Motto : Zir la. Tanpui la.

Humhim rawh

Theme :Pathian zarah huaitakin kan ti ang - Sam 108:13

ZIRLAITE KHAWNVAR
Vol. VII Issue No.8 An official organ of the Mizo Students` Association, Bangalore Sunday September 18. 2011

ZIRLAITE TUKVERH
#. K.L.E. College-a Bio-technology zirlai chuan tunkar lo awm tur ni 20th. September atang hian Semester final exam an nei dawn a. Thlaleh October ni 26 hian an zofel thei dawn a ni. K.L.E. Law College lam pawhin nimin, dt. 17th. September khan Unit Test an zo ve chiah bawk a. #. Dr. AIT College paw`n nizan khan Fresher Social hlimawm tak an hmang. #. Dr. Syamala Reddy Nursing College pawhin thla hmasa, August ni 24 atang khan Final exam an nei a. Tun thla ni 29 hian an zofel thei dawn a ni. #. M.S.A. President hlui leh tuna Committee member ni mek Tv. Samuel Lalrozama nu chun damlohna avangin Mumbai damdawiinah a awm mek a. Kan tawngtainaah i hre reng ang u. #. M.S.A. chuan vawiin chawhma dar 11:00 khan Darshan College an tlawh. #. Article leh Poetry lo thawh tura kan sawm ten remchanlohna dang an neih avanga an lo tihhlawhtlin theih loh avangin tun tumah hian chawplehchilh takin Editor-in ama thuziah hmangin a hnawhkhat a ni a. A hming a lo chuang tam deh a nih pawhin kan hrethiam tlang dawn nia.

DUHTHLANG THEI KAN NI EM???

K. Remruatfela K.L.E. Law College
Irish Philosopher ropui, Bernard Shawan, Political Science is the Science by which alone civilization can be saved ti-a politics zirna Political Science pawimawhzia a lo sawi tawh ang khan politics hian kan nunah hmun thuk ber a chang a. Eng subject zirlai pawh ni ila, politics kan ngaihthaha, kan ram leh hnam lo inrelbawl chhoh dan kan hriat loh chuan mi thiam tih kan hlawh tak tak ngai lo vang. Chuvangin, tun tumah hian kan ram political history-a pawimawh tak, Duhthlang thei kan ni em? tih chungchang, ka zirlaipuiten in lo hriat ve theih nan, tawi kimchang thei ang berin ka rawn thaipawr ve ang e. Kum 1946 vel ata tawh Independent chungchanga thu inchuh fo chu, Mizote hian Burma emaw, pakistan emaw, India zawm emaw, British Crown Colony-a awm emaw, Independent a awm emaw kan duh duh thlang thei ni anga sawi hi a awm ve reng a. Hemi thu tanchhantute sawi dan chuan, kum 1946-a Constituent Assembly Advisory Sub-Committee for North Eastern India, Aizawl-a lo kal khan Kulikawn-a public meetingah heta lo kal zinga mi Sir B.N.Rao-a khan Mizote hian in duh duh in thlang thei a, amaherawhchu India Union-a luh hi in tan a tha ber ang a ti a ni an ti a. Sawi dan dang lehah chuan Sir B.N. Rao-a khan chutiang takin a sawi awzawng lo an ti thung bawk. He advisory sub-committee ah hian Mizorama Political party awmchhun Mizo Union Party aiawhin khatihlaia Mizo Union Head-quarter, Aizawl President Pu Khawtinkhuma leh Sub Head-quarter, Lunglei President Pu Ch.Saprawnga te kha co-opted member niin an tel ve a. Mizorama an lo kala, Circuit House-a an thukhawm tum a, Rev.Zaireman duhthlan theih a ni nge nih loh tih Sir B.N. Rao a zawhna a chhan dan chu Pu Ch.saprawngan a lehkhabu page 138-ah tihian tarlang a. Kumpinu Sawrkar tirh Cabinet Mission ri ruat danin British India zawng zawng chu India Union-a lut vek tura tih a ni a. Zoram pawh British india chhunga tel in nih avangin khungtel in ni a.Tichuan an chhuah hnua (British ho) sawrkar awmdan turah in ngaihdan kan hre duh a ni e. a ti a, tiin a ziak. Pi Lalziki pawhin hemi thu bawk hi zawtin, Chu, India Union kan zawm duh nge duh lo tih in hre duh a ni maw? a han ti leh a. Sir B,N, Rao bawk chuan, Ni lo, chutiang chu keini thuken pawnlam a ni. India Union chhunga in dinhmun tur engtin nge ni ang tih rawn sawipui tur che u in kan lo kal a ni, a ti a, tiin a ziak bawk. Inhnialna a wm fo avangin Dt. 14 August, 1947-a Aizawla mi pawimawh zual 50 lai Bawrhsap Peteran a kokhawm tumah pawh hemi thu hi sawi a ni a. Assam Governor hnenah zuk zawhfiah nise an ti a, an zuk zawt ta a. Chuta Governor rawn chhanna Aizawl Bawrhsap Office atanga a tihchhuah chu hetiang hi a ni.

Published & Edited by K.Remruatfela on behalf of Mizo Student Association, Bangalore

ZIRLAITE KHAWNVAR, MSA, BANGALORE SUNDAY, SEPTEMBER 18, 2011. Editor : K.Remruatfela Mob. : 9036515569 Email:Zirlaitekhawnvar@rocketmail.com Jt. Editor: David Lalrinliana Mob. : 8147702583
Bawrhsap Notice No 7629-30 G. of 2.9.1947 a chhuah a nia. (i). There can be no question of the Lushais leaving the Indian Union as in law, the Lushai country being an Excluded area was already part of Assam. (ii). That the Lushai must remian with the Indian with the Indian Union . and cannot joint either Pakistan or Burma. (iii). That in view of the constitutional position stated above, the question of opting out after 10 (ten) years does not arise. He Governor chhanna copy hi saptawnga ziah a nih vang leh mi tlemte hnena a copy sem a nih vang hian timah pawhin an ngaihven zui em em hran lo niin a lang a. Tin, khatih lai khan politics-ah mipuite an la mawlmang em em a. Tun hnuah sawiseltu an awm anga, inhnialna a rawn piang dawn tih an lo hre lawk lovin intlawhkhalhna chang an hre lo pawh a ni thei. Tun hnaiah Mizo Union lo tih dikloh tarlan tum ngar ngar (tawng mawi lo ni suh se), Sailo pa (lal thlah) Pu Keihawla Sailo MCS ten Golden History of The Lushai Hills tih bu siamin thiam takin a rawn phetthlu char char mai sia. Lehlamah, Mizo Union hruaitu hluite an lo thi zo tawh bawk nen, thangthate thudik haichhuaka ke pen ngam tur hi Zofate hian a mamawh tak zet zet a ni. Heng thu ka han tarlanna chhan chu, kan Zoram politics bullam kha mi thenkhat ten tun thlenga an la hriatfiah thiam loh avangin, facebook leh Chanchinbu lamah te barluih Indian kan ni ti-a, a he zawnga sawi an awm leh zauh thin a. Chuvangin, thil awmzia leh a nihna dik tak ka M.S.A. member puite hriattir che u hi a tulin a langa, lohtheihlohna avangin he article pawh hi ka han ziak a ni ber mai.

Editorial:
THALAITE LEH LITERATURE
Literature khawvelah hian thalaite hian hniak ropui tak an lo hnutchhiah tawh a. Zofate zinga thu leh hla lama sul lo su hmasatu L. Biakliana te, R. Zuala, C.Z. Huala, C. Thuamluaia adt. te kha Literature tuipuia an zuanluh khan kum 20 erh awrh vel chauh an la ni. Hun leh nite a inher ang bawkin thalaite sukthlek pawh a danglam ta emaw ni,tunlai khawvelah chuan thu leh hla lama inhmang, thalaite zingah an tlem sawt hle niin a hriat. Bangalore Mizo zirlaiten kan pual iiau liau Chanchinbu kan neih awmchhun Zirlaite Khawnvar hi keini zirlaite hian duh angin kan la hmang tangkai tawk lovin kan hlut tawklo hle niin a hriat a.Article ziak tur leh ziah tum zirlaite zingah kan awm lo thin hi chu a pawi ngawt mai. Literature hi puitlinna kawnga min hruaitu pawimawh tak, ngaihtuahna tha leh dangdai kan neih theihna tura kawng min sial saktu tha tak a ni a. Literature in a chiah hneh loh mihring reng reng chu an nun a khingbai ruin, an nunah kimtawklohna a awm duh chawk. Chuvangin, keini zirlaite hian kan nun min khalh ngil a, nun tuihnang leh nun hlimawm kan neih theihna tur in Literature hi lo bel chiang a, a par zu lo dawn ve turin ka sawm tak meuh meuh che u. Literature lo pianchhan chu mihringte ritphurh tihzan te, an sualna leh lungngaihna tihzan tir te, an thinphu leh beiseina tihthar lehte a ni si a.

ZIRLAITE KHAWNVAR (MSA, BANGALORE)

MSA member-te min ti pumkhata, chanchin thar kan neih ang angte awlsam taka kan inhrilhpawh a, thawhhona tha zawk kan neih theihna a nih beiseiin Facebook-ah Zirlaite Khawnvar (MSA, Bangalore) tih group siam a ni a. He group hi mitan tana siam tih hre rengin chanchinthar kan neih ang ang apiangte leh zirna lampang thila kan vei zawng engpawh inthlahrung hauh lovin post thin ila. A la join ve lo kan awm a nih pawhin a thupui hming ang hi chhuin join theuh i tum ang u. Tin, kan thiante la join ve lo kan awm a nih pawhin add belh zel ila. Bangalore hi zirna khawpui, thiamna leh finna khurpuia chhuah thei tur hian puanven i sawi chhing sauh sauh ang u...

NGENNA
Synod Higher Secondary School, Aizawl chuan nakkum May ni 12 hian Golden Jubillee ropui taka lawm a tum a. Hemi ni denchhena Golden Jubillee Souvenir-a chhuah turin he sikula lo pass chhuak tawh zawng zawngte hming, a theih chin chin tarlan duh a ni a. Chuvangin, Bangalore Mizote zinga he sikula lo lut tawh kan awm a nih chuan khawngaihin Tv. K.Remruatfela (Mob.9036515569) hnen-ah kan hmingpum/batch/zirlai/ hnathawh etc. thawnin September thla ral hma ngei hian kan inhriaittir theuh dawn nia...

A thing of beauty is a joy forever John Keats

Published & Edited by K.Remruatfela on behalf of Mizo Student Association, Bangalore