Passaggio dal latino “volgare” alle lingue romanze e alle italo romanze

Differenziazione avviene secondo vari fattori che possono essere di carattere

 Diafrastico
 Diatopico
 Diastratico
 Diafasico
 Diamesico

Differenziazione che appunto è avvenuta secondo varie epoche e in varie zone dell’impero romano, dall’incontro con
differenti popoli conquistati da quello romano che vanno a costituire le popolazioni, e conseguentemente, le lingue di

 Sostrato
 Superstrato
 Adstrato

Chanson de Roland

CLXVIII

Ço sent Rollant que la mort li est près:

Par les oreilles fors se ist la cervel.

De ses pers priet Deu ques apelt,

E pois de lui a l' angle Gabriel.

Prist l' olifan, que reproche n' en ait,

E Durendal s' espee en l' altre main.

Plus qu' arcbaleste ne poet traire un quarrel,

Devers Espaigne en vait en un guaret;

Muntet sur un tertre; desuz un arbre bel

Quatre perruns i ad, de marbre faiz;

Sur l'erbe verte si est caeit envers:

La s' est pasmet, kar la mort li est près.

CLXIX

Halt sunt li pui e mult halt les arbres.

Quatre perruns i ad luisant de marbre.

Sur l' erbe verte li quens Rollant se pasmet.

Uns Sarrazins tute veie l' esguardet,

Si se feinst mort, si gist entre les altres.

Del sanc luat sun cors e sun visage.

Met sei en piez e de curre s' astet.

Bels fut e forz e de grant vasselage;

Par sun orgoill cumencet mortel rage.

Rollant saisit e sun cors e ses armes

E dist un mot: “Vencut est li niés Carles!

Iceste espee porterai en Arabe.”

En cet tirer li quens s' aperçut alques.

CLXX

Ço sent Rollant que s' espee li tolt.

Uvrit les oilz, si li ad dit un mot:

“Men escientre, tu n' ies mie des noz!”

Tien l' olifan, qu' unkes perdre ne volt,

Sil fiert en l' elme, ki grmmet fut a or:

Fruisset l' acer e la teste e les os,

Amsdous les oilz del chef li ad mi fors,

Jus a ses piez si l' ad tresturnet mort.

Après li dit: “Culvert paien, cum fus unkes si os

Que me saisis, ne a dreit ne a tort?

Ne l' orrat hume ne t' en tienget por fol.

Fenduz en est mis olifans el gros,

Caiuz en est li cristals e li ors.”

CLXXI

Ço sent Rollant la veüe ad perdue,

Met sei sur piez, quanqu' il poet s' esvertuet;

En sun visage sa culur ad perdue.

Dedevant lui ad une perre brune.

.X. colps i fiert par doel e par rancune.

Cruist li acer, ne freint ne s' esgruignet.

“E!” dist li quens, “seinte Marie, aiue!

E! Durendal, bone, si mare fustes!

Quant jo mei perd, de vos n' en ai mais cure.

Tantes batailles en camp en ai vencues

E tantes teres larges escumbatues,

Que Carles tient, ki la barbe ad canue!

Ne vos ait hume ki pur altre fuiet!

Mult bon vassal vos ad lung tens tenue.

Jamais n' ert tel en France la solue.”

CLXXII

Rollant ferit el perrun de sardonie.

Cruist li acer, ne briset ne n' esgrunie.

Quant il ço vit que n' en pout mie freindre,

A sei meïsme la cumencet a pleindre:

“E! Durendal, cum es bele e clere e blanche!

Cuntre soleil si luises e reflambes!

Carles esteit es vals de Moriane,

Quand Deus del cel li mandat par sun angle

qu' il te dunast a un cunte cataignie:

Dunc la me ceinst li gentilz reis, li magnes.

Jo l' en cunquis e Anjou e Bretaigne,

Si l' en cunquis Peitou e le Maine;

Jo l' en cunquis Normendie la franche,

Si l' en cunquis Provence e Equitaigne

E Lumbardie e trestute Romaine;

Jo l' en cunquis Baiver et tute Flandres

E Burguigne e trestute Puillanie,

Costentinoble, dunt il out la fiance,

E en Saisonie fait il ço qu' il demandet;

Jo l' en cunquis e Escoce e [Vales islonde]

E Engletere, que il teneit sa cambre;

Cunquis l' en ai païs e tere tantes,

Que Carles tient, ki la ad barbe blanche.

Pur cette espee ai dulor e pesance.

Mielz voeill murir qu' entre paiens remaigne.

Deus! perre, n' en laiser hunir France!”

CLXXIII

Rollant ferit en une perre bise.

Plus en abat que jo ne vos sai dire.

L' espee cruist, ne fruisset ne ne brise,

Cuntre ciel amunt est resortie.

Quant veit li quens que ne la freindrat mie,

Mult dulcement la pleinst a sei meïsme:

“E! Durendal, cum es bele e seintisme!

En l' oriet punt asez i ad reliques,

La dent seint Perre e del sanc seit Basilie

E des chevels mun seignor seint Denise,

Del vestement i ad seinte Marie:

Il nen est dreiz que paiens te baillisent;

De chrestiens devez estre servie.

Ne vos ait hume ki facet cuardie!

Mult larges teres de vus avrai conquises,

Que Carles tent, ki la barbe ad flurie,

E li empereres en est ber e riches.”

CLXXIV

Ço sent Rollant que la mort le tresprent,

Devers la teste sur le quer li descent.

Jo l' en cunquis Normendie la franche,

Desuz un pin i est alet curant,

Sur l' erbe verte s' i est culchet adenz,

Desuz lui met s' espee e l' olifan,

Turnat sa teste vers la paiene gent:

Pur ço l' ait fait que il voelt veirement

Que Carles diet e trestute sa gent,

Li gentilz quens, qu' il fut mort cunquerant.

Cleimet sa culpe e menut e suvent,

pur ses pecchez Deu en puroffrid lo guant. AOI.

CLXXV

Ço sent Rollant de sun tens n' i ad plus.

Devers Espaigne est en un pui agut,

A l' une main si ad sun piz batud:

“Deus, meie culpe vers les tues vertuz

De mes pecchez, des granz e des menuz,

Que jo ai fait dès l' ure que nez fui

Tresqu' a cest jur que ci sui consoüt!”

Sun destre guant en ad vers Deu tendut.

Angles del ciel i descendent a lui. AOI.

CLXXVI

Li quens Rollant se jut desuz un pin,

Envers Espaigne en ad turnet sun vis.

De plusurs choses a remembrer li prist,

De tantes teres cum li bers cunquist,

De dulce France, des humes de sun lign,

De Carlemagne, sun seignor, kil nurrit;

Ne poet muer n' en plurt e ne suspirt.

Mais lui meïsme ne volt mettre en ubli,

Cleimet sa culpe, si priet Deu mercit:

“Veire Patene, ki unkes ne mentis,

Seint Lazaron de mort resurrexis

E Daniel des leons guaresis,

Guaris de mei l' anme de tuz perilz

Pur les pecchez que en ma vie fis!”

Sun destre guant a Deu en puroffrit.

Seint Gabriel de sa main l' ad pris.

Desur sun braz teneit le chef enclin;

Juntes ses mains est alet a sa fin.

Deus tramist sun angle Cherubin

E seint Michel del Peril;

Ensembl' od els sent Gabriel i vint.

L' anme del cunte portent en pareïs.