un tid kay xubhes.
7. Un tid kay dehre, un tid kay syuhe.
Un tid kay susure, un tid kay bahe.
8. Un tid kay liubhes, un tid kay haines.
Un tid, id weir, un tid, id pace.